Paala Kolo Titi
15
Praa wa wa ki ble ka, a Pharisee leele plɛ na Moses mbra nyinafɛɛnlɛ plɛ na yiri Jerusalem na mna pan mu Yesu wie mbo,
2 “Ŋgi ki tia paala nyjɛ o tolɛɛlɛ le mu tɛɛ yire, a mu twanfɛɛnlɛ pre n na lii yi na hin? Praa kɛnyi je o paala kolo na mbe chiin li.”
3 A Yesu na kna mbo, “A yire titi, ŋgi ki tia e Nyiɛkpɔɔ mbra yire je, mu taa e paala yire kolo na hin?
4 Nyiɛkpɔɔ yo mbo, ‘Mu lɛ na mu lo shɔnli, ŋmba we kee sisaa yo u lo, na u lɛ na kre, ki fna mbe pe u gbo.’
5-6 La, yire yo na na ndro yira ta mbe u lɛ, ndee u lo ŋga kre, kena ufun u ki tɛɛ mbe sra wɔ mbe Nyiɛkpɔɔ ŋga. Na ki pan ma, kena ki n shian na we u lɛ, ndee u lo ŋga yaka na. E tro e paala kolo nyjɛ krɛrɛ na, mu Nyiɛkpɔɔ mbra yire je.
7 Yire yiɛnyumufɛɛnlɛ, yɛŋgɛ Nyiɛkpɔɔ kee nyanyofun Isaiah na e kee nya mna yo kre mbo,
8 ‘Leele mblɛ, ni mɛɛ pe yeeri finfin,
pe n na ni kee chaa pe lolonyi nu.
9 Finfin pe ni sumi. Ŋgi na hin?
Lewo paala kolo pe leele nyina,
na yuu na Nyiɛkpɔɔ kolo yi.’”a
10 Ŋga Yesu na paara na pe ni mu kɔ kre, a wra lenɛɛrɛ pre yeeri mna yo pe pan mbo, “E ndie tɛɛ e kee kre nɔɔloo chiriri.
11 Ki n pe yira ŋga ki lee lewo nyuu, ki nɛɛrɛ woni u na, la, kee ŋga ki yili lewo nyuu kre, kre ki u toni na nɛɛrɛ ni.”
12 Ŋga wra yo ma kre, a u twanfɛɛnlɛ pre na flo mu da u na, mna yo u pan mbo, “Mu chin na kee ŋga mu yo kre, ki Pharisee leele pre yaa?”
13 A Yesu na kna mu yo pe pan mbo, “Tiŋge ŋga ni Lɛ ŋmba uu wa nyjeeri wre n luu kre, pie ki kɔ mbe wa.
14 Kena e pe ti wa, fuunlo lɛ, a pra plɛ nyina kolo. A na fuun u ŋmbrɔ fuun nyina kolo kre, wee nunu pe kro we to.”
15 A Peter na taan mu yiri mu yo Yesu pan mbo, “Jande, o nyina yomini kre nɔɔ.”
16 A Yesu na kna mbo, “Kena e n na kaalɛɛ nyjɛ nɔɔ ndru tuun?
17 Kena e n chin na yira ŋga ki lee nyuu kre, lɛɛ ki shie, mbe yire wa mbe yili mbe wo ree?
18 A la, kee ŋga ki yilii nyuu kre, loloŋgo nu ki yilii, kre ki ja na lewo toni nɛɛrɛ ni.
19 Lewo loloŋgo nu sisam jawala ŋga kro yili na paan, linkuuro kee, leŋgeere klaa, tiɛrɛɛ, juuro, kafinɛ dansiɛrɛ lie, na kabaara.
20 Yire kee nyjɛ krɛrɛ yi lewo toni nɛɛrɛ ni, kena na mu kɛnyi nyjɛ pe n je paala kolo na tɛɛ mu li, kia jaa mu tɔ nɛɛrɛ ni.”
Bichable Sɛɛn Sumifun Wa Tra Haa
21 Ŋga Yesu na paara a u nyu na to kre, a wra yili wa mna sɛ Tyre na Sidon lawee yire nu.
