Fna Wa Tra Haa
9
A Yesu na sɛ le krɔ kre nu mna tapla kre kun mna sɛ wre titi chia.
2 Ŋga wra le wa kre to, leele plɛ na pan na fna wa ni u pan, na u fuuru mu sni dɛŋglɛ na. Ŋga Yesu na leele pre shɔnlie nya ma kre, a wra kna mna yo fna wre pan mbo, “Ni pɔ, muyɛ gbun yii, ni mu sisam ti mu mu kɛ.”
3 Ŋga Yesu na yo ma kre, na Judae mbra nyinafɛɛnlɛ pre plɛɛ wa mu yire wa, a pra kna na yuu peyɛ pan mbo, “Jiɛnlɛ kee blɔ ŋmba yuu kre.”
4 A Yesu na pe jawala chin mna kna mu yo pe pan mbo, “Mni a e na sisam kee jawa ma hin?
5 Ŋga mbe yo na ni mu sisam ti mu mu kɛ yoo kii nyaanyaa ree, ŋga mbe yo na yiri mu mu dɛŋglɛ wru mu nyaari yi hin?
6 La, ŋga ni chaa mbe e chin yi na, Lewo Biblɔ wree wa na jaŋga ni tra mna na mbe sisam ti mbe kɛ.” A Yesu na kna mna yo yaŋu wre pan mbo, “Yiri, mu mu dɛŋglɛ wru mu sɛ katoo.”
7 A yaŋu wre na taan mu yiri mna sɛ u katoo.
8 Ŋga lenɛɛrɛ pre na kee kre nya ma kre, fiɛrɛ na pe yii, a praa Nyiɛkpɔɔ kaan mɛɛ, na u lewo ŋga kre jaŋga ŋga sembremu.
Matthew Yeerihaa
9 Blɔ wa naa wa praa u yeeri Matthew, a wra pe tɔɔshɔfun. Ŋga Yesu na yiri wa na shie kre, wra u nya na u wa mu tni u tɔɔ shɔ nyuŋgo. A Yesu na kna mu yo u pan mbo, “Yiri mu taa ni kro.” A Matthew na yiri mu taa u kro.
10 A Yesu na sɛ Matthew katoo. Ŋga pra sɛ na lii kre, tɔɔshɔfɛɛnlɛ tataara, na sisampefɛɛnlɛ na pan, a pre na Yesu na u twanfɛɛnlɛ pre na chaa na lii.
11 Ŋga Pharisee leele pre na pe nya ma kre, pra u twanfɛɛnlɛ pre wie mbo, “Ŋgi ki tia e nyinafun wre, na tɔɔshɔfɛɛnlɛ, na sisampefɛɛnlɛ chaa na lii ŋga hin?”
12 Ŋga pra kre kee ŋga wie ma kre, Yesu na ki loo, mna kna mu yo pe pan mbo, “Leele mblɛ pe n na yaa pre n shian mbe sɛ dɔkita, fɔna mblɛ pe yaa pre.
13 Kena e sɛ kee ŋga nɔɔ tuan, na ni n na srawɔɔ chaa, la, fooro chiɛn ni chaa.a Ni n pan mblɛ pe fraka pan, la, sisampefɛɛnlɛ pan ni pan.”
Blefuun
14 Bawa John, ndrajefun wre kotɔmblɔ na pan mna Yesu wie mbo, “Ŋgi ki tia wre na Pharisee leele pre na blefuni, a mu twanfɛɛnlɛ pre na ble fun ŋga hin?”
15 A Yesu na kna mna pe wie mbo, “Nyjila ŋga ni bijɔplɔ wree wa kre, ki fna mbe bijɔplɔ wre nɔɔlɔ na fooro lii ra? Pan ma ki fna, la, ble kaa wa na paan, mbe pe paan bijɔplɔ wre wru pe jaara, kre nyjila kre ki fna pe ble fun.
16 Ndro n wa mbe yoŋgo fɔŋgɔ kɔɔn wru mbe yoŋgo lɛɛ ŋga ki wali tɔ. Na ki pe ma kre, kie lɛɛ kre tini mbe foli, mbe ki wali haa kre kpɔɔ mbe ya.
17 A lewo wa n wa mbe sifiŋge fɔŋgɔ le yurɔ hlɛ gbolo lɛɛ nu. Na ki pe ma kre, sifiŋge kre we kan mbe gbolo kre wali, mbe sifiŋge kre wo. (Fawolo pre naa sifiŋge leni yurɔ hlɛ gbolo nu). Kena sifiŋge fɔŋgɔ fna yurɔ hlɛ gbolo fɔŋgɔ nu.”
