6 Kie pe ndroo nyjila kɛmbɔshiin kre, leele na gble le mbo, ‘E le, bijɔplɔ wre paan! E yiri e u fni!’

7 A bichabɛɛlɛ pre na tin gri, mu yiri na pe kaniɛ gbeele.

8 Bawa jijiele pre na kna mu yo kachimblɛ pre pan mbo, ‘E jande, e o ŋga simi mbe o le o kaniɛ nu. Na kre ma yie fii.’

9 A kachimblɛ pre na kna mna yo pe pan mbo, ‘Kia o kro da, kena e sɛ mblɛ pe ki prɛ pre pan, e sɛ ka cha e lɔ.’

10 Ŋga bichabɛɛlɛ pre na sɛ simi cha haa kre, bijɔplɔ wre na pan pe kro, a wre na mblɛ pra peyɛ kna na u sri pre na sɛ le nyuŋgo ŋga nu pra bijasro pe mu tɛɛ kre nu, mna krɔ yii mu kan.

11 Praa wa wa maa, a bichabɛɛlɛ jijiele pre na pan, mna pan na krɔ koori mbo, ‘Ndoo, Ndoo, jande, krɔ nyaa o pan.’

12 Bawa wra kna mna yo pe pan mbo, ‘E laa ni na, ni n e chin.’

13 Kena ni yo e pan na, e eyɛ kna, e na sri, na e n ble kre, na nyjila kre chin.

14 Pan ki nyi na, blɔ wa naa kolo kuun mbe sɛ haka, mna u sumifɛɛnlɛ yeeri mu pan u jaara, mna u yirɛ wru mu le pe kɛɛ.

15 Wra sumifɛɛnlɛ pre kro ŋga u yirɛ mbe praa le. Wra nunu ŋga swa talɛnti kunɔ, mna nunu ŋga shiin, mna taarɛwo wre ŋga nunu, imi pe kro we jaa le mbe da. Mna to kolo mu sɛ.

16 Ŋmba wra ŋga swa talɛnti kunɔ wre na sɛ jafa li na ki ni, mna kunɔ ta mu ya ki na.

17 Pan chɔɔ ŋmba wra ŋga shiin wre na sɛ jafa li na u wo ni, mna shiin ta mu ya ki na.

18 A ŋmba wra ŋga nunu wre na sɛ tra tuu mna ki le.

19 Pe tafun wre na mu mna chin mu pan, a wra u sumifɛɛnlɛ pre yeeri a pra pan mu fni, a wra pe wie nyjɛ pe pe na pe swɛ yire ni.

20 Bawa ŋmba pe tafun wre na ŋga talɛnti kunɔ wre na pan mu talɛnti kunɔ ya ŋga wra u ŋga kre na, mna kna mbo, ‘Ni tafun, talɛnti kunɔ mna ni ŋga, a ni pe mu talɛnti kunɔ ta mu ya ki na.’

21 A u tafun wre na kna mna yo u pan mbo, ‘Lefɔ! Sumifun chichuo kprafun. Ŋga mu swa chiɛri ŋga kpra li ŋga, mbe mu wru mbe tɛɛ yirɛ nɛɛrɛ nyu na. Kena pan mbe ŋu na mu tafun wre yɛshɔɔrɔ li.’

22 A ŋmba wra ŋga talɛnti shiin wre na pan mna yo u tafun wre pan mbo, ‘Ni tafun, talɛnti shiin mna ni ŋga, a ni pe mu talɛnti shiin ta mu ya ki na.’

23 A u tafun wre na kna mbo, ‘Lefɔ! Sumifun chichie kpralifun, ŋga mu swa chiɛri ŋga kpra li ŋga, mbe mu tɛɛ yirɛ nɛɛrɛ nyu na. Kena pan mbe ŋu na mu tafun wre yɛshɔɔrɔ li.’

24 A ŋmba wra ŋga talɛnti nunu wre na pan mna yo u pan mbo, ‘Ni tafun, ni mu chin na mu pe pɔɔrɔfun, mna mu n luu kuraa mu kuun wa, a mna mu n yira tɛɛ kuraa mu ja na wrui na dani wa.

25 Ki tia ŋga mna ni ŋga swa kre, fiɛrɛ na ni yii, a ndaa sɛ ki le wee, kena mu yira ye.’

26 A u tafun wre na kna mbo, ‘Ndro sisaa titi wi ŋu. Mu gbashia kpɔɔ. Mu chin na ni kuun mna ndaa luu, na kolii mna ni n tɛɛ.

