3 Ŋga praa wa Bethany na, Simon yiranyiɛrɛfun wre katoo na lii kre, chlɔ wa na pan na alabaster gbolo ŋga nu tlade ndiom taan, ndrɔshelee, ŋga pe wɔ nard tiŋge nu ni, mna ki nyu ja, mu ki kna mu wo Yesu ndra na.

4 Ki nsra tna leele mblɛ praa wa wa pre plɛ pan, a praa taanri na yuu mbo, “Ŋgi ki tia u tlade ŋga kla finfin ŋga hin?

5 We na jaa ki prɛ mbra shɔ mbe ki wɛ denarii lafɛɛ taarɛ na, mbra shianfɛɛnlɛ ŋga.”

6 A Yesu na kna mbo, “E u ti. Ŋgi ki tia a e na u hau ma hin? U kee chichie pe mu ni ŋga.

7 Yire na shianfɛɛnlɛ pre lɛ mna nyjila kro nu. Ble ŋga na e chaa kpan, ee jaa pe pe chichie. A mi rɛ, nyjila kro nu ma ee mi ta e jaara.

8 Ŋga we ja u pe kre. U klu mu tlade kna mu wo ni wejiŋge na, mbe pe chiin ni le wee.

9 Kpra na ni yuu e pan na, waŋgra ŋga nu pie ketaan ŋga yo kpan, kee ŋga chlɔ ŋmba pe ŋga, pie ki yo wa mbe tɛɛ mbe u sɔɔnri.”

10 Bawa Judas Iscariot, kɛmbɔshiin pre nunu, na yiri mna sɛ srawɔfɛɛnlɛ loplombo pre lawee, mna yo pe pan na we Yesu wɔ mbe pe ŋga.

11 Ŋga pra ki loo kre, kra pe pe yɛshɔɔrɔ, a pra kna mna yo u pan na pie u ŋga swa. A wraa kolo chaa mbe u wɔ mbe pe ŋga.

12 Ŋga ble nyjɛ nu pe nsraa yiisi paanu kaa yire na da, ki ble ŋga kra yiɛklu a praa Klɛntro sra mbɔɔ wre kuu kre, u twanfɛɛnlɛ pre na u wie mbo, “Sena mu chaa mbe o sɛ gbeele mu pan mbe mu sɛ klɛntro ble yire li hin?”

13 A wra u twanfɛɛnlɛ pre shiin wɔ mu tun, mna yo pe pan mbo, “E sɛ chia kre lam. Na e shie, ee blɔ wa fni na u chɔkoo tio na nyumu ni. E taa u kro.

14 Katoo ŋga nu we le kre, e le wa, e yo katoofun wre pan na, Nyinafun wre yo na, ‘Sena fumblɔ nyuŋgo ŋga nu wre na u twanfɛɛnlɛ pre we Klɛntro ble yire li kre nyi hin?’

15 Wre titi we e nyina nyuŋgo badaaŋga ka nyjeeri, ŋga lam pe san mu tɛɛ, mbe e bawa gbeele o pan.”

16 A u twanfɛɛnlɛ shiin pre na to kolo mna sɛ. Ŋga pra le chia kre na kre, pra nya imi na Yesu na yo pe pan kre, a pra klɛntro lawee kre gbeele.

17 Ŋga yila na kɔ kre, wre na kɛmbɔshiin pre na le chia kre na.

18 Ŋga pra tni na lii kre, a Yesu na yo pe pan mbo, “Kpra na ni yuu e pan na, yire mblɛ mi na yire lii ŋga, e wa we ni wɔ mbe ŋga.”

19 Bawa fooro na pe yii, a praa Yesu wie nununu, mbo, “Mi wi ree?”

20 A wra kna mna yo pe pan mbo, “Yire kɛmbɔshiin mblɛ wa wi, ŋmba mi na wre kɛ leni kotolo nunu nu na lii.

21 Lewo Biblɔ wre shie imi na pe ki nyunɔ kre, la, ndro ŋmba we Lewo Biblɔ wre wɔ mbe ŋga kre, u atɛ! Na pe nsra ufun wre se, ka ki nyu mu u ŋga.”

22 Ŋga praa lii kre, Yesu na paanu wru mu ki dwan, mna ki pile mna pe ŋga, mna yo pe pan mbo, “E shɔ. Ŋga yi ni wejiŋge.”

