2 Yaka n wa a pe ki tɔ, a pia kɔɔ ki nyaa, ndee mu ndra, a pia kɔɔ ki wɔ fimi na.

3 Kee nyjɛ ee yire ndram wɔmu nu mbe yo kre, na ndram saan pie yi loo. A nyjɛ ee ju mbe yo nyinyi nu kre, pie yire zio ndra na mbe yi kpali mbe ndro kro loo.”

4 “Ni wolo, ni yuu e pan, yaa shia mblɛ pie jaa e gbo, a pia jaa yaka pe e na e kumu kɔkro pre fiɛ.

5 La, mbe e nyina ŋmba ki fna e fiɛ. E Nyiɛkpɔɔ fiɛ. Wre we jaa e gbo, a e kumu kɔkro kre, uu wa na jaŋga ni na we sɛ na e ni kanyana lawee. Ki tia ni yuu e pan, e wre chiin fiɛ.

6 Pe n na hanyiɛlɛ bɛɛlɛ kunɔ prɛ damba kree? A nde Nyiɛkpɔɔ n pe wa fɛɛ.

7 Kena ki ŋgi na hin? Hali e ndrɛ nyjure kuraa, u yi nyu chin. Kena yaa fiɛ. E kee tnu ni mu wɛ hanyiɛlɛ tataara na.”

8 “Kena ni yuu e pan, ŋmba we yire leele yiɛ na mbe ni mɛɛ chichie yeeri kre, Lewo Biblɔ wre we ufun mɛɛ chichie yeeri Nyiɛkpɔɔ nyjeeri bitumblɔ pre yiɛ na.

9 La, ŋmba we ni je leele yiɛ na kre, mbe ufun je Nyiɛkpɔɔ nyjeeri bitumblɔ pre yiɛ na.

10 A ŋmba we kee ka yo mbe Lewo Biblɔ wre taan kre, we sisam tinkɛɛ ta, la, ŋmba we jiɛnlɛ kee ka yo mbe Kpra Ŋumu wre taan kre, wa sisam tinkɛɛ ta fio.

11 A na pe e yii mu sɛ na e ni fninyinyi nu, ndee loplombo, na jaŋgafɛɛnlɛ yiɛ kre, yaa shia na kawa kee ŋga ee yo mbe eyɛ shɔ ni.

12 Ŋgi na hin? Kpra Ŋumu wre we e nyina kee ŋga ee yo nyjila kre nu.”

13 A lenɛɛrɛ pre wa na kna mna yo Yesu pan mbo, “Nyinafun, jande, yo ni nyjɔ pan mbe u ti mbe o krɔyirɛ nyjɛ o lɛ ku mu ti o pan yire yɔ.”

14 A Yesu na kna mbo, “Awe, ŋmbi u ni tɛɛ e lalaa kpra kunfun, ndee e krɔyirɛ yɔfun hin?”

15 Mna kna mu yo leele pre kro pan mbo, “E eyɛ dɔɔta nyiɛlɛ jrawari sisaa na. Ŋgi na hin? Ki n pe lewo yirɛ nyjɛ u ta mu tro nu u ŋmaa nyi.”

16 A Yesu na pe gbun yomini ka mbo, “Swafun wa wra u see tɛɛ. See kre na nyu, a wra yirɛ ta tataara.

17 A wra yo uyɛ pan mbo, ‘Imi mbe pe kuraa ni n chin. Ni n lawee ta mbe ni sro nyjɛ kro tɛɛ.’

18 A wra kna mbo, ‘Mbe ni sro tɛɛ ndoe yire juari, mbe yi sin kpɔɛ, mbe ni sro na ni yirɛ kro tɛɛ yi nu.’

19 Na mbaa kɔ, mbe ni yo niyɛ pan na, ‘Mu ndra nyu, mu yirɛ nyjɛ yi shian ta mu tɛɛ, a yie yɛlɛ tataara li. Kena tni mna wuui, ta lii, mna kaa, mna gboo, mna muyɛ lii.’

20 A Nyiɛkpɔɔ na kna mna yo u pan mbo, ‘Jijuo, aŋga blee ŋga, pie paan mu ŋmaa shɔ mu kɛɛ. Kena yirɛ nyjɛ mu cha mu tɛɛ nyjɛ, ŋmbi wee yi hin?’”

