3 Wre blɔ wre, gboolo dnɛ weele nu wraa sni na tro, a pra u pɔ gbee tataara mu pra, hali jlɔnyi kuraa nsra ja mbe u pɔ.

4 Nyjila ŋga nu pie sɛɛrɛ, na jlɔnyi le u kɛnyi na u jeelee na kpan, mbe u yi pile mbe wo, hali kre faŋgafun nsraa wa mbe jaa u yii.

5 Kena nyjila kro nu, lafo na blee, gboolo dnɛweele, na nyuɛ ndrɛ na wraa kila na tro, na julo na uyɛ knumu na dnɛ ni.

6 Ŋga blɔ wre na klu mna Yesu nya haalee kre, a wra fɛ mna pan mu kosie kan u yiɛ.

7 Mna paara kpɔɔ Yesu pan mbo, “Ŋu Yesu, nyjeeri Nyiɛkpɔɔ Biblɔ wre, kala ŋgi ni mi na ŋu nyi hin? Le Nyiɛkpɔɔ na, mbe ma ni fiŋge.”

8 Ŋgi na hin? Kre nyjila kre na Yesu yo u pan mbo, “Ŋu ŋumufɔɔn, yili u nu mu sɛ!”

9 A Yesu na kna mna u wie u mɛɛ, a wra kna mbo, “Ni mɛɛ Nɛɛmu. Ŋgi na hin? O nɛɛ.”

10 A wra Yesu tali chiin na waa shia pe ni mbe yili tra kre nu.

11 Kre nyjila kre, na prakoe plɛɛ wa nyua kre mbɛɛ na wa na kaa.

12 A ŋumufuɛn pre na Yesu tali na, “O ni mbe o sɛ le prakoe mblɛ nu.”

13 A Yesu na pe ŋga kolo, a ŋumufuɛn pre na yili mna sɛ le prakoe pre nu. Ŋga kra pan ma kre prakoe pre kro na mɔŋɔ mna tii landɛɛ kre nu, mna sɛ to epo kre nu, na pie pe prakoe kagbenyi shiin, a epo kre na pe kro li.

14 Ŋga kra pan ma kre, leele mblɛ praa prakoe pre le pre na fɛ mna sɛ kee kre yo chia lam, na kabɛɛlɛ nyjɛ yiraa wa wa yire na. A leele na yili mbe sɛ kala ŋga ki pan kre le.

15 Ŋga pra pan mna da Yesu lawee wa kre, pra nya na blɔ ŋmba nu ŋumufɔɔn na nyi, a praa u yeeri Nɛɛmu kre, na u yiɛ to, a u yirɛ le uyɛ na mu tni, a kra fiɛrɛ wo pe na.

16 Leele mblɛ pra kee ŋga Yesu na pe blɔ wre na, na ŋga kra pe prakoe pre na nya pre, naa ki yuu leele pan na tro.

17 Ŋga lenɛɛrɛ pre na kee kre loo kre, a praa Yesu tali na u yili pe pan tra kre nu mbe sɛ.

18 Ŋga Yesu naa lee krɔ nu mbe sɛ kre, blɔ ŋmba nu ŋumufuɛn na nyi, a u yiɛ na to wre na Yesu tali mbe taa u kro.

19 A Yesu na je, mna kna mu yo u pan mbo, “Sɛ katoo mu sɛ yo mu leele pan, kala ŋga mu Tafun wre pe mu mu ŋga, na mu fooro ŋga u chin.”

20 A blɔ wre na sɛ mnaa kee nyjɛ Yesu na pe mu u ŋga kre yuu na tro Decapolis chiɛ kɛ yire na, a kra lenɛɛrɛ pe kawako ni.

21 Ŋga Yesu na ndru mu kun krɔ ni mu sɛ epo kre kro kre, lenɛɛrɛ na pan mna u fɛ mu kun epo kre nyu na.

