O Tafun Wre Nyiɛtalaa
11
Yesu na sɛ na nyiɛtali lawee ka nu. Ŋga wra kɔ kre, a u twanfɛɛnlɛ pre wa na pan mna yo u pan mbo, “O Tafun, o nyina imi oo na nyiɛtali, imi na John na u twanfɛɛnlɛ pre nyina kre.”
Luke 11:1-28
2 A wra kna mna yo pe pan mbo, “Na e nyiɛtali kre, e na yuu na,
Ndoo ŋmba uu wa Nyjeeri,
mu mɛɛ chichie ki yili,
mbe mu ŋunumu pan.
3 O ŋga o blenyini aliire,
4 mu o sisam ti mu o kɛ.
Ŋgi na hin?
O tii na mblɛ pe sisaa pini o na pre kee,
a maa shia sɛ na o ni nyu chaara kee ka nu,
mu o wɔ mu yili Sutna kɛɛ.”
Blenyini Nyiɛtalaa
5 A Yesu na kna mna yo pe pan mbo, “E ŋmbihaa we sɛ u nunu pan blee, mbe sɛ yo u pan na, ‘Awe, jande, ni jin paanu taarɛ,
6 ni nunu wa le ni pan fuŋgaami, a ni n yaka ta mbe u ŋga,’
7 mbe u yo u pan na, ‘Maa ni hau! Ni ni krɔ tɔ mu kɔ, a ni biile ŋunu. Mba jaa yiri mbe mu ŋga yaka.’
8 Na kra kro nɔɔlɔ na, wa na yiri, la, ŋga mu kro na u tali kre ndra na, we yiri mbe mu ŋga nyjɛ yi mu shian kro.”
Nyu Yoo Sembremu Taarɛ
9 “Kre ndra na, ni yuu e pan na, e tali, pie e ŋga, na chaa, ee nya, na e krɔ koori, pie ki nyaa e pan.
10 Ŋgi na hin? Ŋmba u tali kre, u taa, a ŋmba u chaa kre, u nyaa. A ŋmba we krɔ koori kre, pie ki nyaa u pan.
11 E mblɛ pan biile nyi kre, e ŋmbihaa pɔ we u tali mbro, mbe u u ŋga wɔɔ hin?
12 Ndee na u pɔ u tali ŋgochrɛwɛ, mbe u naa yii mbe le u kɛɛ hin?
13 Kena na yire sisaa pefɛɛnlɛ mblɛ chin, mu na e biile kaan yirɛ chichiele, ŋgi kie ti mbe e Lɛ ŋmba uu wa nyjeeri wre wa mblɛ pe u tali Kpra Ŋumu wre, mbe wa pe ŋga u wi hin?”
Yesu Na Beelzebub
14 Ki ble ka Yesu na sɛ na ŋumufɔɔn woni kpo wa nu. Ŋga ŋumufɔɔn wre na yili blɔ wre nu kre, a wra ja mna paara, a kra lenɛɛrɛ pre pe kawako ni.
15 La, pe plɛ na kna na yuu mbo, “Beelzebub, ŋumufuɛn ŋunu wre uu ŋga jaŋga, a wra ŋumufuɛn woni leele nu.”
16 A plɛ naa chaa mbe u pe mbe le, mbe u nyjeeri kawako kee pe mbe pe nya.
17 La, Yesu na pe jawala nya, mna kna mu yo pe pan mbo, “Na waŋgra kiyɛ yɔɔlɛ, na wii na kiyɛ ni kre, waŋgra kre we to, a na sele kiyɛ yɔ, na wii kiyɛ ni, kie ja.
18 Kena na Sutna uyɛ yɔɔlɛ, na wii na uyɛ ni kre, mni u ŋunumu kre we pe mbe yire hin?
19 Ŋgi na hin? E yo na Beelzebub jaŋga ni ni ŋumufuɛn woni leele nu, kena na Beelzebub jaŋga ni ni ŋumufuɛn woni leele nu kre, kena ŋmbi jaŋga ni e biile pre ŋumufuɛn woni leele nu hin? Pre pie pe e kpra kunfɛɛnlɛ.
