Pe Yesu Jaŋga Nɔɔ Wie
20
Ki ble ka, Yesu naa leele nyina na ketaan kre yuu pe pan Suminyuŋgo wa. Judah srawɔfɛɛnlɛ loplombo pre na mbra nyinafɛɛnlɛ pre, na chia loplombo pre na pan,
Luke 20:1-26
2 mna u wie mbo, “Ŋmbi u mu ŋga kolo mna yire kee nyjɛ pini mna hin? O nyina ŋmba u mu ŋga kre jaŋga kre.”
3 A Yesu na kna mu yo pe pan mbo, “Mbe e wie kala nunu na chɔɔ, mbe e ki nyu wɔ.
4 John ndra jee kre, Nyiɛkpɔɔ pan kra yiri ndee, lewo pan hin?”
5 A pra ki kna na peyɛ ni, mna kna mbo, “Na o yo na Nyiɛkpɔɔ pan kra yiri kre, we yo na, ‘Ŋgi ki tia e nsra u shɔnli hin?’
6 A na o yo na, ‘Lewo pan kra yiri kre,’ leele pre we o waari na dnɛ ni. Ŋgi na hin? Pe shɔnli na Nyiɛkpɔɔ kee nyanyofun na wi John.”
7 Ki tia pra kna mbo, “O n chin mna kra yiri.”
8 A Yesu na kna mna yo pe pan mbo, “A mba e nyina mna ni yiri jaŋga ni na kalɛɛ nyjɛ pini.”
Falifɛɛnlɛ Ndra Shelifɛɛnlɛ
9 Bawa Yesu na kna mna leele pre gbun yomini ka mbo, “Blɔ wa wra u tre see ka pe, mna ki wru mu le falifɛɛnlɛ plɛ kɛɛ mna sɛ waŋgra ka nu, mna sɛ mu wa.
10 Ŋga see kre yirɛ na le kre, a wra yire wa mna u sumifɛɛnlɛ pre wa wɔ mu tun see kre lefɛɛnlɛ pre pan, na u sɛ yirɛ yire yɛ shɔ mbe paan u ŋga. A see kre lefɛɛnlɛ pre na u frɔ, mna u ni a wra sɛ kɛwaara.
11 A wra ndru mna u sumifɛɛnlɛ pre wa tun na, a pra ndru mu wre yii mna u frɔ, mna cheu wɔ u na, mna u ni a wra sɛ kɛwaara.
12 A wra je mna taarɛwo tun na, a pra wre gbun mu laala, mna u wɔ mu wa fimi na.
13 A seefun wre na kna mbo, ‘Mni mbe pe hin? Mbe ni pɔ ŋmba ni kori wre tun. Aada pie wre nyifɛɛrɛ pe.’
14 Ŋga see kre lefɛɛnlɛ pre na pɔ wre nya kre, a pra kna mna yo peyɛ pan mbo, ‘Seefun krɔlifun wre wi kre. E ti mbe o u gbo, mbe krɔ kre pe o wo.’
15 A pra u yii mna u tini mna yili see kre lam, mna sɛ u gbo.”
A Yesu na kna mna pe wie mbo, “Kena mni seefun wre we pe pe hin?
16 We pan mbe see kre lefɛɛnlɛ pre gbo peii, mbe see kre wru mbe le lefumblɔ kɛɛ.”
Ŋga leele pre na kee kre loo ma kre, a pra kna mbo, “Nyiɛ we o kisi ki na.”
17 A Yesu na pe le komm, mna kna mbo, “Kena kee ŋga pe nyunɔ mu tɛɛ kre, ki nɔɔ yi ŋgi hin?
‘Dnɛ ŋga nyuŋgo sinfɛɛnlɛ pre na je kre chɔɔ,
kre ki kɔ mu pe nyuŋgo kre ndra.’a
18 Kena ndro ŋmba we to dnɛ kre na kpan, kie u pile, a ŋmba na kie to kpan kie u tre.”
19 Mbra nyinafɛɛnlɛ pre na Judah srawɔfɛɛnlɛ loplombo pre naa u chaa mbe yii titɛɛ kre nu. Ŋgi na hin? Pra chin na yomini ŋga u gbun kre, pre u taan na ki ni, la, praa fiɛ leele pre na.
Tɔɔ Shɔɔ Kawiere
20 Ŋga kra pan ma kre, praa u chaa nyjila chiriri nu mbe u yii, a pra leele wɔ, mna pe ŋga swa, a pra peyɛ pe na leele chichiele lɛ, mna sɛ na u wie kaalɛɛ, na aada we kee ka yo mbe pe u ta mbe yii ki na, mbe sɛ u le abani kɛɛ.
21 Leele pre na sɛ u wie mbo, “Nyinafun, o chin na mu paara na leele nyina kpra ni, a mnaa yoori, la Nyiɛkpɔɔ kpra kolo titi kre mu nyina.
