Abraham Kee
4
Kena kee ŋgi oo ta mbe yo mbe wru o tolɛɛ Abraham haa hin?
2 Na Abraham kee nyjɛ wra pe na Nyiɛkpɔɔ na u le na u fraka kre, we na kee ta mbra uyɛ kpɔɔ, la, wa jaa uyɛ kpɔɔ Nyiɛkpɔɔ yiɛ.
3 Nyiɛkpɔɔ kee ŋga pe nyunɔ mu tɛɛ kre yo mbo,
“Abraham na Nyiɛkpɔɔ shɔnli,
a u shɔnlie kre ndra na,
Nyiɛkpɔɔ na u shɔ na u fraka.”a
4 A na lewo tnumu tun kre, pra u fɔtɔɔrɔ le na yira ŋga pe u kɛ yi, la, ki pe tnumu ŋga u tun fɔtɔɔrɔ.
5 A lewo ŋmba u n uyɛ taa u kepele na, la, mu Nyiɛkpɔɔ ŋmba u sisaapefɛɛnlɛ le na pe fraka wre shɔnli kre, wrefun shɔnlie Nyiɛkpɔɔ we le mbe yo u fraka.
6 Ŋunu David na ki yo na lewo ŋmba Nyiɛkpɔɔ shɔ na u fraka, a ki n pe kee nyjɛ u pe na yi kre, ufun wo yi dwamu.
7 Mbo,
“Mblɛ punɔɔ na Nyiɛkpɔɔ yiɛ wɔ,
mu pe sisam ti mu pe kɛ pre wo yi dwamu.
8 Lewo ŋmba sisam o Tafun Nyiɛkpɔɔ wre wa sɔɔnri,
wre wo yi dwamu.”
Fɛkɔɔnrɔ Ma Ki Lewo Fraka
9 Kre dwamu ŋga kee ŋunu David yo ŋga, fɛkuɛn chiin wo yi ree? Ɔɔhɔn. Mblɛ fɛnyi pe n knumu pre wo yi na. Ŋgi na hin? O klu mu yo na, “Abraham na Nyiɛkpɔɔ shɔnli, kre kra tia wra u shɔ na u fraka.”
10 Nyjila ŋgi nu kre kee ŋga na pe hin? Kra pe a wra chin mu u fɛŋgɛ kun ree, ndee u fɛkɔɔnrɔ kɔkro na yi hin? U fɛkɔɔnrɔ kɔkro na ma. Nyiɛkpɔɔ na yo na u fraka, a wra chin mu u fɛŋgɛ kun.
11 Ŋga Nyiɛkpɔɔ na yo Abraham fraka kre kɔkro wra u fɛŋgɛ kun. U fɛkɔɔnrɔ kre pe sɛmbɛɛrɛ yira, a ki nyina na u shɔnlie na Nyiɛkpɔɔ na u shɔ na u fraka. Ki tia Abraham pe Nyiɛkpɔɔ shɔnlifɛɛnlɛ kro lɛ, a Nyiɛkpɔɔ pe shɔ na pe fraka, hali na pe n pe fɛnyi knumu.
12 A mblɛ fɛnyi pe knumu kre, pe lɛ wi Abraham na chɔɔ, ki n pe ŋga pe pe fɛnyi knumu kre na yi, la, ŋga pe taa Abraham shɔnlie ŋga wra ta mna chin mu u fɛŋgɛ kun kre na yi.
Shɔnlie Ki Nyiɛkpɔɔ Nyu Yoo Kre Taa
13 Nyiɛkpɔɔ na nyu yo Abraham na u sele leele pan na pe wo yi waŋgra ŋga. Ŋga Abraham na li Moses mbra yire na kre ma kra tia wra yo u pan ma, la, ŋga wra shɔnli, a Nyiɛkpɔɔ na u le na u fraka kre kra tia.
14 Kena na Nyiɛkpɔɔ nyu ŋga wra yo kre, na mblɛ pe li mbra yire na pre chiin wo yi kre, kena lewo shɔnlie pe finfin, a Nyiɛkpɔɔ nyu ŋga u yo mu tɛɛ kre pe waara.
15 Mbra yire, Nyiɛkpɔɔ krɔkuɔn ni yire paan. Kena mna mbra n wa kre, ndro na mbra taan bawa.
16 Kena shɔnlie na ki yire a nyu yoo kre pan, mbe ki ti o chin na Nyiɛkpɔɔ nyu ŋga u yo kre pe yira ŋga u kaan finfin, a u Abraham sele leele kro kɛ ki yi. Kena nyu ŋga Nyiɛkpɔɔ na yo kre, Abraham sele leele mblɛ pe taa mbra yire kro pre chiin wo ma. La, mblɛ pra shɔnli na Abraham wi pre kro wo yi. Ŋgi na hin? Shɔnlifɛɛnlɛ kro lɛ wi Abraham.
17 Imi na pe ki nyunɔ mu tɛɛ Nyiɛkpɔɔ hlɛ kre nu kre mbo,
“Ni mu pe waŋgrɛ tataara lɛ.”b
Nyiɛkpɔɔ yiɛ na, o lɛ wi Abraham. A wre Nyiɛkpɔɔ Abraham na shɔnli, a wre u gboolo kaan ŋmaa, a wre u paara mbe yirɛ nyjɛ yi n wa fa pan.
18 Abraham naa kaan, mna shɔnli, nyjila ŋga ni kaan yira nsraa wa, a kra tia wra pe “waŋgrɛ tataara lɛ.” Imi na pe ki nyunɔ mu tɛɛ kre mbo,
“Pan mu sele leele we nɛɛ na wɔɛlɛɛ yi.”c
19 Wra ta yɛlɛ lafaa, nde ka nsra kun u shɔnlie na, wra u wejikaara le, mna chin na u da kumu kɛ na, nde na u chɔ n se.
20 U nsra u shɔnlie wa, a Nyiɛkpɔɔ nyu kee ŋga wra yo kre, u nsra ki li kakra. Wra faŋga ta shɔnlie nu, na Nyiɛkpɔɔ kaan yɛnyiŋge.
21 Wra shɔnli poŋgo na Nyiɛkpɔɔ we jaa kee ŋga u yo mu tɛɛ kre pe.
22 Kre kra tia Nyiɛkpɔɔ na yire Abraham shɔnlie na mna u shɔ na u fraka.
23 Kee kre pe nyunɔ Nyiɛkpɔɔ hlɛ kre nu mu tɛɛ na, “Nyiɛkpɔɔ u shɔ na u fraka kre” wre chiin na ma pra ki nyunɔ,
24 la, wre mblɛ Nyiɛkpɔɔ we shɔ na o fraka kro pan pra ki nyunɔ. Wre o shɔnli na Nyiɛkpɔɔ wra o Tafun Yesu wre nyi mu yili kuulo nu kre.
25 Wre Yesu ŋmba pra gbo o sisam ndra na, mna u nyi mu u ŋga ŋmaa, mbe u o fraka Nyiɛkpɔɔ yiɛ.