3 Nyiɛkpɔɔ Biblɔ ŋmba wi o Tafun Yesu Kristo wre, u kee yi ketaan kre, ŋga we pan lewo kre, ŋunu David sele nu pra u se.

4 La, Kpra Ŋumu wre na u wɔ mu nyina na Nyiɛkpɔɔ Biblɔ wi. A wra u nyi mna yili kuulo nu.

5 U mɛɛ kre saara na, o yire u na mu dumiɛ ta, mu pe bitumblɔ, mu yire ki na mbe leele mblɛ pe n Nyiɛkpɔɔ chin pre yire shɔnlie na, mbe ndie tɛɛ u kee kre na.

6 A yire mblɛ e yiri Rome na, a Nyiɛkpɔɔ e yeeri na e pe Yesu Kristo wolo pre kro, e chaa.

7 Kena yire mblɛ Nyiɛkpɔɔ kori Rome na, mu e yeeri na e pan mbe pe u wolo kre, e kro ni nyunɔi hlɛ ŋga. O Lɛ Nyiɛkpɔɔ wre, na o Tafun Yesu Kristo wre pe e dumi, mbe e ŋga wejinyiŋge.

8 Ŋga ki yiɛklu, ni yire Yesu Kristo na, na ni Nyiɛkpɔɔ kaan mboo e ndra na. Ŋgi na hin? Waŋgra kro e shɔnlie kre kee loo.

9 Nyiɛkpɔɔ ŋmba ni sumi na ni loloŋgo kro ni, na u Biblɔ wre ketaan kre kpali kre, we jaa ni dansiɛrɛ li na ni e sɔɔnri,

10 ni nyiɛtalaa nu nyjila kro nu. Ni tali na Nyiɛkpɔɔ nyjila chichie nu kre, u ni ŋga kolo mbe ni paan e shaari.

11 E la ni ta, a ndaa e chaa mbe nya, mbe mi ni yire dwamu ŋga Nyiɛkpɔɔ yire u ŋumu na mu ni ŋga kre yɔ, mbe ki ti e faŋga ta.

12 Kee ŋga ni nyina yi na, o kro we ya oyɛ na. Yire we ka ya mi shɔnlie na, mbe mi ka ya e shɔnlie na.

13 Ni wolo, ni chaa mbe e chin na, nyjila tataara nu, ni chaa mbe pan mbe e nyaa shaari, la, kaalɛɛ yɛ yi ni toni kolo. Ni leele chaa Rome na wa mbe pe pe Kristo wre wolo, imi na ni plɛ ta e ŋmbilɛ mblɛ pe n pe Judae pre nu kre.

14 Ni fɔlɔ li leele kro yiɛ, ŋgi na hin? Ki fna mbe ni ketaan kre kpali mblɛ yiɛ ki nyaa, na mblɛ yiɛ ki n nyaa, mblɛ pe chin, na mblɛ pe n chin kro nu.

15 Kre ki ni yiɛ nyina, a ndaa chaa mbe ketaan kre kpali yire mblɛ ee wa Rome na pre pan na.

16 Ni n na nyifɛɛrɛ pini ketaan kre na. Ŋgi na hin? Kre yi Nyiɛkpɔɔ jaŋga ŋga na u yire mbe shɔnlifɛɛnlɛ kro ŋmaashɔ, Judae pie yiɛklu, mbe mblɛ pe n pe Judae pre chin mbe taa.

17 Ŋgi na hin? Ketaan kre ki lewo nyina kolo ŋga na Nyiɛkpɔɔ yire, mu o fraka u yiɛ. Kre yi na lewo we nɔɔhle shɔnlie ni mbe sɛ kɔ. Imi na pe ki nyunɔ Nyiɛkpɔɔ hlɛ kre nu mu tɛɛ kre mbo, “Frakafɛɛnlɛ we yire shɔnlie na mbe ŋmaa ta.”

