Nyiɛkpɔɔ Kprakuɔn
2
Lewo ŋmba mu mu ŋmbrɔ gbun na pimi ni kee ka na kre, nyu wɔɔ ka n wa mu pan, imi na mu nyi kpan. Ŋgi na hin? Na mu ndro gbun pimi ni kee ka na, mu kɔ kre kro mu sɛ kre kee kre chɔɔ pe kre, kena ŋu titi muyɛ gbun pimi ni.
2 O chin na ki fraka na Nyiɛkpɔɔ we leele mblɛ pe yire kee nyjɛ pini pre gbun pimi ni.
3 Kena lewo ŋmba we u ŋmbrɔ gbun pimi ni kee ka na, mbe kɔ ki na mbe sɛ kre kee kre chɔɔ pe kre, u jawa na we shɔ Nyiɛkpɔɔ pimi kuɔn kre nu ree?
4 Ndee e Nyiɛkpɔɔ lɛɛnyiŋge kpɔɔ kre, na u fooro chiɛn, na u frɔ kre le yira fiɛn ree? E n chin na Nyiɛkpɔɔ lɛɛtnam kre, chaa u chaa mbe e e jawala chinɛ mbe laa e sisam kro ra?
5 La, ŋga e ndikana tia e n na chaa mbe e jawala chinɛ kre ndra na, ndie tiniɛ kpɔɔ e chaa na teeri eyɛ pan Nyiɛkpɔɔ krɔ kun ble ŋga nu we u frakaa kprakuɔn kre wɔ mbe nyina kre nu.
6 Nyiɛkpɔɔ we ndro kro kepele le mbe u fɔlɔ tɔ imi na ki fna.
7 Mblɛ pe frɔ taa, mu yire ki na na chichie pini, mu na yɛnyiŋge, na buuro chaa, na chaa mbe mɛɛ ta kre, we pe ŋga blenyini ŋmaa.
8 La, leele mblɛ pe wii pre chiin wo na, na mblɛ pe kekpra kre je, mu taa kefuɛn kro kre, pre pie Nyiɛkpɔɔ krɔkuɔn kpɔɔ kre nya.
9 Kanyana, na wejiwrɛ kpɔɔ we pan leele mblɛ pe sisaa pini kro na. Judae na kie klu mbe yire, mbe chiin da mblɛ pe n pe Judae pre na.
10 La, Nyiɛkpɔɔ we mblɛ pe chichie pini pre kro ŋga yɛnyiŋge, na kpɔɔmu, na wejinyiŋge. Judae pie yiɛ klu, mbe mblɛ pe n pe Judae pre chin mbe taa.
11 Ŋgi na hin? Nyiɛkpɔɔ n na yoori.
Kprakuɔn Ŋga Ki Fna
12 Leele mblɛ pe n Moses mbra yire chin kre, na pe sisaa pe, pie ku mbe fun. Judae pre Moses mbra yire chin. Na pe kɔ yi na mu sisaa pe, pie yire mbra yire na mbe pe kpra kun.
13 Ki n pe mblɛ pe Moses mbra yire kee ndru pre pe fraka Nyiɛkpɔɔ yiɛ, la, mblɛ pe lii mbra yire na pre pe fraka.
14 Mblɛ pe n pe Judae pre ma pra Moses mbra yire ta, la, nyjila ka nu pe yire pe jawala kee na na lii nyjɛ mbra yire yo na. Ki tia pre titi kaari mbra mu peyɛ ŋga. Kii wa na pre ma Nyiɛkpɔɔ na ŋga Moses mbra yire.
15 La, pe kepele nyina na kee nyjɛ Moses mbra yire nyina yiree wa pe lolonyi nu, pe lɛɛ kee dansiɛrɛ lii na yɛŋgɛ yi. Ŋgi na hin? Nyjila ka nu pe jawala pe gbuun pimi ni, na pe kaan tam nyjila ka nu.
16 Imi ketaan ŋga ni kpali kre nyina kre, brikana Nyiɛkpɔɔ we yire Yesu Kristo na mbe leele kro ndrandra kee kro kpra kun.
Judae Ndikana
17 Kena yire mblɛ e eyɛ yeeri Judae, mu eyɛ wru mu taa mbra yire na, mu na eyɛ kpɔɔri Nyiɛkpɔɔ ni kre,
18 e chin kee ŋga Nyiɛkpɔɔ chaa mbe e na pini, a e mbra yire tuan, mu kee ŋga ki nyu chin.
19 A yire titi chin na yire e fuunlo nyina kolo, mu pe kania mu mblɛ pee wa wɔmu nu ŋga,
20 a yire e jijiele, na mblɛ pe n yaka chin pre nyina, a yire titi Nyiɛkpɔɔ mbra yire chin, mu kpra kre chin.
21 Kena ŋu ŋmba mu pe leele nyinafun ŋga, mu muyɛ nyina ŋgaa? Ŋu ŋmba mu yo pia na juu kre, ŋu titi juu ree?
22 Ŋu ŋmba mu yo na ndro waa tiɛri kre, ŋu titi tiɛri ree? A ŋu ŋmba mu sɛɛnlɛ fun kre, mu sɛɛn yirɛ juu yi nyinyi nu ra?
23 Ŋu ŋmba mu muyɛ kpɔɔri na Nyiɛkpɔɔ mbra ni kre, mu u mbra taanla na u pini fiɛn ree?
24 Ŋgi na hin? Pe ki nyunɔ Nyiɛkpɔɔ hlɛ kre nu mbo, “Yire Judae pre kepele na, mblɛ pe n pe Judae pre paara na Nyiɛkpɔɔ taanla.”
Fɛkɔɔnrɔ Chiriri
25 Na mu taa Moses mbra na, kena fɛkɔɔnrɔ tnu ni, la, na mu n na lii mbra yire na kre, kena pan mu nyi na ndro ŋmba fɛŋgɛ pe n kun wi.
26 Na ndro n pe Judae ndro, a pe n u fɛŋgɛ kun, na u waa li mbra yire na, kena Nyiɛkpɔɔ wa u shɔ na fɛkɔɔnrɔ wi ra?
27 Kena mblɛ pe n pe Judae kre, pie yire Judae pre gbun pimi ni. Ŋgi na hin? Yire pra mbra yire nyunɔ mu ŋga, mu yire yi na mu e fɛnyi knumu, a e je e n li yi na. La, pre li mbra yire na, nde pe n pe fɛnyi knumu.
28 Kena na mu muyɛ pe Judae ndro mu tnimu nu, a pe mu fɛŋgɛ kun kre, kia jaa ti mbe mu pe Judae wo titi.
29 Judae wo titi wi ŋmba u chinɛ u loloŋgo nu, a Nyiɛkpɔɔ ŋumu u kre pini, la, ŋga mu taa Moses mbra yire na ma. Wre ndro wre Nyiɛkpɔɔ pan u mɛɛ chaa, lewo pan ma.