Yesu Sɛ Nazareth Na
6
Yesu na yili wa mna sɛ wre titi chia. Ŋga wraa shie kre, u twanfɛɛnlɛ pre na taa u kro.
2 Ŋga Judae pre Wuuble na to, a wra sɛ pe fninyuŋgo wa na pe nyina Nyiɛkpɔɔ ketaan kre. Leele tataara mblɛ pra kee kre loo kre, kra pe pe kawako.
A praa yuu mbo, “Sena ŋmba sɛ kee nyjɛ nyini ta ŋga hin? Mni u pe mu kachindɛ ŋga sembremu tuan ŋga hin? Kawako kee nyjɛ u pini ŋga nɔɔ yi ŋgi hin?
3 Kapinta wre ma ŋmbaa? Mary pɔ wre, James, na Joseph, na Judah, na Simon nyjɔ wre maa? Wre na u jaala kuraa oo wa mna.” A pe kro krɔ na kun na u ni.
4 A Yesu na kna mu yo pe pan mbo, “Nyiɛkpɔɔ kee nyanyofun kro, praa u shɔnli u chia, na u leele, na u katoo wolo nu.”
5 Kra tia Yesu nsra ja mna kekpɔɔ ka pe wa, fɔna yambla chiɛri mblɛ na wra kɛ taa taa, mna pe tra kre bɔkɔ.
6 Kra Yesu pe kawako ni na u wolo pre nsra u shɔnli.
Yesu U Twanfɛɛnlɛ Pre Tun
A wraa kila kabɛɛlɛ yire na, na pe nyina Nyiɛkpɔɔ ketaan kre.
7 Kraa wa wa, a wra u twanfɛɛnlɛ kɛmbɔshiin pre yeeri mna pan u jaara, mna pe mbra shiin shiin mna pe tun ketaan kre yohaa. Wra pe ŋga jaŋga mbe pe tɛɛ mbra ŋumufuɛn woni leele nu.
8 Yesu na yo pe pan na piashia sɛ na yaka ni kolo kre na, fɔna kaan yi wo chiin. A pia shia sro, ndee tɔkli, ndee swa wru mbe le greree nu.
9 Pie jaa kpawrɛ le, la, piashia dodonyi yɛ wru wru, mbe ya nyjɛ pe le yire na.
10 A Yesu na ndru mu yo pe pan mbo, “Na e le chia ka na, katoo ŋga nu ee le kpan, e tni wa e sɛ su nyjila ŋga nu ee yili chia kre na.
11 A mblɛ lawee ee le, a pe n shia e shɔ, ndee pe n shia e kee kre loo kre, na e waa yili wa na shie, mbe e e jeelee lam tra pɔ mbe wo wa, mbe ki pe sisam dansiɛrɛ li.”
12 A twanfɛɛnlɛ kɛmbɔshiin pre na sɛ ketaan kre yo na leele pe pe jawala chinɛ.
13 A pra ŋumufuɛn wɔ leele nu tataara, mna yambla tataara fa na olive simi ni, mna pe tra.
John Ndrajefun Kumu
14 A Ŋunu Herod na Yesu kee loo, na u mɛɛ kpali mu tro kro, a plɛ naa yuu na, “John ŋmba wraa leele ndrɛ jee wre, u ndru mu nyi. Kre ki tia a u faŋga ta, na kawako kee nyjɛ pini ma kre.”
15 A plɛ naa yuu mbo, “Elijah wi.” A plɛ naa yuu na, “Ki pe na fawolo Nyiɛkpɔɔ kee nyanyofɛɛnlɛ pre wa wi.”
16 Ŋga Herod na ki loo kre, a wra kna mbo, “John ŋmba ndra ndaa kɔ wre, u ndru mu nyi kre.”
17 Herod wra tia pra John yii mna sɛ le nyuŋgo, mu yire u chunu Philip chɔ Herodias, ŋmba wra shɔ mu leŋge wre ndra na.
18 Ŋgi ndra na hin? John naa yuu u pan na ki n fna mbe u u chunu chɔ shɔ mbe leŋge.
