Yesu Fna Wa Tra
2
Kie pe ble chiɛri yɛ kɔkro kre, Yesu na ndru mu sɛ Capernaum na. Ŋga wra le wa kre, lenɛɛrɛ na u kee loo na u ndru mu pan katoo.
2 Titɛɛ kre nu, katoo ŋga nu Yesu na nyi kre na nyi leele bribri, hali lawee nsraa wa jlonwee nyu na mbe ndro tro mbe le. A Yesu naa Nyiɛkpɔɔ kee kre yuu pe pan.
3 Bawa leele jijirɛ plɛ na fna wa tio u dɛŋglɛ ni mnaa paan Yesu pan.
4 Imi na leele pre na nɛɛ kre ndra na, pe nsraa kolo taa mbe da Yesu na. Kra tia pra nduu nyjeeri mna lahoo ŋga kra Yesu tɔ kre tuu mu vru, mna yaŋu wre tre na u dɛŋglɛ ni mu tɛɛ Yesu yiɛ tata.
5 Imi na Yesu na leele pre shɔnlie nya na ki kpɔɔ kre, ki tia wra kna mu yo yaŋu wre pan mbo, “Ni biblɔ, mu sisam kro laa mu na.”
6 Ŋga Yesu naa paara kre, na nyinafɛɛnlɛ pre plɛɛ wa mu tni wa. A pra kna na yuu pe jawala nu mbo,
7 “Mni a blɔ ŋmba na paara ma ŋga hin? U jiɛnlɛ kee yuu. Na Nyiɛkpɔɔ chiin bɔkɔ, ŋmbi we jaa sisam tii kɛ hin?”
8 Titɛɛ kre nu, Yesu na pe jawala nya, mna kna mu yo pe pan mbo, “Mni a kala ŋga ni yo ŋga na e tɔɔra ma hin?”
9 Mbo, “Kee shiin nyjɛ ŋgi haa yoo ki sheli hin? Ŋga mu yo fna pan na mu sisam kro laa mu na, ndee yiri mu mu dɛŋglɛ wru mu nyaari yi hin?
10 La, imi kie pe mbe e chin na, mi Lewo Biblɔ wree wa na jaŋga ni tra mna, mbe jaa sisam ti mbe kɛ kre ndra na yi.” A wra kna mu yo fna wre pan mbo,
11 “Ni yo mu pan na, yiri mu mu dɛŋglɛ wru mu sɛ mu katoo.”
12 Titɛɛ kre nu, a blɔ wre na yiri mu u dɛŋglɛ kru leele pre yiɛ na wa, mna sɛ. Kra leele pre kro pe kawako ni, a praa Nyiɛkpɔɔ kaan mɛɛ mbo, “O n da mu kala ŋga ŋmbrɔ nya tun!”
Levi Yeerihaa
13 A Yesu na yili wa, mna ndru mu sɛ epo kre nyu na wa na. Bawa lenɛɛrɛ na u fɛ mu kun, a wraa pe nyina Nyiɛkpɔɔ kee kre.
14 Ŋga Yesu naa nyaari na tro epo kre mbɛɛ na wa kre, wra Alphaeus pɔ Levi wre nya, na uu wa mu tni u tɔɔ shɔ nyuŋgo. A Yesu na kna mu yo u pan mbo, “Yiri mu taa ni kro.” A Levi na yiri mu taa Yesu kro.
15 Ki ble kre blee, Levi na sro pe kama, mna u wolo tɔɔ shɔfɛɛnlɛ pre plɛ, na sisampefɛɛnlɛ mblɛ praa wa wa pre plɛ yeeri, a pe kro na sɛ chaa mu li, na Yesu na u twanfɛɛnlɛ pre ni kro. Kre nyjila kre, na tɔɔ shɔfɛɛnlɛ na sisampefɛɛnlɛ pre plɛɛ wa tataara mu taa Yesu kro.
