Leele Fuloe Taarɛ Na Kɛmbɔshiin Sɛ Ketaan Kre Yo Haa
10
Yire kee nyjɛ kɔkro kre, o Tafun wre na leele fuloe taarɛ na kɛmbɔshiin wɔ, mna pe mbra shiin shiin mna pe tun na pe yiɛklu mbe sɛ ketaan kre yo chiɛ nyjɛ na wre Yesu chaa mbe sɛ yire na.
Luke 10:1-24
2 Wra yo pe pan mbo, “Yirɛ kun wee yire nɛɛ, a kunfɛɛnlɛ pree fiɛn. Kena e yirɛ yire tafun wre tali mbe u tnumutunfɛɛnlɛ tun, mbe pe paan yirɛ yire kun.
3 E le, e sɛ, ni e tuni na mbaala mblɛ pe shie komboolo nu lɛ.
4 Yaa shia sɛ na swa le yirɛ ni, a yaa shia bɔtɔ wru, ndee mbe kpawrɛ yɛ wru mbe ya nyjɛ e le yire na. A yaa na yire mbra shaari mbra nyjila klai.
5 A katoo ŋga nu ee le kpan, e klu e yo na wejinyiŋge ki tni katoo kre nu.
6 Kena na wejinyiŋge chafun waa wa katoo wa kre, wrefun nu e wejinyiŋge kre we tni, a na ki n pan ma naa, e wejinyiŋge kre we ndruu pan e pan.
7 A e tni katoo nunu kre nu, e na yira ŋga pie na e kaan kpan shuo e na kaa, e na gboo. Ŋgi na tnumutunfun fɔtɔɔrɔ fna na u ni, yaa shia yili katoo ka nu mbe sɛ fɔŋgɔ nu.
8 Chia ŋga na ee le, a pe waa e shɔ kre, sro ŋga pie e ŋga kpan e ki li,
9 a yambla mblɛ pee wa ki na kpan, e pe tra, e yo pe pan na Nyiɛkpɔɔ ŋunumu kre mbra pe na.
10 La, na e le chia na, a pe n shia e shɔ kre, e sɛ yire chia kre lete na, e yo pe pan na,
11 ‘Hali e chia ŋga tra nyjɛ yi mbra o jeelee na kuraa kre, o yi pɔ mu wo e na, mbe ki pe dansiɛrɛ kee mbe e taan, la, e ja e chin na, Nyiɛkpɔɔ ŋunumu kre mbra mna.’
12 Ni yuu e pan, Nyiɛkpɔɔ kpra kun ble kre, pie Sodom leele fooro chin mbe wɛ kre chia kre na.”
Korazin Na Bethsaida Na Capernaum
13 “Korazin atɛ, Bethsaida atɛ. Ŋgi na hin? Kawako kee nyjɛ yi pe e nu ŋga, na yire yira pe Tyre na Sidon na kre, pia na nyjila kla kuraa, pie na pe jawala chinɛ, mbra fooro li kpɔɔ.
14 La, Nyiɛkpɔɔ kpra kun ble kre, pie Tyre na Sidon leele fooro chin mbe wɛ e na.
15 A ŋu, Capernaum, mu jawa na muu tnihaa chichie ni nyjeeri. Ma tni haa chichie ta. Pie sɛ na mu ni Sutna kanhun.
16 Kena ŋmba we e kee loo kre, u ni kee loo. A ŋmba we e je kre ni je. A ŋmba we ni je kre, u ŋmba u ni tun wre je.”
17 Leele fuloe taarɛ na kɛmbɔshiin pre na sɛ mna ndru mu pan na yɛshɔɔrɔ ni, mna kna mbo, “O Tafun, mu mɛɛ kre saara na, hali ŋumufuɛn kuraa peyɛ nyjii mu o ŋga.”
18 A Yesu na kna mna yo pe pan mbo, “Ndaa Sutna nya na u yire nyjeeri mu to tra na nyiɛtwanraa yi.
19 E le, ni e ŋga jaŋga mbe e na wɔɔlɔ, na naala taanla, a ni Sutna na u jaŋga kro le e kɛɛ, a yaka wa e ta fio.
20 La, yaa ti mbe e yiɛshɔ na ŋumufuɛn peyɛ nyjii mu e ŋga, la, e ti mbe e yiɛshɔ na pe e mɛɛ nyunɔ nyjeeri.”
Yesu U Lɛ Ŋga Mboo
21 Kre nyjila kre nu, Kpra ŋumu wre na tia Yesu yiɛ na shɔ, a wra kna mbo, “Ndoo, nyjeeri na tra Tafun, ni mu kaan mboo, na mu kaalɛɛ nyjɛ ndra kachimblɛ, na hlɛchinfɛɛnlɛ na, mu yi wɔ mu biile fiɛnfiɛn nyina. Yɛŋgɛ yi ndoo, pan mu ki chaa, kre ki tia mu ki pe ma.