19 Kre kee ŋga ndra na, Herodias krɔ na kun na John ni, a wraa u chaa mbe gbo, a u nsra ki kolo ta.
20 Ŋgi na hin? Na Herod wre titi John fiɛ. Wra chin na John pe lewo ŋmba u fraka, mu pe cheche. Kra tia wra tɔ u na, u chɔ wre kɛɛ. Na John paara u pan kre, kraa u hau tataara, a nde u yiɛ naa shio u kayooro na.
21 Nyiɛnyɔɔrɔ ble ka na to Herodias pan, a u plɔ Herod naa u seble lii. Wra kɛ wa mna u lekpɔɛ, na u loplombo, na Galilee wa loplombo yeeri, a pra pan mu fni mbe pe yiɛ shɔ.
22 A u chɔ Herodias pɔ bichable na pan mu yɔ, a kra Herod, na u loplombo mblɛ praa wa wa kro yiɛ nyi.
A ŋunu wre na kna mu yo bichable wre pan mbo, “Ni wie yira ŋga mu chaa kpan. Mbe mu ŋga ki yi.”
23 A wra da mu pɔ wre ŋga mbo, “Yira ŋga mu ni wie kpan, mbe mu ŋga ki yi, hali na ni ŋunumu ŋga ni lii ŋga yɔɔ yi, mbe mu ŋga ki yi.”
24 A bichable wre na yili mna sɛ u lo wie mbo, “Maa, ni sɛ yira ŋgi wie hin?”
A u lo na kna mbo, “Sɛ yo na John ndrajefun wre ndra mu chaa.”
25 Titɛɛ kre nu, a wra ndru nyaanyaa mna sɛ ŋunu wre lawee mna yo mbo, “Ni chaa mbe mu John ndrajefun wre ndra taa paawa na mbe ni ŋga fuŋgaami.”
26 Kra ŋunu wre yaa titi, a na u danyi yire na u fumblɔ pre praa wa u jaara kre ndra na, u nsraa chaa mbe kɔ yi na, mbe je pɔ wre pan.
27 Titɛɛ kre nu, a wra u ndrɛ klɔfun wɔ mu tun, na u sɛ pan na John ndra ni. A wra sɛ u ndra kɔ,
28 mna taa taa paawa na, mna pan mu bichable wre ŋga, a wra sɛ u lo ŋga ki yi.
29 Ŋga John twanfɛɛnlɛ pre na ki loo na pe u gbo kre, a pra pan mna u gboo wre wru mna sɛ le.
Twanfɛɛnlɛ Pre Sɛ Mu Pan
30 Yesu bitumblɔ mblɛ wra tun pre na yiri pe kolo kre na mu pan, mna kee nyjɛ pra sɛ pe, na nyjɛ pra sɛ nyina yire krɛrɛ yo u pan.
Jesus feeds 5000 (Mark 6:30-44)
31 Ŋga kra pan ma kre, leele pre naa paan na shie, a kra tia pe nsra kolo ta mbe li. A Yesu na kna mu yo pe pan, mbo, “E yili mbe o sɛ lawee waa ka cha mbe hɛ wuu chiɛri.”
32 A pra le krɔ nu mna sɛ lawee waa ka cha mu tni.
33 Leele pre plɛ na pe nya pe sɛhaa, mna chin na pre lɛ, a pra wru tra, mu yili chiɛ yire kro na, mna fɛ mna sɛ yiɛ klu pe na.
34 Ŋga Yesu na yili krɔ kre nu mna leele pre nya tataara ma kre, pe kee na pe fooro ni u pan. Ŋgi na hin? Wra pe nya na mbaala mblɛ pe n lefun ni lɛ. A wra yire wa mna pe nyina Nyiɛkpɔɔ kee kre tataara.
Leele Kagbenyi Kunɔ Sro Ŋgahaa
35 Ŋga yila na kɔ kre, Yesu twanfɛɛnlɛ pre na pan u jaara, mu pan mu yo u pan mbo, “Mna pe lawee ŋga nu yaka n wa, a yila kɔ.
36 Kena leele pre wa kolo mbe pe sɛ seechiɛ, na kabɛɛlɛ nyjɛ yii wa mbɛɛlɛ na mna ŋga na, mbe sɛ yɛyɛ chaa lɔɔ ka.”
37 A Yesu na kna mu yo pe pan mbo, “E pe ŋga yaka mbe pe ka ɛ.”
A twanfɛɛnlɛ pre na kna mu yo u pan mbo, “Paanu denarii lafɛɛ shiin wee mu chaa mbe o lɔɔ paan leele mblɛ ŋga ree?”