20 La, na Nyiɛkpɔɔ jaŋga ni ni tɛɛ na ŋumufuɛn pre woni kre, kena e chin na Nyiɛkpɔɔ ŋunumu kre mbra e na.
21 Na faŋgafun uyɛ kna, mu ŋunɔ wiyirɛ pɔ, na u katoo sri kre, yaka wa jaa u yirɛ ta.
22 La, na faŋgafun ŋmba u wɛ u na waa pan, maa wi na u ni maa u ja kre, we u ŋunɔ wi yirɛ nyjɛ na u kaan yire koli, mbe yi yɔɔlɛ mbe leele ŋga.
23 Kena ŋmba u n pe ni wo kre, e chin na ni loŋgo wi, a ŋmba u n na yaa ni na, mbe o leele ble kre, e chin na wre u pe nyina.
Ŋumufɔɔn Wre Ndru U Kro
24 Na ŋumufɔɔn yili lewo nu kre, we sɛ wila tablɔ tra kre nu, mbra lawee chaa mbe tni. Na waa lawee cha mu la, mbe u kna mbe yo uyɛ pan mbo, ‘Mbe ndru mbe sɛ ni katoo ŋga nu ndaa yili mu pan kre nu.’
25 Na waa ndru mu pan, mu nya na pe katoo kre pɔ, mu ki lam yirɛ mbra kama kre,
26 mbe u ndru mbe sɛ pan na ŋumu kɔɔnashin mblɛ pe wɛ wre na ni, mbe pe kro paan tni wa, na ki pan ma kre, ndro ŋmba nu pie tni wre sisam we wɛ u jle kre na.”
27 Ŋga Yesu nyu na to kre, a chlɔ wa na yire lenɛɛrɛ pre nu mna paara kpɔɔ mbo, “Lɛɛ ŋga ki mu se, na nyinimi ŋga mu ŋgɔɔri kre wo yi dwamu.”
28 A Yesu na kna mbo, “La, mblɛ pe Nyiɛkpɔɔ kee kre ndru na lii ki na kre, pre wo yi dwamu kpɔɔ.”
Judae Pimi Wɛ Mblɛ Pe N Pe Judae Na
29 Ŋga leele pre naa nɛɛi na yaa kre, Yesu na kna mna yo pe pan mbo, “Aŋga leele mblɛ, sisampefɛɛnlɛ lɛ pe kro. Kawako kee pe chaa mbe nya. La, pia ka nya fio, fɔna Jonah kee kre chiin bɔkɔ.
Luke 11:29-36
30 Ŋgi na hin? Imi Jonah kee kre na pe kawako ni Nineveh leele pan kre, pan chɔɔ Lewo Biblɔ wre kee we pe kawako ni aŋga leele mblɛ pan.
31 Nyiɛkpɔɔ kpra kun ble kre, Sheba ŋuchlɔ wre we yiri mbe paara mbe aŋga leele mblɛ taan. Ŋgi na hin? Wra yiri haalee mna sɛ ŋunu Solomon kachindɛ kee kre loo, a e le, ndro ŋmba u wɛ ŋunu Solomon na wree wa mu yire mna.
32 Nyiɛkpɔɔ kpra kun ble kre, Nineveh leele we yiri mbe paara mbe aŋga leele mblɛ taan. Ŋgi na hin? Ŋga pra Jonah kee yire wraa kpali yire loo kre, pra pe jawala chinɛ, a e le, ŋmba u wɛ Jonah na wree wa mna.”
Kania Tnumu
33 “Ndro n wa mbe kania mu mbe ki ndra, ndee mbe yira tɛɛ mbe ki juule, la, we ki taa kania taa yira na, mbe mblɛ pie le katoo wa kro na nyaa ki na.
34 Lewo wejiŋge kania yi u nyini. Na mu nyini pe chasi, mu wejiŋge kro we pe chasi. A na mu nyiɛlɛ n nyu kre, mu wejiŋge kroo wa wɔmu nu.
