2 A swafun wre na u yeeri mna yo u pan mbo, ‘Ni mu kaalɛɛ yɛ ndru. Kena pan mu ni yirɛ nyjɛ mu le yire kro nyu gbun mu ni ŋga. Ŋgi na hin? Mba ti mbe mu yi le na.’

3 A yirɛ lefun wre na kna na yuu uyɛ pan mbo, ‘Ŋga ni tafun ni woni tnumu nu ŋga, mni mbe pe hin? Na mi ŋmba, faŋga n wa ni nu mbe ni jaa fali, a ni nyifɛɛrɛ pini na mbe tali.

4 Ni chin kee ŋga mbe pe, na pe waa ni wɔ tnumu nu mbe ni leele ta mbe pe ni yii.’

5 A wra tni mna u lopom wre fɔlɔ lifɛɛnlɛ yeeri nununu, mna jlewo wre wie mbo, ‘Ni tafun fɔlɔ mni kii wa mu na hin?’

6 A wra kna mbo, ‘Kii simi liwo ankurae fulo.’

7 A wra kna mna yo shiin wo pan mbo, ‘A ŋu hin, ni tafun fɔlɔ mni kii wa mu na hin?’

8 Ŋga kra pan ma kre, kachindɛ kolo ŋga wra wru kre na tia swafun wre na u pni. Ŋgi na hin? Waŋgra ŋga leele pe pe denyjuu kolo chin peyɛ nu, mu wɛ leele mblɛ pe taa Nyiɛkpɔɔ kro kre na.”

9 “Kena ni yuu e pan, e waŋgra swa tɛɛ e nɔɔlɔ cha, na ki waa kɔ, pie e shɔ mbe yire na pre tni nyjila kro nu.

10 Fɔna e kpra li kalɛɛ fiɛn fiɛn nu, kre ee jaa kekpɔɛ kpra li. A na ma jaa kpra li kee fiɛn nu kre, ma jaa kpra li kekpɔɔ nu.

11 A na ma jaa waŋgra yirɛ kpra li kre, ŋmbi we mu shɔ mbe li, mbe nyjeeri yirɛ chichiele wru mbe le mu kɛɛ hin?

12 A na ma jaa ndro wo kpra li, ŋmbi we mu ŋga ŋu titi wo hin?

13 A kre sumifun n wa, mbe jaa tafɛɛnlɛ shiin sumi. Ŋgi na hin? We nunu kori mbe nunu pra, ndee uyɛ wru mbe nunu ŋga, mbe wɛ shiinwo wre na. Ki tia ndro wa jaa taa Nyiɛkpɔɔ kro, mbe jaa taa swa kro mbe ki nyu.”

14 Ŋga Pharisee leele mblɛ pra pe swa chafɛɛnlɛ pre na yire kee nyjɛ krɛrɛ loo kre, a pra u pini na tɛɛ.

15 A wra kna mna yo pe pan mbo, “Yire e eyɛ pini kprafɛɛnlɛ leele yiɛ na, la, Nyiɛkpɔɔ e lolonyi kee chin. Ŋgi ndra na hin? Yira ŋga waŋgra leele jawa yira chichie kre, ki pe yira waa Nyiɛkpɔɔ yiɛ.

16 Moses mbra yire na Nyiɛkpɔɔ kee nyanyofɛɛnlɛ pre naa wa mna pan mu su John ndrajefun wre nyjila, a mu yire yire nyjila yire nu krɛrɛ mu pan mu su aŋga, leelee wa na Nyiɛkpɔɔ ŋunumu kre ketaan kpali, a leele na peyɛ gbeŋmba na lee ki nu.

17 Kii yiɛyiɛ na nyjeeri na tra we fun, mu wɛ na mu Moses mbra yire fiɛn ka ti.

18 Blɔ ŋmba we u chɔ je mbe sɛ fuŋu leŋge kre, u leŋgeere kla, a ŋmba we chlɔ ŋmba u u plɔ je wru mbe leŋge kre, u leŋgeere kla.

19 Kena swafun wa naa wa, wraa wa dodonyi na yirɛ chichiele titi ni na leni, na uyɛ nyu lii ble kro nu.

20 A shianfun wa naa wa, praa u yeeri Lazarus, a klɛ na u knumu kro poŋgo,

21 a praa paan na u teeri swafun wre jlonwee nyu na. Kena na swafun wre li, a yi knumɛɛ wo tra kre, mbe u sɛ yi yoori mbe ka. A na ki pan ma kre, nyikaanla wa u ti, mbe pe pan mbra u klɛ yire lala.

22 Ki ble ka shianfun wre na ku, a nyjeeri bitumblɔ na pan mu u tio mna sɛ Abraham lawee. A swafun wre na ku, a pra u le.

23 A wra sɛ na kala nyaa Sutna kanhun, ŋga wra yiɛ yire kre, wra Abraham nya lawee lee ka nu, a Lazarus naa wa u jaara.

24 A wra kna mbo, ‘Tolɛɛ Abraham, jande ni fooro le, mu Lazarus tun, mbe u sɛ u kambɛlɛ ni nyumu nu mbe paan ni ndile nyiŋge. Ŋgi na hin? Ni kala nyaa kanhun ŋga nu titi.’

25 A Abraham na kna mu yo u pan mbo, ‘Ni biblɔ, jawa mu chin na, ŋga mnaa wa ŋmaa ni kre, mna yirɛ chichiele nyjɛ mnaa chaa kro ta, a Lazarus na kala nya, la, fuŋga wre uyɛ lii, mbe ŋu kala nya.

26 A na o yire krɛrɛ tɛɛ mbɛɛ na kre, wee badaaŋga kaa wa wre na ŋu lalaa, na ndro chaa mbe kun mbe pan mu pan wa kre, wa ki ja, a wa wa jaa kun mbe pan mna.’

27 A swafun wre na kna mbo, ‘Tolɛɛ, ni mu tali, kena u tun mbe u ndru mbe sɛ ni lɛ katoo.

28 Ŋgi na hin? Nii wa na chinlɛ kunɔ ni wa, mbe u sɛ pe jaari, mbe pia kɔɔ pan kanyana ndoo ŋga nu.’

29 A Abraham na kna mbo, ‘Moses na Nyiɛkpɔɔ kee nyanyofɛɛnlɛ pree wa pe pan wa, pie loo pe pan.’

30 A swafun wre na kna mbo, ‘Ɔɔhɔn, tolɛɛ Abraham, na ndro yiri o pan mna mu sɛ wa kre, pie pe jawala chinɛ.’

31 A Abraham na kna mbo, ‘Na pia Moses na Nyiɛkpɔɔ kee nyanyofɛɛnlɛ pre kee yire loo kre, kena na ndro nyi mu ki yo pe pan kuraa kre, pia ndie tɛɛ u pan.’”