Chichie Pee
6
“E dɔɔta mbe yaa na chichie pini leele yiɛ na, na aada pie e nya mbe e pni. Na e chaa mbe leele na e kaan mɛɛ, e chichie nyjɛ e pini na kre, yaa fɔtɔɔrɔ ta e Lɛ ŋmba uu wa nyjeeri wre pan.
2 Kena na e wa chichie pe u ŋmbrɔ na kre, waa ki kpali mbe tro imi na yiɛnyumufɛɛnlɛ pre pini pe fninyinyi nu, na lete na kre. Pan pe pini, a leele na pe kaan mɛɛ. Kpra na ni yuu e pan na, pe fɔtɔɔrɔ ŋga pie ta kro yi.
3 Kena na e wa chichie pini u ŋmbrɔ na kre, waa ti mbe leele u nya.
4 E ti mbe e chichie pee ndra, mbe e Lɛ ŋmba u ndrandra kee chini wre e nya, mbe e ŋga ki fɔtɔɔrɔ.”
Nyiɛtalaa
5 “A na e nyiɛtali kre, yaa na pini na yiɛnyumufɛɛnlɛ pre lɛ, pre pe yiree fninyinyi nu, na lete na, mbra nyiɛtali mbe leele pe nya. Kpra na ni yuu e pan na, pe pe fɔtɔɔrɔ ta mu kɔ.
6 La, yire rɛ, na e nyiɛtali kre, e le nyuŋgo, e krɔ tɔ, e e Lɛ, ŋmba pra nya wre tali, wre u ndrandra yirɛ kro nyaa, we loo e pan, mbe e ŋga e fɔtɔɔrɔ.”
Nyiɛtalaa Na Ki Paaraa Tataara
7 “A na e nyiɛtali kre, yaa na paara mbra kewɛɛ yuu na mblɛ pe n Nyiɛkpɔɔ chin pre lɛ. Ŋgi na hin? Pe jawa na, pe paaraa tataara na Nyiɛkpɔɔ we loo pe pan.
8 Kena yaa na pini na pre lɛ. Ŋgi na hin? E Lɛ Nyiɛkpɔɔ wre chin nyjɛ yi e shian, a e chin na u tali.”
O Tafun Nyiɛtalaa
9 “Kena na e nyiɛtali kre, e na yuu na,
‘O Lɛ Nyiɛkpɔɔ ŋmba muu wa nyjeeri,
mu mɛɛ chichie ki yili.
10 Ti mbe mu ŋunumu pan,
ŋga mu chaa ki pe tra,
imi na ki pini nyjeeri kre.
11 O ŋga o ble nyini aliire aŋga.
12 Mbe mu o sisam ti mbe o kɛ,
imi na o tii na kee kre.
13 Maa sɛ na o ni nyu chaara nu,
o wɔ mu yili sisam nu.’
14 A na e leele sisam tii na pe kee kre, e Lɛ ŋmba uu wa nyjeeri wre we e sisam ti mbe e kɛ na.
15 La, na e n e ŋmbilɛ sisam ti mu pe kɛ kre, e Lɛ ŋmba uu wa nyjeeri wre, wa e sisam ti mbe e kɛ.”
Blefuun Kee
16 “A na e blefuni kre, yaa na yiɛ klai na yiɛnyumufɛɛnlɛ pre lɛ, pre pe blefuni mbe yiɛ kla, mbra chaa mbe leele chin na pe ble fun. Kpra na ni yuu e pan na, pe fɔtɔɔrɔ ŋga pie ta kro yi.
17 La, yire rɛ, na e ble fun kre, e weli, e e ndrɛ saanri.
18 Yaa ti mbe leele chin na e ble fun. La, e Lɛ ŋmba u ndrandra kee chini wre, we ki chin, mbe e ŋga fɔtɔɔrɔ.”
Nyjeeri Krɔyira
19 “A yaa na krɔyirɛ chaa mbra teeri tra mna. Ŋgi na hin? Hlemble, na dumblɔ we yi ka mbe yi kla, a juoloo wa mbe yi ju.
20 La, e na krɔyirɛ chaa nyjeeri. Ŋgi na hin? Hlemble, na dumblɔ n wa wa, a juolo n wa wa mbe yi ju.
21 A mna mu krɔyira nyi kre, bawa mu loloŋgo nyi.”
Lewo Nyini Yi U Kania
22 “Lewo wejiŋge kania yi u nyini. Na mu nyini pe chasi kre, mu wejiŋge kro we pe chasi.
23 A na mu nyini n na nyaa kre, kie ti mu tni wɔmu nu. Kena na kania ŋga kii wa mu nu fii kre, kie ti mbe wɔmu ŋga kii wa mu nu kre sna.
24 Ndro n wa mbe jaa tafɛɛnlɛ shiin sumi. We na nunu kee chaa mbe wɛ nunu wre na. Ndee mbe uyɛ wru mbe nunu ŋga mbe haŋu wre ti. A lewo wa jaa swa na Nyiɛkpɔɔ sumi.”
Jawala Tataara
25 “Kre ndra na ni yuu e pan na, yaa na kawa ŋga ee ka, ndee ŋga ee gbɔ, ndee ŋga ee tɔ ni. Kena e ŋmaa n shian mu wɛ sro na ree? Ndee e wejiŋge kee n shian mu wɛ yoŋgo na ree?
26 E yiɛ wa e hanyiɛlɛ le nyjeeri, pra fali mbe sro luu, a pra sro kun mbe tɛɛ, a nde e Lɛ ŋmba uu wa nyjeeri wre tia pra lii nyjila kro nu. Kena e kee n shian mu wɛ hanyiɛlɛ na ree?
27 A e ŋmbi we jaa tni mbra kawa, mbe ki ti u jaa ble nunu chom ya u ble na hin?
28 A mni a e na kawa na nyjɛ ee tɔ ni ma ŋga hin? E yiɛ wa e lɔɔ chia toto le lɔɔ imi na yi lee, nde yira tnumu tun, a yira yoŋgo tɔ.
29 La, ni yuu e pan na ŋunu Solomon kpɔɔmu nu kre, u nsra yaka ta mu le, a kra nyu mu da na yi ni.
30 Kena na Nyiɛkpɔɔ we ja mbe nyaa kuraa tɔ yoŋgo, kre ŋga kie fin, kia mu to na pe ki sro, kena ŋgi kie ti mbe wa e tɔ mbe wɛ nyaa na hin? E shɔnlie pe fiɛn kpa!
31 Kena yaa tni mbra kawa mbra yuu na ‘Yira ŋgi oo ka, ndee ŋgi oo gbɔ, ndee ŋgi oo tɔ hin?’ E Lɛ ŋmba uu wa nyjeeri wre chin na yire yirɛ nyjɛ krɛrɛ e shian kro.
32 Ŋgi na hin? Yire yirɛ nyjɛ leele mblɛ pe n Nyiɛkpɔɔ chin pre chaa, la, yire ma. E Lɛ ŋmba uu wa nyjeeri wre chin na yire yirɛ nyjɛ krɛrɛ e shian kro.
33 La, e klu e Nyiɛkpɔɔ ŋunumu kre, na u kprahaa cha tun, we nyjɛ yi shian kro wru mbe ya e pan.
34 Kena yaa na kawa na baŋga ni. La, e ti mbe baŋga na kawa na kiyɛ ni. Ki n shian na ee ti mbe baŋga keshian pan, mbe ya aŋga wee na.”