Corinthians Hlɛ Jle
Shaaraa
1
Mi Paul ŋmba Nyiɛkpɔɔ na yire wre titi chaara na mu yeeri, na ni paan pe Yesu Kristo bituŋu wre, na o ŋmbrɔ Sosthenes pan hlɛ ŋga yiri,
2 na shie Nyiɛkpɔɔ sumifɛɛnlɛ mblɛ pee wa Corinth na pre pan. Pre Nyiɛkpɔɔ yeeri mu yire Yesu Kristo na mu pe pe cheche, pre na leele mblɛ pee wa lawee kro nu, mu na o Tafun Yesu Kristo wre yeeri pe Tafun, na o kro Tafun kre.
3 O lɛ Nyiɛkpɔɔ, na o Tafun Yesu Kristo wre pe e dumi, mbe e ŋga wejinyiŋge.
Mboo Ŋgaa
4 E ndra na ni Nyiɛkpɔɔ kaan mboo nyjila kro nu, ŋga u yire Yesu Kristo na mu e dumi kre ndra na.
5 Ŋga yire na Kristo pe nunu kre saara na, u e dwan kee kro na, mu tia e jawala ta, mu paara mu chin.
6 Ŋgi na hin? Yesu Kristo kee ŋga o yo a e loo kre didinyi kan e nu chichie.
7 Ki tia Ŋumu wre yirɛ nyjɛ u kaan yire ka keshian n kro e na, ŋga e yiɛ nyina a e na Nyiɛkpɔɔ sri mbe u o Tafun Yesu Kristo wɔ mbe nyina ŋga.
8 Nyiɛkpɔɔ we ti e yire gbiŋmbi mbe sɛ kɔ, imi kie pe ŋga ble o Tafun Yesu Kristo we pan kre, mbe wa pimi kee ka nya e na.
9 Kprafun wi Nyiɛkpɔɔ, wre u e yeeri na e pan mbe yire na u Biblɔ o Tafun Yesu Kristo wre pe nunu.
Nyu Nunu Ŋga Ki Fna
10 Ni wolo, ni e tali o Tafun Yesu Kristo wre mɛɛ ni, e na eyɛ nɔɔ ndru, imi kie pe mbe yaa eyɛ yɔɔlɛ, la, mbe e jaa pe nunu titi, mbe jaa jawala nunu wru kee na.
11 Ni wolo, leele plɛ yiri Chloe sele nu mu pan mu ni wɔ ndie na, e tuni eyɛ na.
12 Kee ŋga ni nyina yi na, e plɛ yuu na, “Paul kro wre taa, a plɛ na yuu na Apollos kro wre taa, a plɛ na yuu na Peter kro wre taa, a plɛ na yuu na Kristo kro wre taa.”
13 Pe Kristo wre yɔɔlɛ ree? Ndee mi Paul pra kan kanyana kumu kaan na mu e ŋga rɔ? Ndee mi Paul mɛɛ nu pra e ndrɛ je mu le ra?
14 Ni Nyiɛkpɔɔ kaan mboo na ni nsra e wa ndra je, fɔna Crispus, na Gaius bɔkɔ.
15 Kena e wa waa shia yo na ni mɛɛ nu pra u ndra je mu le.
16 Ni sɔɔnri na ndaa Stephanas, na u katoo wolo ndrɛ je na, mu ta mu kɔ pre na, ni n sɔɔnri na ndaa e wa ndra je na.
17 Ŋgi na hin? Kristo nsra ni tun na ni pan mbra leele ndrɛ jee. La, wra ni tun na ni paan ketaan kre kpali, a ki n pe lewo kachindɛ na. Na lewo kachindɛ kolo na yi kre, kena kaa Kristo kumu ŋga wra ku kanyana kaan na kre wa na jaŋga ta.
