Luke 7

Tnu Wa Tra Haa

Ŋga Yesu na paara leele pre pan mu kɔ kre, wra sɛ Capernaum na.

Luke 7:1-10

2 Sojae lafaa lefun wa naa wa chia kre na, a u sumifun wa naa yaa mna yire kumu kɛ na. Blɔ wre naa u sumifun wre kee chaa titi.

3 Ŋga wre sojae lopom ŋmba na Yesu kee loo kre, wra Judae loplombo pre plɛ tun u pan na u paan u sumifun wre tra u pan.

4 A pra pan mna Yesu tali mbo, “Jande, wre blɔ ŋmba fna mbe mu sɛ ya u na.

5 Ŋgi na hin? U wre Judae kori, mu fninyuŋgo sin mu o ŋga.”

6 A Yesu na kna mna taa pe na, a pe kro naa shie.

Kra kro chiɛri mbe pe le lopom wre katoo, a lopom wre na u nɔɔlɔ tun Yesu pan mbo, “Ni Tafun, maa muyɛ fna, ni n fna na mu le ni katoo,

7 a ni n fna mbe da mu na. Kena yire wa mu paara, ni sumifun wre we saanla.

8 Mi chɔɔ jaŋga ka jaara ni nyi, a nii wa na sojae ni ni jaara, na ni yo wa pan na u sɛ, we sɛ, a na ni yo wa pan na u pan, we pan, a na ni yo ni sumifun pan na pe imi, we ki pe.”

9 Ŋga Yesu na blɔ wre kee kre loo kre, u kee na u pe kawako ni, a wra kna mna yo lenɛɛrɛ pre pra taa u kro pre pan mbo, “Kpra na ni yuu e pan, ni n da mu shɔnlie ŋga nyini nya tun, hali Israel leele nu.”

10 Ŋga sojae lopom wre bitumblɔ pre na ndru mu pan katoo kre, na u sumifun wre saanla.

Yesu Nain Lekuchɔ Wa Biblɔ Nyi

11 Kee nyjɛ kɔkro kre, ki nsra mu a Yesu na sɛ chia ka na praa ki yeeri Nain. U twanfɛɛnlɛ pre, na lenɛɛrɛ na taa u kro mu sɛ wa.

Luke 7:11-35

12 Ŋga pra da chia kre jlonwee nyu na kre, na blɔ wa ku praa shie u le haa, blɔ wre chiin u lo na se, a u lo wre na pe lekuchlɔ, a lenɛɛrɛ na yili mna taa chlɔ wre kro.

13 Ŋga o Tafun wre na chlɔ wre nya kre, u kee na pe u pan fooro ni, a wra kna mna yo u pan mbo, “Maa nyɛni!”

14 A Yesu na nyaari mna sɛ kɛ taa daka kre na, a leele mblɛ pra gboo wre tio kre na yire. A wra kna mna yo gboo wre pan mbo, “Nyanyjɛble, ni yo mu pan na yiri.”

15 A gboo wre na yiri mu tni, mnaa paara. A wra u wru mu le u lo kɛɛ.

16 Fiɛrɛ na leele pre kro yii. A praa Nyiɛkpɔɔ kaan mɛɛ na yuu mbo, “Nyiɛkpɔɔ kee nyanyofun kpɔɔ titi yiri o nu, a Nyiɛkpɔɔ pan u leele shɔhaa.”

17 A kee ŋga wra pe kre na kpali Judae tra kre, na tra nyjɛ yira mbra wa yire kro nu poŋgo.

John Ndrajefun Bitumblɔ Sɛ Yesu Pan

(Matthew 11:2-19)

18 Ŋga kra pan ma kre, John twanfɛɛnlɛ pre na sɛ kee nyjɛ Yesu naa pini yire krɛrɛ bɔ u pan.

19 A John na u twanfɛɛnlɛ pre shiin wɔ, mna pe tun Yesu pan na pe sɛ u wie, mbo, “Ŋu wi ŋmba u paan wre ndee o na fuŋu sri hin?”

20 Ŋga pra sɛ kre, a pra sɛ Yesu wie mbo, “John, ndrajefun wre u o tun mu pan mbo, ‘Ŋu wi ŋmba we pan wre, ndee o na fuŋu sri hin?’”

21 Kre nyjila kre nu na Yesu yambla nyininyini tra tataara, mna ŋumufuɛn wɔ plɛ nu. A wra tia lenɛɛrɛ mblɛ pra fun nyiɛlɛ na, naa nyaa.

22 A Yesu na kna mna yo John twanfɛɛnlɛ pre pan mbo, “E sɛ kee nyjɛ e loo mu nya yire yo John pan, na fuunlo nyaa, a finla yiri na nyaari, a mblɛ na yiranyiɛrɛ nyi pre saanla, a kpoolo na ndru, a gboolo na nyini, a shianfɛɛnlɛ ketaan kre ta na ndru.

23 Kena ŋmba u ni shɔnli wre wo yi dwamu.”

Yesu John Dansiɛrɛ Li

24 Ŋga John bitumblɔ pre na ndru mna sɛ kre, Yesu na John kee yo lenɛɛrɛ pre pan mbo, “Ŋga e na yili mna sɛ John pan tablɔ tra kre nu kre, ŋgi e na sɛ nya hin? Nyaa nyjɛ fuflɛ mɔŋɔi ree?

25 Kena yira ŋgi nyini pan e na sɛ wa hin? Ndro ŋmba u dodonyi chichiele le, lehaa e na sɛ ree? E le, mblɛ pe dodonyi chichiele leni, mu na peyɛ lii pe tnimu nu kre, ŋunu katoo pe nyi.

