Suminyuŋgo Kre Kee Nyanyoo
13
Ŋga wra yili Suminyuŋgo kre nu, a u twanfɛɛnlɛ pre nunu na kna mbo, “Nyinafun, dnɛ badɛnyi nyjɛ nyini pe tɛɛ mu nyinyi nyjɛ sin le ma.”
2 A Yesu na kna mu yo pe pan mbo, “Nyinyi nyjɛ nyini e nyaa ŋga, dnɛ ka n wa, mbe kɔɔ kro ki ŋmbrɔ na, mbe pia ki laa mbe wa tra.”
Nyjɛ Yie Pe Waŋgra Nyukɔɔrɔ Nyjila
3 Ŋga Yesu na sɛ tni Olive nyua kre na, pe Suminyuŋgo kre yɛsimi wa kre, bawa Peter, na James, na John, na Andrew na u wie mbɛɛ na mbo,
4 “Nyinafun, o nyina nyjila ŋga nu kee nyjɛ mu nyini nyjɛ krɛrɛ we pe. A na nyjila kre waa na dani, sɛmbɛɛrɛ kee ŋgi kie pe mbe o chin na yire kee yire paan mbe pe yɛŋgɛ hin?”
5 A Yesu na kna mna yo pe pan mbo, “E dɔɔta mbe ndro waa shia e fana.
6 Leele tataara we pan na ni mɛɛ ni mbe yo na, ‘Mi wi Kristo wre,’ mbe leele tataara fana.
7 Kena na e waa na ŋunɛ wiire kee ndru lawee lawee nu kre, yaa shia ti mbe gbun yɔ e na, fna ki fna mbe yire kee yire pe tun, la, na waŋgra nyukɔɔrɔ kre n ta mu da tun.
8 Waŋgra na waŋgra we to peyɛ na, mbe ŋunu na ŋunu ta peyɛ na, mbe tra na seeri lawee lawee, mbe klo to lawee yɛ nu. Pan yire kee yire we pe na chlɔ se nyjila dani, a lɛɛ na u yaa.
Prara Na Ketaan Kre Yohaa
9 Kena e eyɛ le chichie. Pie e yii mbe sɛ na e ni loplombo yiɛ, mbe pe e frɔ fninyinyi nu. A mi ndra na, pie e yire abani loplombo, na ŋulo yiɛ, mbe e ni dansiɛrɛ li.
10 A ki fna mbe e klu mbe ketaan kre yo mbe waŋgra kro nyina.
11 Na pe waa e yii mu sɛ na e ni pe kala lihaa, yaashia na kawa ŋga ee yo ni. Na ki nyjila kre waa da, kee ŋga kie yili mu nyuu kpan yo, ŋgi na hin? Kre nyjila kre, ŋu titi ma mu paara, la, Kpra Ŋumu wre we paara mu nu.
12 Lopɔ we u lopɔ wɔ mbe ŋga, mbe pe u gbo, mbe lɛ u pɔ wɔ mbe ŋga, mbe biile yiri mbe pe sefɛɛnlɛ taan, mbe pe wɔ mbe ŋga, mbe pe pe gbo.
13 Ni mɛɛ kre ndra na, leele kro we e pra. La, ŋmba we jaa yire kanyana nyjɛ nu gbiŋmbi mbe sɛ kɔ kre, mbe u shɔ.
Afuŋgo Kee Ŋga Ki Waŋgra Jee
14 Kena na e waa ‘afuŋgo kee ŋga ki waŋgra jee’ kre nya, a ki yire mna ki n fna mbe yire kre, kena tɔɔnrifun wre u ki le chichie, mbe ki nɔɔ loo. Kena mbe leele mblɛ pee wa Judea na pre, mbe praa feni mbra nyuɛ ndru.a
