Shɔnlie Taahaa
5
Kena na ki yire shɔnlie na a o fraka kre, wre na Nyiɛkpɔɔ wa tam nu, mu yire o Tafun Yesu Kristo wre na.
2 Ŋga o shɔ mu li kre na o dumiɛ ŋga nu o nyi ŋga ta, a o yiɛshɔ o dankna ŋga oo ta Nyiɛkpɔɔ yɛnyiŋge nu kre na.
3 A o kanyana nu na chɔɔ o yiɛshio. Ŋgi na hin? O chin na kanyana ki paan na frɔ ni,
4 a frɔ ki tii mbe lewo yire gbiŋmbi, a kre ki paan na dankna ni.
5 Kre dankna ŋga wa ti mbe nyifɛɛrɛ o gbo. Ŋgi na hin? Nyiɛkpɔɔ yire Kpra Ŋumu ŋmba u o ŋga wre na, mu u koroo le o lolonyi nu.
Koroo Ŋga Kii Wa Kristo Kumu Nu
6 Nyjila ŋga nu jaŋga ka n nsraa wa o nu kre, kre Kristo na ku mu wre sisampefɛɛnlɛ ŋga.
7 Ki sheli na ndro we ku mbe lewo ŋmba u fraka ŋga. La, kie jaa pan na ndro we yila ndro chichie na mbe ku.
8 La, Nyiɛkpɔɔ o nyina imi u o kori mu da. Ŋgi na hin? Nyjila ŋga ni o na pe sisampefɛɛnlɛ kre, Kristo na ku mu o ŋga.
9 Kena ŋga u nyimi yire tia o fraka ŋga, ŋgi kie ti mbe wa o shɔ mbe yili Nyiɛkpɔɔ krɔkuɔn kre nu hin?
10 O na Nyiɛkpɔɔ yii loŋgo, a u yire u Biblɔ wre kumu na mu o wru nɔɔlɔ. Ŋga u ta mu o pe u nɔɔlɔ ŋga, ŋgi kie ti mbe wa yire u Biblɔ wre na mbe o shɔ hin?
11 Kre chiin ma kple. O yire o Tafun Yesu Kristo ŋmba u tia wre na Nyiɛkpɔɔ nɔɔlɔ wru wre na, a o yiɛ na shio Nyiɛkpɔɔ wre nu.
Adam Na Kumu Yire Mu Pan
12 Ndro nunu na sisam yire mu pan waŋgra nu, a u sisam kre ki pan kumu ni, a ki tia lewo na kuu. Ŋgi na hin? Ndro kro sisaa pe.
13 Ŋgi na hin? Sisam naa wa waŋgra ŋga nu, a Nyiɛkpɔɔ na chin mu Moses mbra yire le, la, lawee ŋga nu mbra n wa kre, pra sisam tɔɔnri wa.
14 A mu yire Adam na mu pan mu su Moses na kre, kumu jaŋga ta ndro kro na, hali mblɛ pe nsra sisaa pe a kra da na Adam ndikana ŋga wra pe kre ni kuraa, kumu jaŋga lii pe na. Imi Adam na pan kre chɔɔ, kre kolo kre na Yesu tro mu pan.
Yesu Na Ŋmaashɔmu Yire Mu Pan
15 La, pe kro shiin pre n pe nunu. Ŋgi na hin? Yira ŋga Nyiɛkpɔɔ o kɛ kre n pe na Adam sisam kre yi. Ki pe kpra na ndro nunu sisam kre na tia lenɛɛrɛ na kuu. La, Nyiɛkpɔɔ dumiɛ kre kpɔɔ mu wɛ, a u yire Yesu Kristo na mu tia lenɛɛrɛ dumiɛn kre ta finfin.
16 Nyiɛkpɔɔ yira ŋga u o ŋga finfin kre, na lewo nunu wre sisam kre n pe nunu. Sisam nunu kre na ki yire a pimi lie pan, la, o sisam tataara pee kɔkro kre, Nyiɛkpɔɔ yira ŋga u o kɛ kre pan tam lie ni.
17 Ki pe kpra na ndro nunu wre sisam na ki yire, a kumu na ŋunumu lii, pan chɔɔ mblɛ Nyiɛkpɔɔ dumi mu yire Yesu Kristo na mu pe fraka pre we yire Kristo wre na mbe ŋmaa ta, mbe ŋunumu li.
18 Kena, imi na ndro nunu chom sisam pee pan pimi ni leele kro na kre, pan chɔɔ ndro nunu frakaa pan na tam ni, a leele kro ŋmaa ta.
19 A imi ki yire ndro nunu ndikana na, a lenɛɛrɛ kaari sisampefɛɛnlɛ kre, pan chɔɔ ki yire ndro nunu yɛnyjiimu na, mbe lenɛɛrɛ fraka Nyiɛkpɔɔ yiɛ.