Kprafun Wi Nyiɛkpɔɔ
3
Kena yira ŋgi ni Judae wo wɛ ŋmba u n pe Judae wo na hin? Ndee tnu ŋgi kii wa fɛkɔɔnrɔ nu hin?
2 Kolo ŋga na Judae wo wɛ yi na, ŋga ki yiɛklu, Nyiɛkpɔɔ kee kre, pre kɛɛ wra ki le.
3 La, pe nɛɛrɛ nsra kee kre shɔ mu li, a ŋga pre nsra shɔ mu li kre wa jaa Nyiɛkpɔɔ shɔnlie kre gbun mbe wa.
4 Kia jaa pan ma. Nyiɛkpɔɔ rɛ, wre pe kprafun nyjila kro nu, a ndro kro pe kafnu. Pe ki nyunɔ Nyiɛkpɔɔ hlɛ kre nu mu tɛɛ mbo,
“Leele we chin na Nyiɛkpɔɔ kpra yuu nyjila kro nu,
a na u pe kee lii kre, pie nya na u fraka.”a
5 Kena na o sisam ki tia Nyiɛkpɔɔ kpra kiyɛ wɔ chasi kre, oo jaa yo na, na Nyiɛkpɔɔ o ndie tinii kena u sisaa pe ree? Kee nyjɛ plɛ yuu ni yuu kre.
6 Pan ma ki nyi. Na Nyiɛkpɔɔ n fraka, mni we pe mbe jaa waŋgra leele kpra kun hin?
7 Kena na ni kafinɛ na Nyiɛkpɔɔ kpra we yire mbe kiyɛ wɔ chasi, mbe ki ti u yɛnyiŋge ta waa, ŋgi kie ti mbe ni pimi li na sisaapefun wi mi na hin?
8 Kena ŋgi ki tia waa yo na “E ti mbe o na sisaa pini mbe ki pan hɛɛra ni hin?” Pan leele plɛ kala taari o na, na o tɛɛlɛ na yuu na kre kee ŋga o leele nyina. Nyiɛkpɔɔ we pre leele mblɛ gbun pimi ni imi ki fna.
Lewo Kro Sisaa Pe
9 Kena ŋgi oo yo hin? Kena kolo ŋgi na wre Judae wɛ mblɛ pe n pe Judae na hin? O n wɛ pe na kolo ka na. Ni klu mu ki yo na wre Judae o, na mblɛ pe n pe Judae o, sisam jaŋga ta o kro na.
10 Imi na pe ki nyunɔ Nyiɛkpɔɔ hlɛ kre nu kre mbo,
“Lewo n wa mu fraka,
hali ndro nunu chom kuraa n wa.
11 Ndro n wa na kee nɔɔ ndru,
ndee na Nyiɛkpɔɔ haa chaa.
12 Pe kro laa Nyiɛkpɔɔ kro,
mu na kefuɛn pini.
Wa n wa na ŋga ki fraka pini,
hali nunu chom kuraa n wa.”b
13 “Pe nyu kayooro ndio na pe gboo faŋga nyaa,
a pe ndile ni pe leele fana,”c
“A wɔɔ sisaa tɛɛnrɛ yii wa pe nyu hlɛ na.”d
14 “Suŋgɔ, na nyu susrom kee yi pe nyu nyi.”e
15 “Pee nyaanyaa nyimi knanwoo na.
16 Mna pie tro kpan, dɔɔya na klaa pie ti wa,
17 a pe n wejinyiŋge kolo chin.”f
18 “A Nyiɛkpɔɔ fiɛrɛ n wa pe yiɛ na.”g
Judae Pimi Li Na
19 Fuŋga o chin na kee nyjɛ Nyiɛkpɔɔ mbra yire yuu kro, mblɛ pee wa mbra yire jaara pre pan yi paara, imi kie pe mbe leele wa nyu wɔɔ ka ta, mbe ki ti Nyiɛkpɔɔ yire yi na mbe waŋgra leele kro kala li.
20 Ŋgi na hin? Nyjɛ mbra yo o pe kre, ndro wa jaa li yi na mbe fraka Nyiɛkpɔɔ yiɛ. Nyjɛ mbra yire pini yi na, yie ti mbe lewo chin na u sisaa pe.
Sisam Tinkɛɛ
21 La, Nyiɛkpɔɔ kolo ŋga na u lewo fraka kre, u ki wɔ mu o nyina, a ki n pe Moses mbra yire kolo na. Moses mbra yire, na Nyiɛkpɔɔ keenyanyofɛɛnlɛ pre na kre kolo ŋga dansiɛrɛ li.
22 Kre frakaa kre yire Yesu Kristo shɔnlie na, a leele mblɛ pie u shɔ mbe li kro we fraka. Na wraa yoori.
23 Ŋgi na hin? Ndro kro sisaa pe, a ki tia Nyiɛkpɔɔ yɛnyiŋge ŋga oo na ta kre o bɔ.
24 La, Nyiɛkpɔɔ dumiɛn ŋga u kaan finfin kre ndra na, u yire Yesu Kristo na mu tia o kro fraka, a u o shɔ o sisam kɛɛ mu wa.
25-26 Nyiɛkpɔɔ na u tɛɛ mu sra wɔ, mbe o yire u nyimi nyjɛ wra kna mu wo yire shɔnlie na mbe sisam tinkɛɛ ta. Nyiɛkpɔɔ na kre kee ŋga pe mu nyina na u fraka. Fa kre, wra frɔ, mna nyiɛlɛ ka mu wa leele sisam na. La, nyjila ŋga nu o nyi ŋga, Nyiɛkpɔɔ wa nyiɛlɛ ka mbe wa lewo sisam na na. We lewo nyina na u fraka. Kre kolo ŋga na Nyiɛkpɔɔ lewo nyina na wre titi fraka, a ndro ŋmba u Yesu Kristo shɔ mu li kro, Nyiɛkpɔɔ u le na u fraka.
Waa Jaa Yaka Tɛɛ Mbe Oyɛ Kpɔɔ
27 Kena ŋgi ni oo tɛɛ mbe oyɛ kpɔɔ na hin? Yaka n wa. Kena ŋga o lii Moses mbra yire na kre na oo oyɛ kpɔɔ ree? Ɔɔhɔn. La, ŋga o Yesu Kristo shɔ mu li kre na yi.
28 Ŋga o chin yi na, shɔnlie na Nyiɛkpɔɔ lewo le na u fraka, a ki n pe ŋga we taa Moses mbra na yi.
29 Ndee e jawa na Nyiɛkpɔɔ wre, Judae chiin wo wi ra? Mblɛ pe n pe Judae pre Nyiɛkpɔɔ ma na ree? Pe Nyiɛkpɔɔ wi na. U pe mblɛ pe n pe Judae wo na.
30 Nyiɛkpɔɔ wree nunu chom, a Judae shɔnlie na we yire mbe pe shɔ, a pan chɔɔ we yire shɔnlie na mbe mblɛ pe n pe Judae pre shɔ na.
31 Kena o yire shɔnlie na mu Moses mbra yiree wa ree? Ɔɔhɔn, pan ma ki nyi. Mbra yiree wa imi na yi nyi.