16 Ŋga Pharisee leele nyinafɛɛnlɛ pre plɛ na Yesu nya na wre na sisam pefɛɛnlɛ, na tɔɔ shɔfɛɛnlɛ pre lii kre, a pra kna mna u twanfɛɛnlɛ pre wie mbo, “Yira ŋgi ki tia Yesu na leele mblɛ chaa na lii hin?”
17 Ŋga pra wie ma kre, Yesu na ki loo, mna kna mu yo pe pan mbo, “Lewo ŋmba u yaa wre u fna mbe sɛ yambla trafun pan. La, ŋmba u n na yaa wre n fna mbe sɛ yambla trafun pan.” A Yesu na kna mbo, “Ni n pan leele mblɛ pe fraka pan, na pe pe jawala chinɛ, la, sisaapefɛɛnlɛ ndra na ni yila mu pan.”
Blefuun Kee
18 Ki ble ka John twanfɛɛnlɛ pre na Pharisee leele pre naa ble funi, imi praa ki pini wa kre, a leele plɛ na pan mu Yesu wie mbo, “Ŋgi ki tia John twanfɛɛnlɛ pre na Pharisee leele pre na ble funi, a wre Yesu twanfɛɛnlɛ pre n na ble fun hin?”
19 A Yesu na kna mu yo pe pan mbo, “Kena nyjila ŋga nu bijɔ plɔ wree wa kre, ki fna mbe u nɔɔlɔ pre na ble funi ra? Nyjila ŋga nu bijɔ plɔ wre na u nɔɔlɔ pree wa kre, pe yiɛ wa je mbe pra ble funi.
20 La, nyjila ka paan, mbe pe bijɔ plɔ wre wru pe jaara mbe sɛ. Kre nyjila kre pie u cha mbe la, mbe fooro pe yii, mbe praa ble funi mbra u sɔɔnri.
21 Lewo wa n wa mbe yoŋgo fɔŋgɔ tɛɛ mbe yoŋgo lɛɛ ŋga ki wali tɔ. Na kre ma, fɔŋgɔ kre we suuru mbe lɛɛ kre tini mbe wali kpɔɔ mbe wɛ ki jle kre na.
22 A lewo wa n wa mbe sifiŋge fɔŋgɔ le yurɔ hlɛ gbolo lɛɛ nu. Na kre ma, sifiŋge kre we kan mbe gbolo kre wali, mbe sifiŋge kre wo. Ki fna mbe pe sifiŋge fɔŋgɔ le gbolo fɔŋgɔ nu.” (Fawolo pre naa sifiŋge leni yurɔ hlɛ gbolo nu.)
Judae Wuuble
23 Wuuble ka nu Yesu na u twanfɛɛnlɛ pre na sɛ tro shɔlɔ see ka nu. Ŋga praa tro see kre nu kre, u twanfɛɛnlɛ pre naa yi sɛnyi yire yɛ mbru na kaa.
24 Ŋga Pharisee leele pre na pe nya kre, a pra kna mu Yesu wie mbo, “Yira ŋgi ki tia mu twanfɛɛnlɛ mblɛ na kala ŋga ki n fna pe pe Wuuble pini ŋga hin?”
25 A Yesu na kna mu yo pe pan mbo, “E n da mu tɔɔnri mu loo kala ŋga David na pe, nyjila ŋga kra sheli mu u le, na klo wre na u wolo pre ta,
26 imi na wra sɛ le Nyiɛkpɔɔ nyuŋgo, na kre nyjila kre na Abiathar wi srawɔfun lopom. A wra sɛ paanu cheche nyjɛ praa teeri Nyiɛkpɔɔ yiɛ yire wru mu ka, mna u wolo pre ŋga yɛ a pra ka.” A na ki n fna mbe lewaa yire paanu yire ka ka, fɔna srawɔfɛɛnlɛ chiin bɔkɔ.
27 A Yesu na ndru mu yo pe pan mbo, “Ni chaa mbe e chin na lewo na pra yila mna Wuuble kre le. Wuuble kre na ma Nyiɛkpɔɔ na yila mu lewo gbeele.
28 Kre ndra na, mi Lewo Biblɔ wre, nii wa na jaŋga ni Wuuble kre na.”