Jairus Pɔ Bichable
18 Ŋga Yesu naa wa mu yire na leele pre nyina yire kee nyjɛ kre, Judae ŋulo pre wa na pan mna kosie kan u yiɛ mbo, “Fuŋgaami ni pɔ bichable ku, kena jande, pan mu kɛ taa u na mbe u ŋmaa ta ni pan.”
19 A Yesu na u bitumblɔ pre na yiri mna taa blɔ wre kro a pra sɛ.
Chlɔ Wa Tra Haa
20 Bawa chlɔ wa, na nyimi woni u pan yɛlɛ kɛmbɔshiin, a wra Yesu nya mna fɛ mu taa u kro.
21 Chlɔ wre na klu mu yo u ndra mbo, “Na ni kɛ taa u dodoŋgi nyu na kuraa kre mbe saanla.”
22 Ŋga wra kɛ taa Yesu dodoŋgi kre nyu na kre to, a Yesu na kna mu chlɔ wre nya, mna kna mu yo u pan mbo, “Ni pɔ, mu yɛ gbun yii, mu shɔnlie tia mu saanla.” Titɛɛ kre nu wa to, a chlɔ wre na saanla.
Jairus Pɔ Bichable Na Nyi
23 Ŋga Yesu na sɛ le ŋunu wre katoo kre, wra nya na pe yoo, na nyɛni, na gble leni na pɔ wre kumu pini,
24 a wra kna mna yo pe pan mbo, “E kro e yili fimi na. Bichable wre n ku, sni u sni.” A leele pre kro na kna poŋgo na Yesu le, na u tɛɛ.
25 Ŋga leele pre na yili fimi na kre, a Yesu na le nyuŋgo ŋga nu bichable wre na nyi kre nu, mna sɛ u kɛ yii, a bichable wre na yiri mu tni.
26 Kee ŋga Yesu na pe kre na kpali bawa tra kre nu kro.
Fuunlo Shiin Plɛ Tra Haa
27 Ŋga Yesu na yiri wa na shie kre, fuunlo shiin plɛ na taa u kro, na gble leni badaaŋga mbo, “O fooro le ɛ, David nana.”
28 Ŋga Yesu na sɛ le katoo kre, fuunlo pre na sɛ u pan wa, a Yesu na pe wie mbo, “E shɔnli na mbe jaa kee ŋga e wie ŋga pee?”
A pra kna mbo, “Ɛnhɛɛn, o Tafun.”
29 A Yesu na kɛ taa taa pe nyiɛlɛ na, mna yo pe pan mbo, “Imi na e shɔnlie nyi kre, ki pe ma mbe e ŋga.”
30 Titɛɛ kre nu, a pe nyiɛlɛ yire na nyaa nyaa. A Yesu na pe jaari mbo, “Yaashia sɛ ki yo ndro pan.”
31 La, ŋga pra yili wa mnaa shie kre, praa kee kre yuu na shie, kra tia kra kpali tra kre nu kro.
Tɔɔlɔfun Kpo Wa Tra Haa
32 Ŋga fuunlo pre na yili na shie kre, leele plɛ na pan na kpo wa ni Yesu pan, na ŋumufɔɔn wa u nu, kra tia u nsra ja na paara.
33 Ŋga Yesu na tia ŋumufɔɔn kre na yili u nu kre, a wra paara, a kra lenɛɛrɛ pre praa wa wa pre kro pe kawako ni, a praa yuu mbo, “O n da mu kee ŋga nyini nya Israel tra nu tun.”
34 La, Pharisee leele pre naa yuu mbo, “Ŋumufuɛn ŋunu wre, wre u u ŋga jaŋga, a u ja na ŋumufuɛn woni leele nu.”
Fooro Chiɛn
35 Yesu na yili wa mna sɛ na kila chiɛ nyjɛ yiraa wa bawa lawee yire nu, na leele nyina Nyiɛkpɔɔ ŋunumu ketaan kre pe fninyinyi nu, na yira nyininyini trai.
36 Ŋga Yesu na kna mu lenɛɛrɛ pre pra taa u na pre nya ma kre, fooro na u yii. Ŋgi na hin? Pe keshiɛn na nɛɛ, a ndro nsraa wa mbe ya pe na. Pan pra nyi na mbaala mblɛ pe n lefɛɛnlɛ ni lɛ.
37 A wra kna mna yo u twanfɛɛnlɛ pre pan mbo, “Yirɛ kun nyjila kre da. Tnumu kre kpɔɔ, a kunfɛɛnlɛ pre fiɛn.
38 Kena e nyiɛtali mbe yirɛ Tafun wre tnumutunfɛɛnlɛ tun, mbe pe paan u yirɛ yire kun.”