26 Kena e ni nyina nyjɛ pan e na sɛ wa. Nyiɛkpɔɔ kee nyanyofun wa lehaa e na sɛ ree? Kpra na e ti ni yo e pan, e na ŋmba wra wɛ Nyiɛkpɔɔ kee nyanyofun na nya.

27 Ŋgi na hin? Wre John ŋmba kee pra nyunɔ mu tɛɛ fa kre mbo,

‘E le, mbe ni bituŋu tun mbe u yiɛ klu mu pan.

Wre we yiɛ klu mbe sɛ kolo gbeele mu pan.’^a

28 E ti ni yo e pan, leweele nu, ndro n wa mu wɛ John ndrajefun wre na, a nde ŋmba uu fiɛn Nyiɛkpɔɔ ŋunumu kre nu wre wɛ u na.”

29 Lenɛɛrɛ pre na tɔɔshɔfɛɛnlɛ pre na Yesu kee yire nɔɔloo, na Nyiɛkpɔɔ pe kprafun, ŋgi na hin? John wra pe ndrɛ je.

30 La, Pharisee leele pre na Moses mbra twanfɛɛnlɛ pre na kee ŋga Nyiɛkpɔɔ naa chaa mbe pe pe u pan kre je, a pe nsra tia John na pe ndrɛ je.

31 A Yesu na kna mbo, “Kena leele mblɛ nyini ni kuraa ni mbe aŋga leele mblɛ wru mbe gbun hin? A yira ŋgi sembremu pe wru ŋga hin?

32 Pan pe nyi na biile mblɛ pee wa mu tni jafa lawee lɛ. Mbe plɛ kna mbe yo plɛ pan mbo,

‘O bijam mɛɛ kɔ e pan, a e je, e n yɔ.

A o kumu kpali, a e je, e n nyɛni.’

33 John ndrajefun na pan na blefuni, a u nsraa simi ka na ka gboo, a e naa yuu na ŋumufɔɔn wa u nu.

34 A Lewo Biblɔ wre pan na lii na gboo, a e na yuu na lilio, na gbɔgbɔɔ wi, a u nɔɔlɔ lɛ sisam pefɛɛnlɛ, na tɔɔshɔfɛɛnlɛ.

35 La, Nyiɛkpɔɔ kachindɛ kre, u biile pe ki chini.”

Chlɔ Sisaa Pefun Wa

36 Bawa Pharisee leele pre wa na u yeeri mbe u sɛ li u katoo. A Yesu na sɛ tni lihaa wa.

Luke 7:36-50

37 Chlɔ sisaapefun wa naa wa chia kre na, mna loo na Yesu wa na lii Pharisee wo wre katoo kre, titɛɛ kre nu, a wra sɛ na alabaster tlade gbolo ka ni,

38 mna sɛ yire Yesu kro, mna kosie kan, mna u jeelee yii, mna nyɛni, a u yotunyi na fo mna Yesu jeelee nyiŋge. A chlɔ wre na u ndra nyjuro yii mna u yotunyi yire tlu, mna Yesu jeelee shiun, mna tlade kre kna mna wo u yi na.

39 Ŋga Pharisee wo ŋmba wra sɛ na Yesu ni u katoo kre na kee ŋga nya kre, wra kna na yuu u jawala nu mbo, “Na Nyiɛkpɔɔ kee nyanyofun wi blɔ ŋmba yɛŋgɛ kaa we na ndro ŋmba nyini wi chlɔ ŋmba u kɛ taari u na ŋga chin. Ŋgi na hin? Sisaa pefun titi wi.”

40 A Yesu na kna mna yo blɔ wre pan mbo, “Simon, nii wa na kee ka ni mbe yo mu pan.”

A wra kna mbo, “Nyinafun, ki yo ni pan.”

41 A wra kna mbo, “Bilɛ shiin plɛ pra swa jinfun wa fɔlɔ li, jlewo wre na u fɔlɔ li denarii lafɛɛ kunɔ, a shiin wo wre na u fɔlɔ li denarii fuloe shiin na kɛ.

42 Ŋga swafun wre na nya na pia jaa yi tɔ kre, wra fɔɔlɛɛ yire ti mna pe kro shiin kɛ. Kena pre leele shiin mblɛ, ŋmbi we na swafun wre kee chaa kpɔɔ hin?”

43 A Simon na kna mbo, “Ni jawa na ŋmba fɔlɔ ki kpɔɔ wre wi.”

A Yesu na kna mbo, “Mu kpra yo.”

44 A Yesu na kna mna chlɔ wre le, mna yo Simon pan mbo, “Mu chlɔ ŋmba nyaa? Ŋga ni pan mu katoo, mu n ni jeelee je. La, u yotunyi tɛɛ mu ni jeelee je, mu u ndra nyjure tɛɛ mu yi tlu.

45 Mu n ni nyu shiun, a mu yire ŋga ni le katoo ŋga nu, chlɔ ŋmba n ni jeelee shiuɔn ti.

46 Mu n ni ndra fa na simi ni, la, chlɔ ŋmba ni jeelee fa na tlade ni.

47 Kre ndra na, ti mbe ni yo mbe mu loo, u koroo ŋga u nyina kre nyina na u sisam tataara nyjɛ u pe yire kro, ni yi ti mu u kɛ. Ŋmba pie ti mbe kɛ fiɛn kre, mu chin na u koroo kii fiɛn.”

48 A Yesu na kna mu yo chlɔ wre pan mbo, “Ni mu sisam ti mu mu kɛ.”

49 A mblɛ praa wa mu tni tebru na lihaa wa kre na kna na peyɛ wie mbo, “A ndro ŋmbi sembremu wi ŋmba, a wra sisam tii na kee ŋga hin?”

50 A Yesu na kna mna yo chlɔ wre pan mbo, “Mu shɔnlie mu shɔ, kena sɛ wejinyiŋge ni.”