John Ndrajefun Leele Tun Yesu Pan
11
Ŋga Yesu na paara mu u twanfɛɛnlɛ kɛmbɔshiin pre nyina mu kɔ kre, wra yili wa, mna sɛ na kila chiɛ nyjɛ yiraa wa wa yire na, na ketaan kre yuu na leele nyina.
2 Kre nyjila kre, na pe John ndrajefun wre yii mu le nyuŋgo, a wra tni nyuŋgo wa mna Yesu tnumu nyjɛ wra pan na tuni yire kee loo, mna yire wa mna u twanfɛɛnlɛ pre plɛ tun,
3 na pe sɛ Yesu wie na, wre wi ŋmba u paan wre ndee, pra lefuŋu sri hin?
4 A Yesu na yo pe pan mbo, “E sɛ kee nyjɛ e nya, na nyjɛ e loo yire kee yo John pan,
5 na mblɛ pe fun nyiɛlɛ na pre nyaa, a finla na nyaari, a yiranyiɛrɛfɛɛnlɛ na saanla, a kpoolo na ndru, na paara, a gboolo na nyini, a shianfɛɛnlɛ ketaan kre ta na ndru.
6 Kena ŋmba we ni shɔ mbe li, a wa ni je kre we dwamu ta.”
Yesu John Dansiɛrɛ Li
7 Ŋga John bitumblɔ pre na ndru na shie kre, Yesu na wre John kee yo lenɛɛrɛ pre pra fni wa pre pan mbo, “Ŋga e na yili na shie John pan tablɔ tra kre nu kre, yirɛ nyji sembremu e naa jawa na ee sɛ nya hin? Nyaa nyjɛ fuflɛ mɔŋɔi le haa e naa shie ree?
8 Kena yirɛ nyji pan kuraa e na sɛ wa hin? Ndee lewo ŋmba u dodonyi chichiele le e naa shie mbe sɛ le ree? E le, e ti ni yo e pan, dodonyi chichiele lefɛɛnlɛ pre, ŋunu katoo pe nyi.
9 Kena e ni nyina nyjɛ pan e na sɛ wa. Nyiɛkpɔɔ kee nyanyofun wa lehaa e na sɛ ree? Kpra yi, e ti ni yo e pan, e na ŋmba wra wɛ Nyiɛkpɔɔ kee nyanyofun na nya.
10 Ŋgi na hin? John kee pra nyunɔ mu tɛɛ fa kre mbo,
‘Le, mbe ni bituŋu tun, mbe u yiɛ klu mu pan.
Wre we kolo gbeele mu pan.’a
11 Kpra na, e ti ni yo e pan, leweele nu kro, wa n wa a John ndrajefun wre n wɛ u na. La, ŋmba uu fiɛn Nyiɛkpɔɔ ŋunumu nu kuraa kre, u wɛ John na.
12 A mu yire John ndrajefun wre nyjila mu pan mu su ble nyjɛ nu o nyi ŋga nu kre, nyjeeri ŋunumu kre sɛɛ sheli. A mblɛ pe chaa mbe sɛ wa kre, gbeŋmbaa ni pe ki shie.
13 Nyiɛkpɔɔ kee nyanyofɛɛnlɛ pre, na Moses mbra yire na klu mna nyjeeri ŋunumu kre kee tataara nya mu yo, a John ndrajefun na chin mu pan.
14 Kena na e chaa mbe ni kee ŋga shɔ mbe li kre, ni yuu e pan na Elijah ŋmba kee pra yo fa na we yiɛklu mbe pan Kristo wre na kre, wre wi John ndrajefun wre.
15 Kena ŋmba uu wa ndie ni kre, e ti u loo.
Judah Ndikana
16 Kena leele mblɛ nyini kuraa ni mbe fuŋga leele mblɛ wru mbe gbun hin? Pan pe nyi na biile mblɛ pe pna jafa lawee nu lɛ, mbe plɛ kna mbra yuu plɛ pan mbo,
17 ‘O binyi gbun e pan,
a e je, e n yɔ.
A o kumu kpali,
a e je, e n nyɛni.’
18 John ndrajefun na pan, u nsraa sro lii, a u nsraa simi gboo. Kpatɔ na srɛ chiin na yi u sro, a nde leele naa yuu mbo, ‘Ŋumufɔɔn wa u nu.’
19 A mi Lewo Biblɔ wre pan, na lii, na gboo, a e na yuu na lilio, na gbɔgbɔɔ wi mi, a ni nɔɔlɔ lɛ tɔɔshɔfɛɛnlɛ na sisampefɛɛnlɛ. La, na Nyiɛkpɔɔ kachindɛ wa lewo nu kre, u kepele kie ki nyina.”
Korazin, Bethsaida Na Capernaum
20 Chiɛ yɛ naa wa wa, a Yesu na u kawako kee nɛɛrɛ pe yi na mu tro. La, bawa leele nsra pe jawala chinɛ. Ki tia Yesu na paara mna chiɛ yire taan mbo,
21 “Yire Korazin na Bethsaida leele, e atɛ! Ŋgi na hin? Kawako kee tataara nyjɛ ni pe e nu ŋga, na yire ndaa pe Tyre na Sidon na kre, bawa leele wra kumu yonyi tɔ, mbra tɔɔnrɔ fa, mbe kra nyina na pe laa pe sisam kro.
22 Kena e jawa e chin na, waŋgra kla ble kre, Nyiɛkpɔɔ we Tyre na Sidon leele fooro chin mbe wɛ e na.
23 A yire Capernaum leele, e eyɛ kpɔɔ, na jawa na ee sɛ Nyiɛkpɔɔ lawee, la, kanyana lawee ee sɛ. Ŋgi na hin? Kawako kee nyjɛ ndaa pe a e na nya kre, na Sodom na ndaa yire kee nyjɛ pe kre, pie na pe jawala chinɛ, a kaa chia kree wa tɛ.
24 Kena e jawa e chin na Nyiɛkpɔɔ kpra kun ble kre, we Sodom leele fooro chin mbe wɛ e na.”
Yesu Nyiɛkpɔɔ Ŋga Mboo
25 Ŋga Yesu na paara mu da wa kre, a wra kna mbo, “Ndoo, nyjeeri na tra Tafun, ni mu kaan mboo na mu mu kee kre ndra kachimblɛ na, mu ki wɔ mu bibɛɛlɛ nyina.
26 Yɛŋgɛ yi ndoo, ŋga ki tna mu pan mu pini.
27 Ni Lɛ wre yirɛ kro le ni kɛɛ, la, ndro n u Biblɔ wre chin, fɔna Lɛ wre chiin, a ndro n Lɛ wre chin, fɔna u Biblɔ wre na mblɛ Biblɔ wre chaa mbe u Lɛ wre wɔ mbe nyina pre.”