Chiɛlɛ Sɛsɛ Pɔɔ
11
E ni le, e ni kepele twan, imi na ni Kristo kepele twan kre.
2 Ni e kaan mɛɛ, ŋgi na hin? E ni sɔɔnri nyjila kro nu, na lii kee nyjɛ ndaa e nyina yire kro na.
3 La, ni chaa mbe e chin na, blɔ kro ndra wi Kristo, a chlɔ ndra wi u plɔ, a Nyiɛkpɔɔ wi Kristo ndra.
4 Blɔ ŋmba we na nyiɛtali, ndee mbra ketaan kre kpali mbe juulee juule kre, kena u tia nyifɛɛrɛ Kristo gbo.
5 La, chlɔ ŋmba we na nyiɛtali, ndee mbra ketaan kre kpali, a u n sɛsɛ pɔ kre, kena u tia nyifɛɛrɛ u plɔ gbo. Chlɔ ŋmba u pini ma kre, pan u nyi to, na chlɔ ŋmba ndra pe klu wi.
6 Na chlɔ je na wa sɛsɛ pɔ kre, kena u u ndra knumu mbe wo, a ŋga ki pe nyifɛɛrɛ ni mu chlɔ ŋga na we u ndra knumu, ndee mbe ki klu kre ndra na, ŋga ki fna mbe chlɔ pe yi na we sɛsɛ pɔ.
7 A blɔ n fna mbe u ndra tɔ, ŋgi na hin? Nyiɛkpɔɔ u gbeele wre titi wrumu na, a wraa Nyiɛkpɔɔ wre yɛnyiŋge nyina. La, chlɔ rɛ, blɔ yɛnyiŋge u nyina.
8 Ŋgi na hin? Blɔ ma pra gbeele mu yili chlɔ nu, la, chlɔ pra gbeele mu yili blɔ nu.
9 A chlɔ na ma pra yila mna blɔ gbeele, la, blɔ na pra yila mna chlɔ gbeele.
10 Nyjeeri bitumblɔ ndra na, ki fna mbe chlɔ sɛsɛ, ndee yira tɛɛ mbe ndra tɔ, mbe ki nyina na uu wa blɔ jaara.
11 O tnimu nu o Tafun wre nu kre, chlɔ blɔ shian, a blɔ chlɔ shian.
12 Ŋgi na hin? Nyiɛkpɔɔ na chlɔ gbeele mu yili blɔ nu, a chlɔ yiri mu kna na blɔ sii, la, Nyiɛkpɔɔ u yira kro wa.
13 Yire titi e kpra yo, ki nyu na chlɔ we yire mbra nyiɛtali, mbe u ndra ti waara maa?
14 Lewo titi chin na, na blɔ u nyjure ti a yi nɛɛ, a u n yi knumu kre, ki pe nyifɛɛrɛ mu u ŋga.
15 La, na chlɔ ndra nyjure tɔ mu nɛɛ, ki u kaan yɛnyiŋge. Ŋgi na hin? Chlɔ ndra nyjure pe yirɛ nyjɛ Nyiɛkpɔɔ u ŋga wra u ndra toni.
16 La, na wa kre kee ŋga lii kakra kre, kee ŋga ni yuu e pan yi na, wre na Nyiɛkpɔɔ sumifɛɛnlɛ pre kro, kolo fɔŋgɔ ka n wa na, pan o kro pini.
O Tafun Sro Lie
17 La, kee nyjɛ mbe yo ŋga na rɛ, mba e ŋga mɛɛ yi na, ŋgi na hin? E fninlihaa kre, e na kee chiriri pe wa. Kee fuɛn nyjɛ e pini yire wɛ chichie nyjɛ e pini na.
18 Kee ŋga ki yiɛklu yi na, pe pan mu yo ni pan na, e fnihaa kre, e eyɛ yɔɔlɛ, a ni shɔnli na nyjɛ pe pan mu yo ni pan yire ka we pe kpra.
19 Kakra n wa ki na, yɛŋgɛ yi. Na ki pan ma a e eyɛ yɔɔlɛ kre, kie ti mbe e kpra sumifɛɛnlɛ pre nya eyɛ nu chasi.
20 Na e pan mu fni titɛɛ mbe li kre, o Tafun wre sro kre lie ma e ki lii kre.
21 Ŋgi na hin? Na e pan mu fni lihaa wa kre, e e sroe yire lii na e ŋmbilɛ tii, e na eyɛ shie, mbe ki ti klo plɛ ta, mbe plɛ gbɔ mbe to.
22 E n katoe ni mbe jaa na lii, mbra gboo wa ree? Ndee Nyiɛkpɔɔ sumifɛɛnlɛ pre pe fni kre, e n pe le mu nya, mu tia nyifɛɛrɛ na pɔlɛfɛɛnlɛ mblɛ pee wa e nu kre kuu ra? Kena kee ŋgi e chaa mbe ni yo e pan hin? Ni e ŋga mɛɛ ra? Kre na rɛ, mba e ŋga mɛɛ.
23 Ŋgi na hin? Kee nyjɛ ndaa ta mu yili o Tafun wre pan kre, yire ndaa e nyina kre. O Tafun Yesu wre, blee ŋga pra u wɔ mu ŋga kre, wra paanu wru,
24 mna Nyiɛkpɔɔ ŋga mboo, mna ki pile, mna kna mbo, “Ŋga yi ni wejiŋge ŋga ni e kaan, mbe ki ti e ŋmaa ta. E na ki pini, e na ni sɔɔnri.”
25 A pan chɔɔ, ŋga pra li mu kɔ kre, wra gbɔyira wru mna kna mbo, “Ŋga yi ni nyimi kre, a kre Nyiɛkpɔɔ tɛɛ na u nyu nunu fɔŋgɔ pini na e ni. Nyjila ŋga ni ee ki gbɔ kpan, e ki pe e ni sɔɔnri.”
26 Kena nyjila ŋga nu ee kre paanu ŋga ka, mbe gbɔ gbɔyira ŋga nu kpan, kena o Tafun kumu kre kee e kpali, mbe sɛ su na we ndru mbe pan.
27 Kena ŋmba we paanu kre ka, mbe gbɔ gbɔyira kre nu imi na ki n fna kpan, we pimi li na u sisaa pe mu o Tafun wejiŋge, na u nyimi kre taan.
28 Kena lewo fna mbe uyɛ le chichie, mbe chiin paanu kre ka, mbe gbɔ gbɔyira kre nu.
29 Kena ŋmba u paanu kre ka, mu gbɔ gbɔyira kre nu, a u n o Tafun wejiŋge kre le mu nya kre, kena u ka, mu gbɔ, mu uyɛ gbun pimi ni.
30 Kre ki tia e nɛɛrɛ na yaa, a plɛ na pɔlɛ e nu, a plɛ ku ku e nu kre.
31 La, na o oyɛ le chichie kre, Nyiɛkpɔɔ wa o gbun pimi ni.
32 A na ki pan na o Tafun wre o kpra kun, mu na o ndie tinii, kena u o fraka, imi kie pe mbe wa wre na waŋgrafɛɛnlɛ pre chaa mbe gbun pimi ni.
33 Kena ni wolo, na e fni mbe o Tafun sro kre li kre, e eyɛ shie.
34 Na klo e wa ta mu tro kre, ufun u li katoo mbe chiin pan, mbe wa kɔɔ uyɛ gbun pimi ni e fninlihaa.
Kaalɛɛ hɛnyi yire, na ni waa pan, mbe e nyina imi ee pe.