Corinthians Hlɛ Shiinwo
Shaaraa
1
Mi Paul ŋmba Nyiɛkpɔɔ na yire wre titi chaara na, mna ni yeeri, na ni paan pe Yesu Kristo bituŋu wre, na o ŋmbrɔ Timothy pan hlɛ ŋga yiri, na shie Nyiɛkpɔɔ sumifɛɛnlɛ mblɛ pee wa Corinth na, na mblɛ pe nyina Achaia tra nu kre kro pan.
2 O Lɛ Nyiɛkpɔɔ, na o Tafun Yesu Kristo pe e dumi, mbe e ŋga wejinyiŋge.
Paul Nyiɛkpɔɔ Ŋga Mboo
3 E ti mbe o Nyiɛkpɔɔ, o Tafun Yesu Kristo Lɛ wre ŋga mboo, foorochinfun wi, a Nyiɛkpɔɔ ŋmba u gbunnyiŋge kaan wi.
4 Wre u o kaan gbunnyiŋge o kanyana nyjila, imi kie pe mbe o ja mbe yire gbunnyiŋge ŋga u o kaan kre na, mbe jaa mblɛ pe kanyana nyininyini nyaa kre gbunnyiŋge na.
5 Imi na o Kristo kanyana kre ka nyaa kre, pan chɔɔ kie yire Kristo wre na mbe o gbunnyiŋge ta.
6 E gbunnyiŋge taa, na e ŋmaashɔmu na o yila na kala nyaa, a na o gbunnyiŋge ta, kie ti mbe e gbunnyiŋge ta, mbe e jaa eyɛ yii, mbe frɔ ta e kanyana nyjila.
7 O dankna e na kpɔɔ, ŋgi na hin? O chin na ŋga e o kanyana yire yɛ nyaa ŋga, pan chɔɔ ee o gbunnyiŋge kre ka ta na.
8 Ni wolo, o chaa mbe e sɔɔnri kanyana nyjɛ o na nya Asia tra nu kre. Kanyana yire na kpɔɔ mu wɛ o na, kra tia o dankna na kɔ, o nsra chin na oo ŋmaa ta.
9 Kpra na, o naa jawa na o ku kuraa mu kɔ. La, kre kee ŋga na pe, imi kie pe mbe waa oyɛ wru mbe taa oyɛ na, la, mbe o ndra taa Nyiɛkpɔɔ ŋmba u kuulo nyini wre chiin na.
10 Yire wejiwrɛ nyjɛ krɛrɛ nu kre, wra o shɔ, a we ndru mbe o shɔ na. Wre na o kaan mbe wra o shio.
11 Ŋga e yaa o na na nyiɛtalaa ni ŋga, kie ti mbe e mblɛ e chin na Nyiɛkpɔɔ e nyiɛtalaa loo, mu o shɔ kre, mbe e Nyiɛkpɔɔ ŋga mboo tataara.
Paul Yɛkpɔɔmu
12 Kee ŋga ni o oyɛ kpɔɔri fuŋgaami yi kre, o jawala kee tia o chin na o oyɛ dɔɔtaa waŋgra ŋga nu, a wre na yire na tni chasi kpra ni. Waŋgra ŋga kachindɛ kolo na ma wre na yire na tni, la, Nyiɛkpɔɔ dumiɛn ŋga wra o ŋga kre na yi.
13 Kee nyjɛ ee jaa tɔɔnri, mbe yi nɔɔloo kre, yire o nyunɔ mu pan mu e ŋga. A ni kaan na ee o nɔɔloo chɔ.
14 Ŋga e ta mu o nɔɔloo chiɛri ŋga, ee kɔɔ o nɔɔloo kpɔɔ, mbe o tɛɛ mbe eyɛ kpɔɔ, imi na oo e tɛɛ mbe oyɛ kpɔɔ o Tafun Yesu Kristo pan ble kre nu kre.
15 Ŋga ni shɔ mu li na yire kee nyjɛ we pe kre ndra na, kre na ni yila mu ni jawala pe na mbe klu mbe tro e pan wa tun, imi kie pe mbe e ni dwamu ta gbee shiin.
16 Ŋgi na hin? Ni chaa na ni shie Macedonia na, mbe ni tro e pan wa, a na ndaa ndru na paan, mbe ni tro e pan wa na, mbe e ya ni na, mbe ni jaa sɛ Judea na.
17 Ŋga ndaa kre jawala ŋga ta kre, ki nyina na ni jawala pini shiin shiin kee na ree? Ndee ki nyina na ni ni jawala pini na waŋgra ndro wi, na ni yo ɛnhɛɛn kee na, mbe ni ndru mbe yo ɔɔhɔn titɛɛ kre nu ree?
18 Ŋga Nyiɛkpɔɔ pe kprafun kre na, nyu ŋga ni yo e pan kre n pe kee ŋga kie chinɛ.
19 Yesu Kristo Nyiɛkpɔɔ Biblɔ wre, ŋmba kee mi na Silas na Timothy kpali e pan kre, u n pe ndro ŋmba u chinɛ, la, u kee kro pe kpra.
20 Nyiɛkpɔɔ kee nyjɛ u yo mu tɛɛ yire kro, yi yire Kristo na mu pe kpra. Kre ki tia nyjila kro nu o na yire u na, na “Ami” yuu, mbe ki ti Nyiɛkpɔɔ yɛnyiŋge ta.
21 Nyiɛkpɔɔ u tia o kro yire Kristo na mu yire gbiŋmbi. A wre u o wɔ,
22 mu o tnɔ na u wolo lɛ wre, a wre u tia Kpra Ŋumu wre tni o lolonyi nu, mbe ki ti o chin na nyjɛ u yo we o ŋga yire kro, oo yi ta.