23 A wra gbɔyira wru mna Nyiɛkpɔɔ ŋga mboo, mna pe ŋga, a pe kro na gbɔ ki nu.

24 A wra kna mu yo pe pan mbo, “Ŋga yi ni nyimi ŋga nyu Nyiɛkpɔɔ na le na pie knaa wo lenɛɛrɛ pan kre.

25 Kpra na ni yuu e pan, na mba tre sɛnyi simi ŋga ka gbɔ na, mbaa sɛ su na mbe ki gbɔ fɔŋgɔ Nyiɛkpɔɔ ŋunumu kre nu.”

26 Ŋga pra yire wa mna mɛɛ kɔ mu Nyiɛkpɔɔ ŋga mboo mu kɔ kre, a pra sɛ Olive tinyi nyua kre na.

27 Bawa Yesu na yo pe pan mbo, “E kro we fɛ mbe laa ni kro. Pe ki nyunɔ mu yo na,

28 La, ni kunnyiɛ kɔkro kre, mbe yiɛklu mbe sɛ Galilee na.

29 A Peter na kna mu yo u pan mbo, “Na pe kro we fɛ mbe laa mu kro kuraa kre, mba fɛ.”

30 A Yesu na kna mu yo u pan mbo, “Kpra na ni yuu mu pan na, aŋga lam, blee ŋga, ŋgoplɔ wa nyɛni gbee shiin na mu kaala gbee taarɛ na mu n ni chin kuraa.”

31 Peter na paara nyibinyiɛ ni mbo, “Na kumu yi kuraa kre, mi na ŋu we ku, mba laa mu kro fio.” Imi Peter na yo kre chɔɔ, pan hamblɛ pre na yo na.

32 Ŋga pra da lawee ŋga praa yeeri Gethsemane nu kre, bawa wra yo u twanfɛɛnlɛ pre pan mbo, “E tni mna, mbe ni sɛ nyiɛtali mbe pan tun.”

33 A wra Peter, na James, na John wru mna ya uyɛ na. Ŋga pra sɛ yiɛ chiɛri kre, wrekroo na u yii kpɔɔ.

34 A wra kna mu yo pe pan mbo, “Fooro ni yii kpɔɔ na shie kumu nu. E tni e na sri, yaa shia ŋunu.”

35 A wra pe ti wa mna sɛ yiɛ chiɛri, mna juule tra, mna nyiɛtali mbo, “Na kie ja, ti mbe kanyana nyjila ŋga ni wa mbe tro.”

36 A wra kna mbo, “Abba, Ndoo! Mu ja na yira kro pini, kena kanyana gbɔyira ŋga flo ni mbɛɛ na mu sɛ. Imi na mi chaa ma, la, imi na ŋu chaa ki pe.”

37 Ŋga wra ndru mu pan kre, wra pan mu da na pe ŋunu, a wra kna mu yo Peter pan mbo, “Simon, mu sni ra? Kena mu n ja mu shie nyjila nunu kuraa.

38 E yiɛ tɛɛ, e na nyiɛtali, mbe yaa shia to nyu chaara kee nu. Ŋumu chaa, la, wejiŋge pe yiɛyiɛ.”

39 A Yesu na ndru mu sɛ nyiɛtali shiinwo na, mna kee nunu kre chɔɔ yo.

40 A wra ndru mna pan mu da na pe ŋunu na, na ŋunumu kre wɛ pe na kuraa. Ki tia pe nsra chin imi na pie yo.

41 A wra ndru mna sɛ mu pan gbee taarɛwo, mna pan mu pe da na pe ŋunu tɛ, a wra yo pe pan mbo, “Ee wa mu sni na wuui tɛ ra? Ki yila ma. Nyjila kre da mbe pe mi Lewo Biblɔ wre wɔ mbe le sisampefɛɛnlɛ kɛɛ.

42 Kena e yiri mbe o sɛ. E le, ŋmba we ni wɔ mbe ŋga wre, u mbra mna.”

43 Titɛɛ kre nu, ŋga wraa wa mu yire wa na paara kre to, a Judas, pe kɛmbɔshiin pre nunu na pan wa. Na lenɛɛrɛ mblɛ pe brɔfiɛnlɛ, na vɛɛn yii yii mu yiri srawɔfɛɛnlɛ loplombo pre, na nyinafɛɛnlɛ, na chia loplombo pree wa mu taa u kro.

44 Na ŋmba we u wɔ mbe pe ŋga wre, pe nyina na, “Ŋmba gbeŋge mbe shiun kre, wre wi. Kena e u yii chichie e sɛ na u ni.”

45 Ŋga pra da u na kre, titɛɛ kre nu to, a wra pan Yesu jaara, mbo, “Nyinafun,” to, mna u gbeŋge shiun.

