Twanfɛɛnlɛ Pre Wɔhaa
10
Yesu na u twanfɛɛnlɛ kɛmbɔshiin pre yeeri mu pan u jaara, mna pe ŋga jaŋga mbe pra ŋumufuɛn woni leele nu, mbraa yambla kro trai.
2 Twanfɛɛnlɛ kɛmbɔshiin pre mɛɛ na yi kre,
ŋmba wra yiɛklu na wi Simon, ŋmba praa yeeri Peter wre,
na u chunu Andrew,
na James, Zebedee pɔ wre,
na u chunu John,
3 na Philip,
na Bartholomew,
na Thomas,
na Matthew ŋmba wraa tɔɔ shio wre,
na Alphaeus pɔ James wre,
na Thaddaeus,
4 na Simon Canaan wo wre,
na Judas Iscariot, ŋmba wra kɔ mu Yesu wɔ mu ŋga wre.
Bitumblɔ Pre Tnumu
5 Leele kɛmbɔshiin mblɛ, pre Yesu na tun mna yo pe pan mbo, “Yaa shia tro leele mblɛ pe n pe Judae nu, ndee mbe tro Samaria chiɛ yire ka na.
6 La, e sɛ Israel leele mblɛ pe fun na mbaala lɛ pre nu.
7 E sɛ yo pe pan na ‘Nyiɛkpɔɔ ŋunumu kre mbra mna.’
8 E na yambla kro trai, e na gboolo nyini, e na yiranyiɛrɛfɛɛnlɛ trai, e na ŋumufuɛn woni leele nu. Ni e ŋga jaŋga kre finfin, kena e na yaa pe na finfin.
9 Yaashia swa wru mbe le greree nu.
10 A yaashia bɔtɔe wru, a yaashia dodonyi, ndee mbe kpawrɛ wru mbe ya nyjɛ e le yire na, kanyie kuraa kre, yaa shia ka wru mbe yii. Ŋgi na hin? Leele mblɛ na ee sɛ ya pre we e ŋga nyjɛ yi e shian kro.
11 A chia ŋga na ee le kpan, e Nyiɛkpɔɔ chinfun wa lawee haa cha e le, a na e waa ta mu le u pan kre, e tni wa e sɛ su ŋga ble ee yili wa.
12 A katoo ŋga nu ee le kpan, e ki leele shaari kama.
13 Kena na katoo kre leele waa e shɔ, mu e kee loo kre, e ti mbe e dwamu kro ki nu. La, na pe n shia e shɔ kre, e ndru e sɛ na e dwamu ni.
14 A na pe n shia e shɔ, ndee mu e kee ŋga ni e sɛ loo chia ka na, ndee katoo ka nu kre, e yili kre lawee kre nu, e e jeelee tra pɔ e wo wa, mbe ki dansiɛrɛ li na pe e je.
15 Kpra na ni yuu e pan, na Nyiɛkpɔɔ kpra kun ble kre waa da, Sodom na Gomorrah kanyana kuraa we prɔ pefɛɛnlɛ na.”
Prara Kee Yoo
16 “E le, ni e tun mbe e sɛ na mbaala shie komboolo nu. Kena e kala chin na wɔɔlɔ lɛ, e eyɛ nyjii na katoo kotulo lɛ.
17 E le, e na eyɛ le chichie, pie e yii mbe sɛ na e ni kala li hɛɛ nu, mbe e frɔ pe fninyinyi nu.
18 Mi ndra na pie e yii mbe sɛ loplombo na ŋulo yiɛ, mbe e sɛ ni dansiɛrɛ li, pre na waŋgrafɛɛnlɛ yiɛ.
19 La, na pe e yii mu sɛ kala lihaa kre, yaa shia na kawa kee ŋga ee yo ni. Ŋgi na hin? Na nyjila kre da kre, Kpra Ŋumu wre we e ŋga kee ŋga ee yo.
20 Kre nyjila kre, na yire ma e paara na, la, na e Lɛ wre Ŋumu u paara e nu.
21 E le, lo pɔ we lo pɔ wɔ mbe ŋga, mbe pe u gbo, mbe lɛ u pɔ wɔ mbe ŋga, mbe pe u gbo, mbe biile yiri mbe paara mbe pe sefɛɛnlɛ taanla, mbe pe wɔɔ ŋga mbe pe pe gbo.