Kanyana Kumu Kaan Kre Kee
18 Ŋgi na hin? Kanyana kumu kaan kre, mblɛ pe shie mbe sɛ fun kre, pe ki kee le jijiere kee. La, wre mblɛ ŋmaa Nyiɛkpɔɔ shio kre, Nyiɛkpɔɔ jaŋga kee titi yi wre pan.
19 Ŋgi na hin? Pe ki nyunɔ Nyiɛkpɔɔ hlɛ kre nu mu tɛɛ mbo,
“Mbe kachimblɛ kachindɛ kla,
mbe ti kachimblɛ kee nyjɛ pe chin kro pe waara.”a
20 Sena kachiŋu nyi hin? A sena mbra nyinafun nyi hin? A sena waŋgra ŋga kakralifɛɛnlɛ pre nyi hin? Nyiɛkpɔɔ tia waŋgra ŋga kachindɛ kro pe jijiere kee.
21 Kachiŋu wi Nyiɛkpɔɔ, kre ndra na u n tia leele yire pre titi kachindɛ na, mu u chin. Kee ŋga o kpali, a plɛ na ki le jijiere kee kre, Nyiɛkpɔɔ mblɛ pe ki shɔnli kre ŋmaa shɔ.
22 Ŋgi na hin? Judae kawako kee chaa mbe nya mbe chin mbe shɔ mbe li, a mblɛ pe n pe Judae pre na kachindɛ haa chaa.
23 La, Kristo ŋmba pra kan kanyana kumu kaan na, a u pe gbrontohaa mu Judae ŋga, a u kee pe jijiere mblɛ pe n pe Judae pan kre, wre kee o kpali kre.
24 La, Judae, na leele mblɛ pe n pe Judae, a Nyiɛkpɔɔ pe yeeri kre, pre pan rɛ, Kristo wre kee o kpali, a wre wi Nyiɛkpɔɔ jaŋga, na Nyiɛkpɔɔ kachindɛ.
25 Ŋgi na hin? Nyiɛkpɔɔ kee ŋga plɛ yeeri jijiere kee kre, ki kachindɛ wɛ lewo kachindɛ na, a na Nyiɛkpɔɔ pɔlɛ kuraa kre, u faŋga wɛ lewo faŋga na.
Corinth Sumifɛɛnlɛ
26 Ni wolo, e jawa imi e na nyi fa, a Nyiɛkpɔɔ na chin mu e yeeri. E chiɛri plɛ e na kala chin waŋgra haa. E kro ma e na pe jaŋgafɛɛnlɛ, a e kro ma pra se lebiile.
27 La, ŋga leele jawa jijiere yira kre, Nyiɛkpɔɔ u ki wɔ, mu tia nyifɛɛrɛ kachimblɛ gbo. A yira ŋga leele jawa na ki pɔlɛ kuraa kre, Nyiɛkpɔɔ u ki wɔ, mu tia nyifɛɛrɛ faŋgafɛɛnlɛ gbo.
28 A ŋga leele le yira waara, mu na jawa na yaka yira ma kuraa kre, kre Nyiɛkpɔɔ wɔ mu tɛɛ mu ŋga leele jawa na ki pe keshian yira waŋgra ŋga nu kre kla.
29 Imi kie pe mbe ndro wa jaa uyɛ kpɔɔ wre Nyiɛkpɔɔ yiɛ.
30 La, Nyiɛkpɔɔ wre u tia yire na Yesu Kristo pan mu pe nunu. A wre u tia Kristo pan mu pe o kachindɛ. U saara na, o fraka Nyiɛkpɔɔ yiɛ, mu pan mu pe Nyiɛkpɔɔ leele mblɛ o pe cheche, a u o shɔ.
31 Kena e ti o pe imi na pe ki nyunɔ Nyiɛkpɔɔ hlɛ kre nu mu tɛɛ kre mbo,
“Ŋmba u chaa mbe uyɛ kpɔɔ kre, u uyɛ kpɔɔ kee ŋga Nyiɛkpɔɔ pe nu.”b