22 Kena mbra kolo ŋga, mbe o tɔɔ tɔ mbe ŋunu Caesar ŋga, ndee mni hin?”
23 Yesu na pe kachindɛ kolo ŋga praa chaa kre nya peii, mna kna mu yo pe pan mbo,
24 “E ni ŋga swabie ka,” Mbo, “Ndro ŋmbi kumu na u mɛɛ yi ki na ŋga hin?”
A pra kna mbo, “Ŋunu Caesar wee yi.”
25 A Yesu na kna mna yo pe pan mbo, “Kena e Caesar yirɛ wru e Caesar ŋga, e nyjɛ yi pe Nyiɛkpɔɔ wee yire wru e Nyiɛkpɔɔ ŋga.”
26 Kee ŋga wra yo kre ndra na, pe nsra ja mbe u yii leele pre nu. U kee kre nyu wra wɔ kre na pe pe kawako, a pra pieri komm.
Kunnyiɛ Kawiere
27 A Sadducee leele mblɛ praa yuu na kunnyiɛ n wa pre na pan mna Yesu wie mbo,
Luke 20:27-47
28 “Nyinafun, Moses na nyunɔ mu o ŋga na, na ki pan na ndro ku mu u chɔ ti, na wre na chlɔ wre n se kre, kena ki fna mbe u chunu, ndee u nyjɔ lekuchɔ wre wru mbe leŋge, mbe biile se mbe gboo wre ŋga.
29 Nyjila ka nu nyjɔɔlɔ na chinlɛ kɔɔnashin plɛ naa wa. Jlewo wre na leŋge, u nsra se mna ku,
30 a shiinwo wre na u chɔ wre wru mna leŋge. Wre chɔɔ nsra se u na, mna ku mu u ti.
31 A taarɛwo wre na u wru. Pe kro kɔɔnashin pre nsra se chlɔ wre na, mna ku mu u ti.
32 Pe kumu kɔkro kre, chlɔ wre na ku na.
33 Kena kunnyiɛ kɔkro kre, pe ŋmbihaa chɔ wi chlɔ wre hin? Na pe kro kɔɔnashin pre u leŋge mu fni.”
34 A Yesu na kna mna yo pe pan mbo, “Aŋga leele mblɛ, pre pe leŋgei,
35 la, mblɛ pie yiri kunnyiɛ kɔkro, a pe fna mbe sɛ tni waŋgra ŋga kie pan kre nu pre, pia leŋge.
36 Ŋgi na hin? Kumu n wa wa na. Pe ku mu nyi, mu pe Nyiɛkpɔɔ biile. A pan pie pe na nyjeeri bitumblɔ lɛ.
37 Moses na nyina na kunnyiɛɛ wa yɛŋgɛ. U nyaa shɔɔ lawee kre nu kre, wra o Tafun Nyiɛkpɔɔ wre yeeri, Abraham Nyiɛkpɔɔ, na Isaac Nyiɛkpɔɔ, na Jacob Nyiɛkpɔɔ.b
38 Kee ŋga nyina kama na, gboolo Nyiɛkpɔɔ ma, la, ŋmaafɛɛnlɛ Nyiɛkpɔɔ wi. Ŋgi na hin? Nyiɛkpɔɔ pan kre, pe kro ŋmaa ni.”
39 A mbra nyinafɛɛnlɛ pre plɛ na kna mbo, “Nyinafun, mu kee kre nyu wɔ chichie.”
40 Kra tia pe nsra sro mu u wie kala ka na.
David Nana Na David Tafun
41 Yesu na kna mna pe wie mbo, “Ŋgi ki tia, a pra yuu na Kristo wre, David nana wi hin?
42 Na David wre titi na ki yo mɛɛ hlɛ kre nu mbo,
‘Ni Tafun Nyiɛkpɔɔ wre na yo ni Tafun wre pan na,
tni ni kalie,
43 mu sɛ su ŋga ble mbe mu loŋgoolo le mu jeelee jaara.’c
44 David wre titi na u yeeri Tafun, kena mni u pe mu kɔ mu pe u nana hin?”
Yesu Mbra Nyinafɛɛnlɛ Pre Jaari
45 Ŋga lenɛɛrɛ pre naa u kee yire ndru kre, wra kna mu yo u twanfɛɛnlɛ pre pan mbo,
46 “E eyɛ dɔɔta mbra nyinafɛɛnlɛ pre haa. Pre pe dodonyi titnɔnyi lee chaa, na lete shaaraa chaa, a tnihɛɛ chichiele nu pe jiin fninyinyi nu. A na pe sɛ fninlihaa, kpɔɔmu lawee pe chaa.
47 Pre pe lekuchiɛlɛ yirɛ shio pe pan. A pre pe yire lete na na nyiɛtali titnɔŋɔ mbe leele pe nya. Pe sisam fɔtɔɔrɔ we kpɔɔ.”