22 E le, mi ndra na, lenɛɛrɛ we e pra, la, ŋmba we jaa frɔ ta, mbe sɛ su ni pan nyjila kre, wre ŋmaa mbe shɔ.
23 La, na pe e pra chia ka na kre, e yili wa e sɛ fɔŋgɔ na. Kpra na ni yuu e pan na, yaa jaa tnumu tun Israel leele chiɛ kro na mbe kɔ, mbe Lewo Biblɔ wre chiin pan.
24 Twanfun wa jaa wɛ u nyinafun na, a tnu wa jaa wɛ u tafun na.
25 Ki nyu mu fna na twanfun we pe na u nyinafun wi, mbe tnu jaa pe na u tafun wi. Kena na pe katoo tafun wre yeeri ŋumufuɛn ŋunu kre, yira ŋgi kie ti mbe pia katoo kre tnifɛɛnlɛ yeeri ma na hin? Pre wo kuraa we wɛ.”
Ndro Ŋmba Ki Fna O Fiɛ
26 “Kena yaa na pe fiɛ. Ŋgi na hin? Kre yira n wa a pe ki tɔ, mbe pia kɔ mbe ki nyaa, a ndrandra kee ka n wa, mbe kia kɔɔ yili fimi na.
27 Kena kee nyjɛ ni ndra na yuu e pan kre, e na yi yuu fimi na. A nyjɛ ni juu na yuu e pan kre, e yire lete na e yi kpali.
28 A yaa shia mblɛ pie jaa wejiŋge gbo, a pia jaa ŋumu gbo wre fiɛ, la, e na Nyiɛkpɔɔ ŋmba we jaa ŋumu na wejiŋge kro gbo, mbe sɛ na ki ni kanyana kanhun nu wre fiɛ.
29 Hanyiɛlɛ bɛɛlɛ mblɛ kuraa pia prɛ shiin kɔbɔ kre, pe wa n wa mbe ku mbe e lɛ ŋmba uu wa nyjeeri wre wa chin ki nu.
30 La, ni yuu e pan na, e nyjure nyjɛ yii wa e ndrɛ na kuraa, u yi nyu chin.
31 Kena yaa shia fiɛ. Ŋgi na hin? E tnu kpɔɔ mu wɛ hanyiɛlɛ tataara na.”
Kristo Mɛɛ Yeeree Leele Yiɛ Na
32 “A ŋmba we yire leele yiɛ na mbe yo na u Tafun wi mi kre, mbe u mɛɛ sɔɔnri ni Lɛ ŋmba uu wa nyjeeri wre yiɛ na.
33 A ŋmba we yo na u Tafun ma mi leele yiɛ na kre, mba ufun mɛɛ sɔɔnri ni Lɛ ŋmba uu wa nyjeeri wre yiɛ na.”
Yesu Paan Sembremu
34 “Yaa shia jawa na wejinyiŋge ni ni pan tra mna, wejinyiŋge ni ma ni pan, la, kakrɔ ni ni pan.
35 Ni pan mbe e yɔɔlɛ,
‘mbe pɔ na u lɛ to peyɛ na,
mbe bichable na u lo to peyɛ na,
mbe nafun na nafun to peyɛ na,
36 mbe lewo sele ndro kaari u loŋgo.’a
37 A ŋmba we na u lɛ, ndee u lo kee chaa mbe wɛ ni na kre n fna ni wo. A ŋmba we na u biile kee chaa mbe wɛ ni na kre n fna ni wo.
38 A ŋmba u n u kanyana kumu kaan wru mu taa ni kro wre n fna ni wo fio!
39 A ŋmba ŋmaa kee kie u shian mbe tro wre, kie yili u kɛɛ. A ŋmba we yila ni na mbe u ŋmaa wa mbe fun kre, we ki ta.”
Twanfɛɛnlɛ Pre Jaŋga
40 “Ŋmba we e shɔ kre, u ni shɔ. A ŋmba we ni shɔ kre, u ŋmba u ni tun wre shɔ.
41 A ŋmba we Nyiɛkpɔɔ kee nyanyofun chin mbe u le kre, ufun we Nyiɛkpɔɔ kee nyanyofun fɔtɔɔrɔ ta. A ŋmba we lewo ŋmba u fraka chin mbe u le kre, ufun we lewo ŋmba u fraka fɔtɔɔrɔ ta.
42 A ŋmba we fiɛn fiɛn mblɛ wa chin na ni twanfun wi, mbe u ŋga nyumu chrɛgbɔɔ nunu chom kre, kpra na, ni yuu e pan, ufun wa u fɔtɔɔrɔ la.”