15 A ŋmba uu wa nyuŋgo ndra na wre waa shia tii, ndee mbe le katoo lam mbe u yaka wru mbe yili.
16 A ŋmba uu wa see kre, waa shia ndru mbe pan katoo mbe paan u yoŋgo wru.
17 Yire ble yire we pe nyibinyiɛ mbe chiɛlɛ siirefɛɛnlɛ, na mblɛ pan biile ŋgoorii pan.
Kanyana Ble Kpɔɔ Kre
18 Kena e nyiɛtali mbe kia pe weere nyjila.
19 Ŋgi na hin? Yire ble yire we pe kanyana ble kpɔɔ, ŋga ka ki n da mu pan, mu yire waŋgra gbeele nyjila. A ka waa pan ma na fio.
20 A na o Tafun wre n na ka kun ble yire na kre, kaa wa na ndro nunu chom kuraa ta. A mblɛ u yeeri mu pe wɔ pre ndra na u yila mu ka kun ble yire na.
Kafinɛ Kristoe, Na Kafinɛ Nyiɛkpɔɔ Kee Nyanyofɛɛnlɛ
21 A yire ble yire nu kre, na ndro waa yo e pan mbo, ‘E le, Kristo wree wa mna.’ Ndee, ‘E le, uu wa mnawa kre,’ yaashia ki shɔ mbe li.
22 Kafinɛ Kristoe, na kafinɛ Nyiɛkpɔɔ kee nyanyofɛɛnlɛ we pan. Pie kefɔnyi, na kawako kee pe. Na pie ja kuraa kre, mblɛ Nyiɛkpɔɔ wɔ kre, pie pe fana mbe laa kpra kre na.
23 A yire rɛ, e le chichie, kre na ni klu mu yi kro yo e pan kre.
Lewo Biblɔ Wre Paan
24 A yire ble yire nu, kanyana yire kɔkro kre,
‘ndram we wɔ lafo na,
a nyiɛpɔ wa jaa fniŋge na.
25 Mbe wɔɛlɛɛ na klɔ nyjeeri mbra tuuri tra.
Mbe Nyiɛkpɔɔ jaŋga ŋga kii wa nyjeeri kro nyaara.’b
26 Bawa pie Lewo Biblɔ wre nya na u paan na jaŋga, na yɛnyiŋge ni tloe nu.
27 Kre nu we nyjeeri bitumblɔ tun, mbe pe paan u wolo mblɛ u wɔ pre yoori pei tra yiɛ na, mbe sɛ pe ble titɛɛ.
Fig Tiŋge Kre Yomɛɛlɛ
28 E fig tiŋge yomɛɛlɛ kre tuan. Na e waa nya na ki wrɛ nyaara, mu ndru na funi to, kena e chin na ndramwrɛm nyjila dani.
29 Pan yi chɔɔ, na e waa nya na kee nyjɛ ni nyina nyjɛ waa na pini kre, kena e chin na nyjila kre mbra mna, a ki da e na kuraa mu kɔ.
30 Kpra na ni yuu e pan na, fuŋgaami leele mblɛ wa kɔ fio, fɔna kee nyjɛ krɛrɛ we pe tun.
31 Nyjeeri na tra we paan tro, la, ni kee wa tro fio.
Ble Kre Na Nyjila Kre Rɛ, Wa N Ki Chin
32 La, ble kre, na nyjila kre rɛ, wa n ki chin, nyjeeri bitumblɔ pre kuraa n ki chin, hali Nyiɛkpɔɔ Biblɔ wre titi kuraa n ki chin, fɔna u Lɛ wre chiin.
33 Kena e eyɛ le chichie, e eyɛ shie, e na nyiɛtali, ŋgi na hin? E n chin nyjila ŋga nu ble kre we to.
34 Pan ki nyi na lewo kolo kuun, mbe u katoo le u sumifɛɛnlɛ kɛɛ, mbe pe kro ŋga tnumu peyɛ yɛ, mbe yo jlonwee nyu lefun wre pan na wra katoo kre sri u pan.