21 A Yesu na kna mbo, “Pan lewo ŋmba u krɔyirɛ chaa na teeri uyɛ pan tra mna, a u n wa krɔyira ni nyjeeri kre nyi.”

22 A Yesu na kna mna yo u twanfɛɛnlɛ pre pan mbo, “Kena ni yo e pan na yaa na kawa na sro ŋga ee li mbe ŋmaa ta, ndee yoŋgo ŋga ee tɔ ni.

23 Ŋgi na hin? Ŋmaa kee shian mu wɛ sro na, a wejiŋge kee shian mu wɛ yoŋgo na.

24 E yiɛ wa e hanyiɛlɛ le, praa sro luu, a pra kun mbe tɛɛ, a pe n sroe tɛɛ ndoe ni, a nde Nyiɛkpɔɔ pe kaan sro. A e kee tnu ni mu wɛ hanyiɛlɛ na.

25 A e ŋmbi we jaa kawa na u ble nyjɛ we li ni, mbe jaa ka ya u ŋmaa na hin?

26 Kena na yaa jaa kre kee fiɛn ŋga ka pe waa, kena yaa tni mbra kawa na hɛnyi yire ni.

27 E yiɛ wa e lɔɔchiatoto le, imi na yi lee. A nde yira tnumu ka tun, ndee mbe yonyi tin mbe tɔ. La, e ti ni yo e pan, ŋunu Solomon na swa ta. La, yirɛ nyjɛ wra ta kro, ka n nsra nyu, mu da na yire toto nyjɛ ka ni.

28 Kena na Nyiɛkpɔɔ ja na nyaalam wrɛ toni yonyi, yire nyjɛ mu nya aŋga, baŋga na pe yi sro kre. Kena ŋgi kie ti mbe wa e tɔ hin? E shɔnliee fiɛn kpa.

29 Kena yaa na ŋga ee ka, ndee ŋga ee gbɔ chaa, mbra kawa na yi ni.

30 Ŋgi ndra na hin? Yire yirɛ nyjɛ ni waŋgra leele kawa. A e Lɛ Nyiɛkpɔɔ wre chin na yi keshian wa e na.

31 Kena e ti mbe Nyiɛkpɔɔ ŋunumu kre kee e shian, we e ŋga yire yirɛ nyjɛ kro.”

32 “E n nɛɛ, ande yaa fiɛ, ki tna Nyiɛkpɔɔ pan na we e ŋga u ŋunumu kre.

33 E yirɛ nyjɛ yii wa e pan kro prɛ, e shianfɛɛnlɛ ŋga yi swa. E swa leyirɛ nyjɛ yia jaa wla cha, e krɔ yirɛ nyjɛ yia jaa kla cha e tɛɛ nyjeeri. Bawa jio n wa mbe le mbe ju, a dumblɔ n wa wa mbe yi kla.

34 Ŋgi na hin? Lawee ŋga nu lewo krɔyira nyi kre, bawa u jawala nyi.”

35 “E grere chichie e ti mbe e kania na nyini.

36 E pe na leele mblɛ tafun u sɛ bijam lawee nu, a pra u sri lɛ. Na waa pan maa krɔ gbun to, mbe pe krɔ nyaa u pan.

37 Kena na pe tafun wre waa pan kre, mblɛ we paan da na pe u sri kre wo yi dwamu. Kpra na ni yuu e pan na, na ki pan ma kre, pe tafun wre titi we uyɛ kna, mbe ti mbe pe tni tni, mbe u pe ŋga sro mbe pe li.

38 Na waa pan ndroo, ndee lafo na kre, u sumifɛɛnlɛ mblɛ we paan da na pe u sri kre, pre wo yi dwamu.

39 La, ŋga ni chaa mbe e chin yi na, na katoofun na nyjila ŋga nu juo we pan chin kre, we na tni mbra u shie. Wa na ti mbe u paan u katoo juari mbe le.