18 Nyiɛkpɔɔ u krɔkuɔn ŋga ki yiri nyjeeri kre wɔ fimi na, kra paan sisaapefɛɛnlɛ mblɛ sisam ki kpra kee kre toni, mbe kia chin pre na.

19 Ŋgi na hin? Pe u kee ŋga ki fna mbe pe chin kro chin. Wre Nyiɛkpɔɔ wre titi u pe nyina ki yi chasi.

20 Mu yire ŋga Nyiɛkpɔɔ waŋgra gbeele, u yirɛ nyjɛ yi n na nyaa nyiɛlɛ ni yire, u jaŋga ŋga kii wa nyjila kro nu kre, na u kepele ŋga kii kawako ni mu tro kre, lewo yi kro nyaa yirɛ nyjɛ wre Nyiɛkpɔɔ gbeele yire nu, imi kie pe mbe lewo wa nyu wɔɔ ka ta.

21 Pe Nyiɛkpɔɔ chin, la, pia u ŋga buuro, mbaa yo mboo pie u ŋga. Kewɛɛ yii wa pe jawala nu, a pe lolonyi wɔ.

22 Pe jawa na pe kala chin, la, jijiele lɛ.

23 Ŋga ki fna mbe praa Nyiɛkpɔɔ ŋmba wraa ku fio wre sumi kre, a pe wre ti, mu sɛɛnlɛ pe, a yɛ leele, na hanyiɛlɛ, na puɛ yurɛ wru, a yɛ pe na yurɛ mblɛ pe fulo lɛ, na yi sumi.

24 Ki tia Nyiɛkpɔɔ kɛ laa pe na, a pra sisam kee nyjɛ pe lolonyi chaa pini, na nyifɛɛrɛ kaalɛɛ pini pe wejikaara ni.

25 Pe Nyiɛkpɔɔ kekpra wru mu pe kafinɛ, mu na yirɛ nyjɛ Nyiɛkpɔɔ gbeele yire sumi, mu wre ŋmba u yi gbeele wre ti. Wre ki fna mbe praa kaan mɛɛ nyjila kro nu. Ami!

26 Yire kaalɛɛ nyjɛ leele pini kre ndra na, Nyiɛkpɔɔ kɛ laa pe na, mu pe wa pe nyifɛɛrɛ niŋge kolo na, hali a pe chiɛlɛ bilɛ sinlɛ kolo ŋga Nyiɛkpɔɔ wa kre ti, na sni na peyɛ ni kolo ŋga ki n fna na.

27 Pan chɔɔ, pe bilɛ chiɛlɛ sinlɛ kolo ti, a pe niŋge sisaa tia bilɛ pre na sni na peyɛ ni. Pe yire nyifɛɛrɛ niŋge kee nyjɛ pini. Pe sisam kepele nyjɛ ndra na, Nyiɛkpɔɔ we pe ndie tini imi na ki fna.

28 Ŋga leele n Nyiɛkpɔɔ kee wru mu le pe jawala nu kre ndra na, Nyiɛkpɔɔ pe ti a pra taari pre titi sisam jawala kee na. Ki tia kee nyjɛ yi n fna mbe praa pini kre, yire pe pini.

29 Sisam kee nyininyini yi pe nyi. Jajaara, na keyira, na nyibinyiɛ sisaa, na linkuuro, na kakrɔ, na fanaa, na jawala fɔɔn, na kroyoo,

30 na kabaara, na Nyiɛkpɔɔ prara, nyibishelee, na yɛkpɔɔmu, na nyukpɔɔmu kee bribri yi pe nyi. Nyjila kro nu sisam kee pe jawa mbe pe, a praa ndie tɛɛ pe sefɛɛnlɛ kee na.

31 Pe n kala chin, a pra kpra li, a pe n peyɛ kori, a pe n peyɛ fooro chin.

32 Pe chin na Nyiɛkpɔɔ mbra yo na, leele mblɛ pe yire kee nyjɛ pini kre, kumu ki fna na pe ni. A yire kee nyjɛ chiin pee na ma pe kro kple, pe plɛ gbeŋmba pra yi pini na yaa.