Yesu Yɛnyiŋge
17
Ble kɔɔnanu kɔkro kre, Yesu na Peter, na James, na u chunu John pre chiin bali, a pra sɛ nyua gedeŋge ka na.
2 Bawa Yesu na sɛ chinɛ pe yiɛ na. U yiɛ naa chiɛnri na yila yi, a u dodoŋgi naa fniŋgei prupru u na.
The Transfiguration (Matthew 17:1-13)
4 A Peter na kna mna yo Yesu pan mbo, “Ni Tafun, ki nyu na oo wa mna. Na mu chaa, oo sugbɛɛ taarɛ sin e pan fuŋgaami. Mu wo nunu, Moses wo nunu, Elijah wo nunu.”
5 Ŋga Peter na paara to, a sugbeŋge ka na pan mu pe tɔ, a mana ka na yili sugbeŋge kre nu mbo, “Ŋmba wi ni Biblɔ ŋmba ni kori, a ni yiɛ shɔ u na kre. Kena e ndie tɛɛ u pan.”
6 Ŋga twanfɛɛnlɛ pre na mana kre loo ma kre, fiɛrɛ na pe yii kpɔɔ, a pra yiɛ juule tra.
7 A Yesu na pan mna kɛ taa taa pe na mna yo pe pan mbo, “E yiri, yaa fiɛ.”
8 Ŋga pra yiɛ yire kre, Yesu chiin pra nya na uu wa mu yire pe jaara.
9 Ŋga pra yiri nyua kre na na tri tra kre, Yesu na yo pe pan mbo, “Yaa shia kee ŋga e nya ŋga bɔ mbe ndro loo, fɔna mi Lewo Biblɔ wre ku mu nyi tun.”
Elijah Paan
10 Ŋga wra yo u twanfɛɛnlɛ pre pan ma kre, a pra kna mbo, “A ŋgi ki tia a Judae mbra nyinafɛɛnlɛ pre na yuu na, ki fna mbe Elijah klu mbe pan Kristo wre na hin?”
11 A Yesu na kna mbo, “Kpra kee pe yuu na Elijah we klu mbe pan mbe yirɛ kro nyu mbra, mbe ni chiin pan.
12 La, e ti ni yo e pan mbe e loo, Elijah na yiɛ klu mu pan, la, pe nsra u chin, ki tia pra nyjɛ praa chaa kro taa u na. Pan chɔɔ mi Lewo Biblɔ wre pan, mbe paan kala nya pe kɛɛ.”
13 Ŋga wra yo ma kre, a u twanfɛɛnlɛ pre na chin mu kee kre nɔɔloo, mna chin na John ndrajefun wre kee Yesu yuu.
Tonkolifun Wa Tra Haa
14 Ŋga pra tii nyua kre na mna pan lenɛɛrɛ pre lawee kre, blɔ wa na fɛ mna pan mu kosie kan Yesu yiɛ mbo,
15 “Ni Tafun, ni pɔ ŋmba fooro le. Tonkolii wa u na, mu tia wra kala nya kpɔɔ. Ki tia wra tuuri kanhun, ka nu mbe u to nyumu nu.
16 Kre ni pan na u ni mu twanfɛɛnlɛ pre pan, a pe n ja mu u tra.”
17 A Yesu na kna mbo, “Yire aŋga leele mblɛ nu shɔnlie n wa, e ndie kan kpa. Ni tni e jaara, ndee ni kala nya na e ni mbe sɛ su nyjila ŋgi nu hin? E pan na u ni e ni ŋga.”
18 A pra pan na u ni, a Yesu na fuu ŋumufɔɔn kre na, a kra yili yaŋu wre nu, a wra saanla titɛɛ kre nu.
Jaŋga Ŋga Kii Wa Shɔnlie Nu
19 Kee ŋga kɔkro kre, twanfɛɛnlɛ pre na Yesu yeeri mbɛɛ na mna u wie mbo, “Kena yira ŋgi ki tia a wre n ja mu ŋumufɔɔn kre wɔ ŋga hin?”
20 A Yesu na kna mna yo pe pan mbo, “E shɔnlie fiɛn, kre ki tia. Kpra na ni yuu e pan na, na e shɔnlie fiɛn ta na mustard bie yi kuraa kre, ee jaa yo nyua ŋga pan na, kɔ mu sɛ to lawee fɔŋgɔ nu, mbe ki pe ma. A yaka n wa mbe yaa jaa ki pe.”
21 La, blefuun na nyiɛtalaa chiin kie jaa kre ŋumufɔɔn ŋga wɔ lewo nu.
Yesu U Kumu Na U Nyiiɛ Kee Yo
22-23 Ŋga Yesu na u twanfɛɛnlɛ pre kro na sɛ fni Galilee na kre, a wra yo pe pan mbo, “Pie Lewo Biblɔ wre wɔ mbe le leele kɛɛ, mbe pe u gbo, a we ndru mbe nyi ki ble taarɛ ble na.” Ŋga wra yo ma kre, pe sɔɔnrɔ na ku.
Yesu Na Tɔɔ Tɔ
24 Ŋga pra yiri wa kre, pra sɛ Capernaum na, bawa Suminyuŋgo tɔɔ shɔfɛɛnlɛ pre na pan mu Peter wie mbo, “Kena e nyinafun ŋmba Suminyuŋgo tɔɔ kre toni ŋgaa?”
25 A Peter na kna mbo, “Ŋgi ki tia mbe wa ki tɔ hin? U toni.”
Ŋga Peter na yiri wa mna le katoo to, a Yesu na klu mu u wie mbo, “Simon, mni nyini mu kee ŋga jawa hin? Leele mblɛ haa pan ŋulo tra swa shio hin? Fumblɔ pan yi ree? Kabiile pan hin?”
26 A Peter na kna mbo, “Fumblɔ pan pe ki shio.”