40 Kena yire titi fna mbe eyɛ kna mbra sri. Ŋgi na hin? Lewo Biblɔ wre we pan nyjila ŋga nu e n na u kra.”

41 A Peter na kna mbo, “Ni Tafun, wre chiin pan mu yomini ŋga gbuun ree, ndro kro pan hin?”

42 A o tafun wre na kna mbo, “Kena ŋmbi u pe sumifun kprafun, na kachiŋu hin? Wre wi ŋmba u tafun we tɛɛ u katoo lefun, mbe wra katoo kre le, mbra sumifɛɛnlɛ hamblɛ pre le, mbra pe kaan sro nyjila ŋga ki fna nu.

43 Na sumifun wre tafun waa ndru maa pan mu u da, na u pini ma kre, wre wo yi dwamu.

44 Kpra na ni yuu e pan, u tafun wre we u tɛɛ u yirɛ kro nyu na.

45 La, na sumifun wre waa kna maa yo uyɛ pan mbo, ‘Ni Tafun mu titi, maa na u ŋmbilɛ bilɛ na chiɛlɛ sumifɛɛnlɛ pre gbuun, na lii na gboo na tuuri kre.’

46 U tafun wre we le mbe u fo, mbe u ndie tini, mbe sɛ u chaa ndikanafɛɛnlɛ nu.

47 Kena sumifun ŋmba u ŋga u tafun chaa chin, a u n ki pe kre, pie fwa tɛɛ mbe u ndie tini kpɔɔ.

48 La sumifun ŋmba u n ŋga u tafun chaa chin, maa ŋga ki n fna pe kre, pie u gbun fiɛn. Lewo ŋmba pe kaan yirɛ nɛɛrɛ kre, wre pan pe nɛɛrɛ wie, a na pe mu ŋga nɛɛrɛ mu wɛ chɔɔ, pan pie shɔ mu pan nɛɛrɛ.”

49 “Kanhun ni ni pan tra mna, na kra pe na ki nyini imi nyu ŋga, kaa ki tna ni pan.

50 Kanyana kpɔɔ wa ni yiɛ mbe ni nya, la, kie ni tɔɔra kpɔɔ mbe sɛ su na kie tro.

51 Yaa na jawa na wejinyiŋge ni ni pan waŋgra nu. Wejinyiŋge ni ma ni pan, la, e ti ni yo mbe e loo, ni pan mbe e lalaa yɔɔlɛ.

52 Mu yire aŋga na shie, leele kunɔ we peyɛ yɔɔlɛ sele nunu nu, mbe pe taarɛ yiri mbe shiin pra, mbe shiin pre yiri mbe taarɛ pre pra.

53 Lɛ we yiri mbe pɔ pra, mbe pɔ yiri mbe u lɛ pra. Mbe lo yiri mbe u pɔ chlɔ pra, mbe pɔ chlɔ yiri mbe u lo pra. Mbe nafun yiri mbe u nafun pra.”

54 A Yesu na kna mna yo lenɛɛrɛ pre pan mbo, “Na e tloe nya nyjeeri yira shie yila tohaa kre, e ja na yuu na, nyiɛ we pan, a nyiɛ ja na paan yɛŋgɛ.

55 A na fuflɛ waa na gbuun na yiri fimi haa na paan kre, e ja na yuu na ndram we wɛɛri, a ki ja na pini ma yɛŋgɛ.

56 Yiɛnyumufɛɛnlɛ, e ja na tra, na nyiɛ yiɛ le na kee nyjɛ yie pe chini na yuu, la, yaa jaa aŋga kaalɛɛ nyjɛ yi pini ŋga le, mbe nyjɛ yie pan nyina.”

57 “A ŋgi ki tia yire titi wa jaa ŋga ki fraka chin mbe pe ŋga hin?

58 Na mu ŋmbrɔ shie na mu ni kalalifun yiɛ kre, kolo cha mbe ŋu na wre eyɛ lalaa gbeele kolo, mbe u chiin da na mu ni kalalifun wre yiɛ na, mbe kalalifun wre waa shia mu le nyuŋgo lefɛɛnlɛ kɛɛ, mbe pre sɛ mu le nyuŋgo.

59 Ni yuu e pan, na ki pan ma kre, ma yili nyuŋgo kre nu fio, fɔna yira ŋga pie shɔ mu pan kre, mu ki tɔ kro tun.”