27 Na mna wa jin swa ŋga ni mu ŋga kre, ŋga ni pan ŋga, mbe na ki ta, mbra tnu ta ki nu.’

28 Bawa u tafun wre na kna mbo, ‘E ki shɔ u kɛɛ, e ki wru e ya talɛnti kɛfun wre pan.

29 Ŋgi na hin? Ŋmba uu ka ni, mu ki le chichie kre, pie ka ya u pan, mbe u ta nɛɛrɛ. La, ŋmba pan fiɛn nyi, a u n ki le chiriri kre, ŋga kii wa u pan kre kuraa, pie ki shɔ u kɛɛ.

30 Kena sumifun lewaa wre, e sɛ u wa wɔmu lawee kre nu, bawa leele we nyɛni mbra ŋgaala chirɛ.’

31 Kena na Lewo Biblɔ wre, na nyjeeri bitumblɔ pre waa pan u yɛnyiŋge kre nu kre, we tni u ŋujɔɔn kre na.

32 Kre nu waŋgra leele kro we paan fni u yiɛ. Bawa we pe yɔɔlɛ, imi na mbaala lefun u mbaala, na u sikaala yɔɔlɛ kre,

33 mbe u mbaala pre tɛɛ u kalie, mbe sikaala pre tɛɛ u kamɛŋɛ.

34 Bawa Ŋunu wre we kna mbe yo mblɛ pee wa kalie pre pan mbo, ‘Yire mblɛ ni Lɛ dwan kre, e pan e ŋunumu ŋga pe gbeele mu tɛɛ e pan, mu yire waŋgra gbeele nyjila kre wru e li.

35 Ŋgi na hin? Klo na ni ta, a e na ni ŋga sro, a ndaa li. A gbɔɔ na ni ta, a e na ni ŋga nyumu a ndaa gbɔ. Ndaa fuŋum lii, a e na ni wru mu sɛ katoo.

36 Ndaa tro wejiwaara, a e na ni tɔ yoŋgo. Ndaa yaa, a e na sɛ ni shaari. Pra ni le nyuŋgo, a e na sɛ ni le.’

37 Bawa mblɛ pe pe cheche pre we kna mbe pe Tafun wre wie mbo, ‘Ŋgi ble o na mu nya na klo mu ta, a o na mu ŋga sro hin? Ndee a gbɔɔ na mu ta, a o na mu ŋga nyumu a mna gbɔ hin?

38 Ndee ŋgi ble o na mu nya na mu fuŋum lii, a o na mu wru mu sɛ katoo hin? Ndee mna mu nya na mu tro wejiwaara, a o na mu tɔ yoŋgo hin?

39 Ndee ŋgi ble pra mu le nyuŋgo, ndee na mu yaa, a o na sɛ mu shaari hin?’

40 Bawa Ŋunu wre we kna mbe yo pe pan mbo, ‘Kpra na ni yuu e pan na, ŋga e ki pe mu ni chinlɛ fiɛn fiɛn mblɛ wa ŋga kre, mi e ki pe mu ŋga.’

41 Mbe Ŋunu wre kna mbe yo mblɛ u kamɛŋɛ kre pan na, ‘E laa ni na! Nyiɛkpɔɔ suŋgɔ e yii. E sɛ blenyini kanhun ŋga pe gbeele mu tɛɛ Sutna, na u nyjeeri bitumblɔ pan kre nu.

42 Ŋgi na hin? Ŋga klo na ni ta kre, e nsra ni ŋga yaka, a ndaa ka. Ŋga gbɔɔ na ni ta, e nsra ni ŋga nyumu a ndaa gbɔ.

43 Ŋga ndaa fuŋum lii, e nsra ni wru mu sɛ katoo. Ŋga ndaa tro wejiwaara, e nsra ni tɔ yoŋgo. Ŋga ndaa yaa, na ŋga pra ni yii mna sɛ le nyuŋgo kre, e nsra ni shaari.’

44 Bawa pre we kna mbo, ‘O Tafun, nyjila ŋgi nu o na mu nya na klo mu ta, ndee na gbɔɔ mu ta, ndee na mu fuŋum lii, ndee na mu tro wejiwaara, ndee na mu yaa, ndee na pe mu yii mu le nyuŋgo, a o nsra mu le hin?’

45 Bawa we kna mbe yo pe pan mbo, ‘Kpra na ni yuu e pan, ŋga e n sra pe mu fiɛn fiɛn mblɛ wa ŋga kre, e n sra yaka pe mu ni ŋga.’

46 Bawa pie flo u jaara mbe sɛ blenyini kanyana kre nu. La, mblɛ pe fraka pre we sɛ blenyini ŋmaa nu.”