22 Ni Lɛ wre ni ŋga yirɛ kro. Ndro n u Biblɔ wre chin, fɔna Lɛ wre chiin. A ndro n u Lɛ wre chin na Biblɔ wre, na mblɛ Biblɔ wre chaa mbe u lɛ wre wɔ mbe nyina pre chiin bɔkɔ.”
23 A wra kna mna yo u twanfɛɛnlɛ pre chiin pan mbo, “Ndro Ŋmba u kee nyjɛ e nya yire nya wre wo yi dwamu.
24 Ŋgi na hin? Ni yuu e pan na, Nyiɛkpɔɔ kee nyanyofɛɛnlɛ tataara, na ŋulo tataara naa chaa na pie na nyjɛ e nya ŋga nya, la, pe nsra yi nya, a praa chaa mbra nyjɛ e loo nyjɛ loo, la, pe nsra yi ta mu loo.”
Samaria Ndro Fooro Chinfun Wre
25 Ki ble ka mbra nyinafun wa na yiri mna Yesu pe mbe le mbo, “Nyinafun, mni mbe pe mbe blenyini ŋmaa ta hin?”
Luke 10:25-42
26 A Yesu na kna mna yo u pan mbo, “Kee yire pe nyunɔ Moses mbra yire nu mu tɛɛ kre, mni mu yi nɔɔloo mu da hin?”
27 A blɔ wre na kna mbo, “Pe yo ki fna mu mu Tafun Nyiɛkpɔɔ kori na mu loloŋgo, na mu ŋmaa, na mu jawala, na mu faŋga kro ni, mbe mu ŋmbrɔ kori, imi na mu muyɛ kori mu da kre.”
28 A Yesu na kna mbo, “Mu ki nyu wɔ chichie, na mu yire kee nyjɛ pini mu ŋmaa ta.”
29 La, blɔ wre naa chaa mbe uyɛ gbeele, kra tia wra Yesu wie mbo, “A ŋmbi wi ni ŋmbrɔ hin?”
30 A Yesu na kna mbo, “Blɔ wa wra yiri Jerusalem na mnaa shie Jericho na, mna sɛ fni kokɔɔnlɔ ni kolo, a pra u yirɛ shɔ u pan kro, mna u frɔ mu chaa u gbo, mna u ti wa mu sɛ.
31 Judae Srawɔfun wa na kolo kre yii na shie wre lawee ka nu. Ŋga wra blɔ wre nya kre, wra u klɛ mu tro.
32 Pan chɔɔ Levi ndro wa na tro kolo kre na mna blɔ wre nya na mna u klɛ mu tro.
33 La, Samaria ndro wa naa kolo kuun, mna pan mu da blɔ wre lawee. U kee na pe u pan fooro ni,
34 a wra flo mu da u na, mna simi le u klɛ yire nu, mna yi pɔ kama, mna u wru mu taa u yurɔ ŋmba ni wraa kolo kuun na, mna sɛ na u ni fumblɔ snindoo, mna sɛ u le kama.
35 Ŋga nyiŋge na se, a wra yiri mna swa wɔ mna fumblɔ lefun wre ŋga, mna kna mbo, ‘Jande, shɔ mna blɔ ŋmba le ni pan, fɔlɔ ŋga mu gbun ki kro kpan, na ni pan mbe ki tɔ!’
36 Kena leele taarɛ mblɛ, ŋmbi mu jawa na wra pe blɔ ŋmba kokɔɔnlɔ na frɔ wre ŋmbrɔ hin?”
37 A mbra nyinafun wre na kna mbo, “Ŋmba wra u fooro chin wre na wi.”
A Yesu na kna mbo, “Kena sɛ pe ma.”
Yesu Sɛ Martha Na Mary Shaari Haa
38 Ŋga Yesu na u twanfɛɛnlɛ pre na to kolo na shie kre, wra le seechia ka na, bawa chlɔ wa, praa u yeeri Martha, na u wru mu sɛ na u ni u katoo.
39 Chlɔ wre chunu wa naa wa praa u yeeri Mary, wra sɛ tni Yesu jaara, na u kee nyjɛ wraa nyina yire ndru.
40 Na Martha yiɛ nyina wra sro pini pe pan. Martha krɔ na kun Mary ni, na u pieri mu na wre nunu le wra tnumu kre tuni. A wra sɛ yo Yesu pan mbo, “Ni Tafun, mu n nya na ki n fna na Mary we ti mbe mi nunu tnumu yire kro tuun? Kena yo u pan mbe u paan ya ni na.”