46 A leele pre na sɛ u yii.

47 A leele mblɛ praa wa wa pre wa na brɔfiɛn tini mna srawɔfun lopom wre sumifun ndie chieri mu kun.

48 A Yesu na kna mu yo pe pan mbo, “E pan ni pan na brɔfiɛnlɛ, na vɛɛn ni mbe paan ni yii na kokɔɔn wi mii?

49 Ŋga nii wa e jaara Suminyuŋgo nyjila kro nu, na e nyina kre, e n ni yii wa. La, imi kie pe mbe kee kre pe nyunɔ kre pan ma kre ki tia.”

50 Ŋga kra pan ma kre, u twanfɛɛnlɛ pre na fɛ mu laa u kro.

51 A nyanyjɛble wa na mbɔfiŋge tɔ mu taa u kro, a pra wre yii na,

52 a wra u yoŋgo kre kun mu wa pe pan mna fɛ mu sɛ wejiwaara.

53 A pra sɛ na Yesu ni srawɔfun lopom titi wre pan, a srawɔfɛɛnlɛ loplombo pre na chia loplombo pre na nyinafɛɛnlɛ pre kro na pan mu fni.

54 Peter na taa pe kro mu lalaa wa wre na Yesu pan, mna sɛ le srawɔfun lopom wre katoo lam wa, mna sɛ chaa sumifɛɛnlɛ pre nu mu tni na kanhun yuai.

55 A srawɔfɛɛnlɛ loplombo pre na leele mblɛ pra fni wa pre, naa kpra dansiɛrɛ kee ka chaa, mbe yire ki na mbe Yesu gbo, a pe nsraa kee ka taa.

56 Bawa leele tataara plɛ na kafinɛ dansiɛrɛ li mu u taan, a pe dansiɛrɛ yire krɛrɛ na yili yi yɛyɛ.

57 A plɛ na yiri mna kafinɛ dansiɛrɛ ka li mna Yesu taan mbo,

58 “O loo a wraa yuu na, mbe Suminyuŋgo badaaŋga ŋga pe kɛnyi tɛɛ mu sin kre juari, mbe ndru mbe ki sin ble taarɛ ni, ŋga pe n kɛ tɛɛ mu sin.”

59 Pre dansiɛfɛɛnlɛ pre kuraa nyu na yili yi yɛyɛ na.

60 A srawɔfun lopom wre na yiri mu yire lalaa, mna Yesu wie mbo, “Ma nyu kun ra? Ŋgi mu pieri a pra kee nyjɛ nyini yuu na taari mu na ŋga hin?”

61 A Yesu na u nyu tɔ, hali u nsra nyu kun na ndro ni.

62 A Yesu na kna mbo, “Mi wi, a ee mi Lewo Biblɔ wre nya na ni tni Jaŋga kre kalie, mbra paan tloe nu nyjeeri.”

63 A srawɔfun lopom wre na wre titi dodoŋgi tini mu wla uyɛ na, imi u krɔ na kun kre na, mna kna mbo, “Dansiɛrɛ ŋgi o chaa na hin?

64 E u jiɛnlɛ kee ŋga loo ŋgaa? A mni e jawa hin?”

65 A plɛ naa tɛɛnrɛ hlu na woni u na, mna u yiɛ fo, na u gbuun kaŋgroe, na yuu u pan mbo, “Ŋmba u mu gbun nya mu yo o pan.” A lawee shiefɛɛnlɛ pre naa u gbuun ka na.

66 Ŋga Peter naa wa kagbala kpɔɔ wa kre, a chiɛlɛ mblɛ pe srawɔfun lopom wre sumi pre nunu na pan wa,

67 mna Peter nya na uu wa mu tni na kanhun yuai. A wra u le komm mbo, “Ŋu na Yesu Nazareth wo wre ma e nyaari kree?”

68 A wra kaala mbo, “Ni n u chin, a ni n kee ŋga mu yuu ŋga kuraa nɔɔloo.” A wra yiri wa mna sɛ jlonwee nyu taanhaa na wa, to a ŋgoplɔ jle na nyɛni.

69 A bichable wre na ndru mu pan mu u da wa na, mna kna na yuu leele mblɛ praa wa wa pre pan mbo, “E le, blɔ ŋmba u chaa Yesu leele pre nu.”

70 A Peter na ndru mu kaala na.

71 Bawa Peter naa uyɛ suni kuraa na dani, mbo, “Ndro ŋmba kee e yuu ŋga kuraa, ni n u chin.”

72 Titɛɛ kre nu to, a ŋgoplɔ na nyɛni shiinwo. A Peter na kee ŋga Yesu na yo u pan kre sɔɔnri, na wra yo na ŋgoplɔ wa nyɛni gbee shiin, na u kaala gbee taarɛ na u n u chin. Ŋga wra ki sɔɔnri kre to, a wraa nyɛni.