35 Kena e dɔɔta, mbe e kania ŋga kii wa e nu kre wa fii.
36 Kena na kania ŋga kii wa mu nu kre fniŋge, a wɔmu n wa ki kokoo ka nu kre, kie na nyaa lawee kro nu, imi na pie kania mu mbe tɛɛ mbe kraa nyaa kre.”
Yesu Na Li Pharisee Wo Wa Katoo
37 Ŋga Yesu na paara a u nyu na to kre, Pharisee wo wa na u yeeri mna sɛ u katoo, a pra sɛ tni na lii.
Luke 11:37-54
39 A Yesu na kna mna yo u pan mbo, “Yire Pharisee leele, yire e e gbɔyirɛ yire krɔ jee, la, jajaara na sisam kee yi e lam nyi.
40 Yire jijiele mblɛ, e n chin na Nyiɛkpɔɔ ŋmba wra fimi gbeele wre, wre wra lam gbeele na ree?
41 Kena e na shianfɛɛnlɛ kee yirɛ na lɛɛ nunu ni, kre yirɛ kro we pe cheche mbe e ŋga.
42 La, yire Pharisee leele, e atɛ. Ŋgi na hin? Yire titi yirɛ fiɛnfiɛn nyjɛ e taa yire, e yi yɔɔlɛ kɛ, mbe Nyiɛkpɔɔ ŋga nununu kama, la, Nyiɛkpɔɔ kpra liire, na u koroo kre, e yire je, a yire kee nyjɛ yi fna mbe e naa pini mbraa yaa.
43 Yire Pharisee leele, e atɛ! Ŋgi na hin? Na e sɛ fninyinyi nu kre, tnihɛɛ chichiele e chaa, na lete shaaraa chaa.
44 E atɛ! Pan e nyi na fanyi nyjɛ leele n na nyaa, na yi taanla na tro yi, a nde yirɛ fuɛn bribri yii wa yi nu.”
45 Bawa pe mbra nyinafɛɛnlɛ pre nunu na kna mna yo Yesu pan mbo, “Nyinafun, na mu yo ma, kena o kro mu paara na taanla kre.”
46 A Yesu na kna mbo, “Yire mbra nyinafɛɛnlɛ pre, e atɛ na. Ŋgi na hin? E tuuro nyjɛ leele wa ja kre pɔ mu pe tio. A yire titi wa kɛ taa ka na.
47 E atɛ. Ŋgi na hin? Nyiɛkpɔɔ kee nyanyofɛɛnlɛ mblɛ e tolɛɛlɛ na gbo pre, yire e pe fanyi faanri.
48 Kena e chaa mbe nyina na kee nyjɛ e tolɛɛlɛ na pe kre, na yire nyjila na yi chɔɔ, ka pan ee na pe. Ŋgi na hin? Pre na pe gbo, mna pe le, a yire pe fanyi faanri.
49 Kre ndra na, kee nyjɛ Nyiɛkpɔɔ na yo yi kre mbo, ‘Mbe ni kee nyanyofɛɛnlɛ na bitumblɔ tun pe pan. Ee plɛ gbo, mbe ti plɛ kala nya.’
50 Mu yire waŋgra gbeele nyjila mu pan mu su aŋga, ni kee nyanyofɛɛnlɛ mblɛ pe gbo kre ndra na, pie aŋga leele mblɛ ndie tini.
51 Kpra na ni yuu e pan na, mu yire Abel na, mu pan mu su Zechariah ŋmba pra gbo sragbunu, na cheche ndoo kre lalaa kre ndra na, mbe aŋga leele mblɛ ndie tini.
52 Yire mbra nyinafɛɛnlɛ, e atɛ. Ŋgi na hin? E Nyiɛkpɔɔ kachindɛ kre kolo tɔ, yire titi wa sɛ wa, a mblɛ pie sɛ wa pre, a e kolo tɔ pe na.”