Yesu Kɛkuo Tra Wuuble
3
Ki ble ka, Yesu na sɛ blɔ wa da Judae fninyuŋgo wa, na u kɛ nunu ku.
2 Ŋga ki ble kre na pe Judae pre wuuble kre ndra na, praa Yesu le na we yaŋu wre tra Wuuble kre nu, mbe kala ta pe pan.
3 Bawa Yesu na yo yaŋu wre pan mbo, “Yili mu pan mu yire lalaa mna.” A wra yili mu pan.
4 A Yesu na kna mu leele pre wie mbo, “Kena ki fna mbe lewo chichie pe Wuuble, ndee sisaa ki fna u pe hin? Ki fna mbe mu lewo ŋmaa shɔ, ndee ki fna mbe mu u kla hin?” Kee ŋga Yesu na pe wie kre, pe nsra ja mna ki nyu wɔ.
5 A Yesu krɔ na kun, a wra pe le komm, pe ndikana kre ndra na. Bawa wra kna mu yo yaŋu wre pan mbo, “Mu kɛ kre tini!” A wra ki tini, a kra ndru mna pe na ki fa yi.
6 Ŋga Pharisee leele pre na kee ŋga Yesu na pe kre nya kre, a pra yili, a pre na Herod leele pre na sɛ bɔɔnri, kolo ŋga na pie tro mbe Yesu ta mbe gbo.
Yambla Tataara Faŋga Ta
7 Yesu na u twanfɛɛnlɛ pre na ndru mu sɛ epo nyu na, a leele tataara na yiri Judea tra nu, mna u kɔŋgɔ ni wa.
8 Ŋga pra kee nyjɛ wraa pini yire loo kre, leele tataara na yili Jerusalem, na Idumea, na Jordan lɔɔ kre kro, na Tyre, na Sidon lawee yire kro nu, mna pan u lawee.
9 Imi na leele pre na nɛɛ mu wɛ u na kre, a wra kna mu yo u twanfɛɛnlɛ pre pan na pe krɔ cha u pan, mbe u le mbe yire ki nu. Na kre ma, pie u ŋunɔ mbe chan.
10 Imi Yesu na yambla trai kre, kra tia yambla tataara naa peyɛ ŋunɔ, mbe da u na titi, mbe u kɛ taa pe na.
11 Na ŋumufuɛn pre Yesu nya, mbe pra tuuri u yiɛ, mbra gblee leni, mbra yuu Yesu pan mbo, “Ŋu wi Nyiɛkpɔɔ Biblɔ wre.”
12 A Yesu na ŋumufuɛn yire tɔ kolo na yaashia u kpali mbe leele loo.
Twanfɛɛnlɛ Kɛmbɔshiin Pre Wɔhaa
13 Ki ble ka Yesu na sɛ nyua lawee ka nu. Bawa wra lenɛɛrɛ pre mblɛ u chaa yeeri, a pra pan u jaara.
14 A wra pe kɛmbɔshiin wɔ mna pe pe u bitumblɔ, mbe pe tni u jaara, mbe wraa pe tuni, mbe praa shie mbra Nyiɛkpɔɔ kee kre yuu.
15 Wre we pe ŋga jaŋga mbe pe tɛɛ mbra ŋumufuɛn woni leele nu.
16 Leele kɛmbɔshiin mblɛ wra wɔ pre mɛɛ yi kre,
Simon, a wra u ŋga Peter mu ya,
17 na Zebedee pɔ James,
na u chunu, John, mna pe mɛɛ tɛɛ Boanerges. Ki nyina na nyiɛtwanraa biile.
18 Na Andrew,
na Philip,
na Bartholomew,
na Matthew,
na Thomas,
na Alphaeus pɔ James,
na Thaddaeus,
na Simon, ŋmba wraa kee yii mbe ki wa wre, a wra yiri Canaan na wre,
19 na Judas Iscariot, ŋmba wra kɔ mu Yesu wɔ mu ŋga wre.
Yesu Sele Leele
20 Ŋga Yesu na ndru mna pan katoo kre, leele pre na ndru mna pan mu katoo kre nyi, hali Yesu na u twanfɛɛnlɛ pre nsra kolo ta kuraa mbe tni mbe yaka ka.
21 Ŋga Yesu sele leele na u kee loo kre, a pra pan mbe u wru mbe sɛ katoo. Ŋgi na hin? na leele yuu na u chaa tɔɔlɔ.
Yesu Nyina Na Yiɛnyumu Kee Ma U Pini
22 A Judae nyinafɛɛnlɛ mblɛ pra yiri Jerusalem na mu pan wa pre naa yuu na Beelzebub, Sutna ŋumufuɛn ŋunu wre uu wa u nu. Wre na u yire mu ja na tiprɛm ŋumu woni leele nu.
23 Ŋga Yesu na ki loo kre, wra leele pre yeeri mna pan u jaara, mna paara mu pe nyina yomɛɛlɛ nu mbo, “Mni Sutna we pe mbe ja mbe Sutna ni hin?
24 A na waŋgra ka kiyɛ yɔɔlɛ na wii na kiyɛ ni kre, kre waŋgra kre wa jaa yire.
25 A na katoo ka leele nyu n nunu, a pe peyɛ yɔɔlɛ mu kɔ, kre katoo kre wa jaa yire mbe pe katoo chiriri.
26 A na Sutna yiri mu na wii na uyɛ ni, wa yirehaa ta. Kena u faŋga nyu kɔhaa yi.
27 A lewo wa n wa mbe jaa sɛ le faŋgafun katoo mbe sɛ u yirɛ koli, fɔna we klu mbe faŋgafun wre yii mbe u pɔ tun. Kre we chin jaa u yirɛ koli.”
28 Bawa Yesu na ndru mu yo pe pan mbo, “Kpra na ni yuu e pan, na Nyiɛkpɔɔ we lewo sisam ŋga we pe kpan, na jiɛnlɛ kee ŋga we yo mbe u taan kro ti mbe ufun kɛ,
29 la, ŋmba we jiɛnlɛ kee yo mbe Kpra Ŋumu wre taan kre rɛ, wa ufun sisam ti mbe u kɛ fio, a we u sisam kre pimi li Nyiɛkpɔɔ yiɛ nyjila kro nu.”
30 Judae pre na yo na ŋumufɔɔn ni Yesu tnumu tuni kre ndra na Yesu na yila mna yo pe pan ma.
Yesu Sele Titi
31 Yesu lo, na u chinlɛ na pan na u chaa, a pra yire fimi na, mna ndro tun u pan na pe u yeeri.
32 Kre nyjila kre na leelee wa mu tni mu fɛ mu u kun, a pra yo Yesu pan mbo, “Mu lo, na mu chinlɛɛ wa mu yire fimi na na mu chaa.”
33 A Yesu na kna mu leele pre wie mbo, “Mblɛ lɛ ni lo, na ni chinlɛ hin?”
34 Mna kna mu leele mblɛ pe tni mu u fɛ mu kun kre le, mna yo pe pan mbo, “E le, ni lo, na ni chinlɛ lɛ ni jaara kre.”
35 A wra ndru mu kna mu yo pe pan mbo, “Ndro ŋmba u kee ŋga Nyiɛkpɔɔ chaa pini kre, wre wi ni chunu, na ni jaa, na ni lo.”