38 A Yesu na kna mu pe wie mbo, “paanu mni ni e nyi hin? E sɛ yi le.”
A pra sɛ yi le mbo, “Yii paanu kunɔ na mbroe shiin.”
39 A Yesu na kna mu yo pe pan mbo, “E ti mbe leele pre ble ble peyɛ na, nyaa yire na.”
40 A leele pre na ble ble peyɛ na, lafaa lafaa, na fuloe shiin na kɛ kɛ.
41 A Yesu na paanu kunɔ yire, na mbroe shiin pre bali mu yii kɛɛ, mna yiɛ wa nyjeeri mna dwan mu le yi nu, mna yi knumu mu u twanfɛɛnlɛ pre ŋga, na pe leele pre kɛ kɛ imi na pe tni tni kre, mna ndru mu mbroe shiin pre pile mu pe ŋga kro.
42 A leele pre kro na ka mna yɔɔ.
43 Ŋga pra ka mu kɔ kre, a pra paanu na mbroe knumɛɛ nyjɛ yira kro yire koli kakɛɛ nyini kɛmbɔshiin.
44 Leele mblɛ pra yi ka pre naa bilɛ kagbenyi kunɔ.
Yesu Nyiɛtali
45 Titɛɛ kre nu a Yesu na tia u twanfɛɛnlɛ pre na le krɔ nu mbe yiɛ klu mbe hɛ epo kro chia ŋga pe yeeri Bethsaida kre na, mbe u leele pre wa kolo mbe chiin pan.
46 Ŋga Yesu na leele pre wa kolo mu kɔ kre, a wra sɛ nyua ka na, mbe wre na Nyiɛkpɔɔ sɛ paara.
Yesu Nyaari Epo Yiɛ Na
47 Ŋga ble naa woo kre, na u twanfɛɛnlɛ pre da na krɔ kre ni epo kre lalaa, a Yesu chiin naa wa fimi na.
48 A wra nya na pe sɛhaa yiɛ shelii pe na, ŋgi na hin? Na fuflɛ kpɔɔ yiri pe yiɛ na gbuun na pe fnii. Na kie pe nyisee nyu na, a wra nyaari epo kre yiɛ na, mna pan pe jaara. Wraa chaa mbe pe wa mbe tro.
49 La, ŋga u twanfɛɛnlɛ pre na u nya na u nyaari epo kre yiɛ na kre, praa jawa na gboo wi, a pra gble fɔɔri mu le.
50 A pe kro na kna mu u nya, a gbun na yɔ pe na.
Titɛɛ kre nu to, a Yesu na paara na pe ni, mna yo pe pan mbo, “E eyɛ yii! Mi wi, yaa fiɛ!”
51 A Yesu na le pe kro krɔ kre lam, a fuflɛ kre na yire. A kra pe pe kawako ni mu tro.
52 Na pe n paanu yire leele tataara pre na ka mu pra kre nɔɔloo tun, na pe kala nɔɔ loohaa wa mu sheli tɛ.
Yesu Gennesaret Yambla Tra
53 Ŋga pra kun kre, pra sɛ to Gennesaret tra nu, mna tii wa.
54 Ŋga pra tii krɔ kre nu kre, titɛɛ kre nu, leele mblɛ praa wa wa pre na u chin na Yesu wi.
55 A pra tafɛŋgɛ wru mna tro mbɛɛlɛ chiɛ nyjɛ yiraa wa wa yire kro na, mnaa paan na yambla mblɛ pee wa mu sni sni dɛŋglɛ na kro ni, mna pie loo na u nyi kpan.
56 Lawee ŋga nu Yesu we sɛ kpan, na seechiɛ na yi o, na kakpɔɛ na yi o, na kabɛɛlɛ na yi o, praa yilii na yambla ni lete na, na u tali na u ti mbe pe kɛ taa u dodoŋgi nyu chiin na. A yambla mblɛ pra ja mu kɛ taa u dodoŋgi kre na kro, na saanla.