22 Judae fninyuŋgo loplombo pre wa, praa u yeeri Jairus, na pan wa. Ŋga wra Yesu nya kre, a wra sɛ kosie kan u yiɛ,

23 mna u tali mbo, “Ni pɔ bichable, u chaa ku, kena jande, pan mu kɛ taa u na, mbe u faŋga ta, mbe ŋmaa ta ni pan.”

24 A Yesu na blɔ wre naa shie u katoo.

25 Bawa chlɔ wa, na nyimi woni u pan suwi, yɛlɛ kɛmbɔshiin na yi n na kuun.

26 Wra kala nya titi tuwe lefɛɛnlɛ tataara kɛɛ, mna u swa na u wejiyirɛ kro tɛɛ mu tuweele le mu pra, na fuŋga ki taa mu sheli.

27 Wra Yesu kee loo mna pan mu chaa lenɛɛrɛ pre nu Yesu kro, mna sɛ kɛ taa Yesu dodoŋgi na.

28 Mbo, “Na ni kɛ taa u dodoŋgi chiin na kuraa kre, mbe saanla.”

29 Titɛɛ kre nu to, a nyimi yire na kun, a wra chin u wejiŋge nu na u saanla.

30 Ŋga chlɔ wre na kɛ taa Yesu dodoŋgi kre na kre, Yesu na chin titɛɛ kre nu na faŋga ka yili u nu, a wra viŋge mu kna lenɛɛrɛ pre nu mu pe wie mbo, “Ŋmbi u kɛ taa ni dodoŋgi na ŋga hin?”

31 A u twanfɛɛnlɛ pre na kna mu yo u pan mbo, “Ŋu titi nya imi leele mblɛ wɛ mu na, a mu tuwi na wie na ŋmbi u gbun mu na hin?”

32 Yesu na yiɛ wa mbe le na we ndro ŋmba u kee kre pe wre nya.

33 Ŋga chlɔ wre na chin kee ŋga ki pe u nu kre ndra na, wra fiɛrɛ na seeri wru mna pan mu kosie kan Yesu yiɛ, mna kee kre kpra yo u pan.

34 A Yesu na kna mu yo u pan mbo, “Ni pɔ, mu shɔnlie tia mu saanla. Sɛ na wejinyiŋge ni. Mu yira kre laa mu na, mbe wejiŋge nyjii mu na.”

35 Ŋga wraa wa na paara kre to, a leele na yiri Judae fninyuŋgo lopom wre katoo mna pan mu yo u pan mbo, “Mu pɔ bichable wre ku. Mni a mu kro na nyinafun wre hau na hin?”

36 Yesu nsra taa pe wo kre na, a wra kna mu yo Judae fninyuŋgo lopom wre pan mbo, “Maa fiɛ, la, shɔnlie ta rɛ.”

37 Bawa Yesu na tia leele pre na laa u kro, a kra kro wre na Peter, na James, na John James chunu wre chiin.

38 Ŋga pra da Judae fninyuŋgo lopom wre katoo wa kre, wra leele tataara nya katoo wa, pra gble na nyɛni, a katoo kre wɛɛri poŋgo.

39 Ŋga wra le katoo wa kre, a wra yo leele pre pan mbo, “Mni a e na gble, na nyɛni imi hin? Pɔ wre n ku. Sni u sni na ŋunu.”

40 A pra laa mu to na Yesu tɛɛ.

41 A Yesu na bichable wre kɛ yii mu kna mu yo u pan mbo, “Talitha koum.” Ki nyina na, “Bichable, ni yo mu pan na yiri.”

42 Titɛɛ kre nu, a bichable wre na yiri na nyaari. Kre nyjila kre na pɔ wre li yɛlɛ kɛmbɔshiin. Kra mblɛ praa wa wa pre kro pe kawako ni.

43 A Yesu na kna mu pe jaari, na piashia ti ndro ki loo, la, pe yaka cha mbe pɔ wre ŋga mbe u ka.