22 Chlɔ wa naa wa wa mna yiri Canaan tra nu. Ŋga chlɔ wre na Yesu nya kre, a wra fɛ mna taa u kro na nyɛni na yuu mbo, “Jande, David Nana, ni fooro le, ni Tafun, ni pɔ bichable nu ŋumufɔɔn nyi na u tɔɔra, kena jande, ya ni na.”
23 Ŋga chlɔ wre na yo ma kre, Yesu nsra nyu kun, a u twanfɛɛnlɛ pre na kna na Yesu tali mbo, “Jande, chlɔ wre ni, mbe u laa o kro, u gble o ndie titi.”
24 A Yesu na kna mu yo chlɔ wre pan mbo, “Israel leele mblɛ pe fun Nyiɛkpɔɔ kolo na kre, pre pan pe ni tun.”
25 A chlɔ wre na kosie kan Yesu yiɛ mbo, “Jande, ni Tafun, ya ni na.”
26 A Yesu na kna mbo, “Ki n fna mbe ndro u biile sro wru mbe wa nyikaanla pan.”
27 A chlɔ wre na kna mbo, “La, sro knumɛɛ nyjɛ yie yire pe Tafun li yira na, mbe wo tra kre, nyikaanla pre yi yoori na kaa.”
28 Ŋga chlɔ wre na yo ma kre, a Yesu na kna mbo, “Maa, mu shɔnlie kpɔɔ. Kena ŋga mu tali kre, ki pe ma mbe mu ŋga.” Titɛɛ kre nu to, a chlɔ wre pɔ wre na saanla.
Yesu Na Yira Nyininyini Tra
29 A Yesu na yili wa mna sɛ tro Galilee epo kre nyu na, mna sɛ nyua ka nduu mu tni wa.
30 Lenɛɛrɛ na sɛ na yambla ni u pan, fuunlo, na finla na mblɛ pe fuuru, na kpoolo, na yira nyininyini fɛɛnlɛ ni kro, mna pan na pe ni Yesu yiɛ, a wra pe kro tra.
31 Ŋga leele pre na kpo nya a wraa paara, mna fna nya wra nyaari, a fuun na nyaa kre, kra pe pe kawako, a praa Israel Nyiɛkpɔɔ wre kaan mɛɛ.
Yesu Leele Kagbenyi Jijirɛ Ŋga Sro
32 Yesu na u twanfɛɛnlɛ pre yeeri mna pan u jaara, mna yo pe pan mbo, “Leele mblɛ kee fooro ni ni pan. Ŋgi na hin? Pe tni ni jaara kie pe ble nununu taarɛ yi ŋga, na praa yaka ta mbe ka. A ni n na chaa mbe pe ndru mbe sɛ klo ni, na kre ma, plɛ we jire kolo.”
33 A u twanfɛɛnlɛ pre na kna mu u wie mbo, “A sena oo sro ta mbe ki leele tataara mblɛ da mbe li tablɔ tra ŋga nu hin?”
34 A Yesu na kna mu pe wie mbo, “Paanu mni yii wa e pan hin?”
A pra kna mbo, “Paanu kɔɔnashin, na mbroe chiɛri plɛ ni o nyi.”
35 A Yesu na kna mu yo lenɛɛrɛ pre pan, na pe tni tni nyaa yire na.
36 Yesu na paanu yire, na mbroe pre wru mu yii, mna Nyiɛkpɔɔ ŋga mboo, mna yi pile na mbroe pre ni mna le u twanfɛɛnlɛ pre kɛɛ, a praa lenɛɛrɛ pre kaan.
37 Lenɛɛrɛ pre kro na ka mna yɔɔ, a twanfɛɛnlɛ pre na pe kamprɛɛ yire yoori kakɛɛ kɔɔnashin.
38 Bilɛ mblɛ pra yirɛ yire ka kre naa kagbenyi jijirɛ. Pe nsra pe chiɛlɛ, na pe biile tɔɔnri mu chaa.
39 Ŋga Yesu na lenɛɛrɛ pre wa kolo, a pra sɛ kre, a wra sɛ le krɔ nu mna sɛ Magadan tra nu.