Kristo Wre Tia O Ŋmaa Ta
6
Kena mni oo yo hin? O kro mbra hankɛ lee mbe Nyiɛkpɔɔ dumiɛ nɛɛ ra?
2 Pan ma ki nyi, mni mbe wre mblɛ o ku mu yili sisam nu kre je mbe kro sisam nu tɛ hin?
3 Ndee e n chin na wre mblɛ ndra pe je Yesu Kristo nu kre, pan ki nyi na wre na wre pra gbo ra?
4 A pan o ndra jee kre nyi na wre na Yesu pra chaa mu gbo, mu o chaa mu le. Kena imi na u lɛ wre na u yɛnyiŋge kre jaŋga tɛɛ mna u nyi mu yili kuulo nu kre ti mbe o ŋmaa fɔŋgɔ ta.
5 Kena na wre na wre pe nunu, a wre na wre chaa mu kre kumu ŋga nyini ku imi na wra ku kre, pan chɔɔ wre na wre we pe nunu, mbe nyi mbe ŋmaa ta na wre wi.
6 Ŋgi na hin? O chin na o kepele lɛɛ kre na Kristo chaa mu ku kanyana kumu kaan kre na, imi kie pe mbe o sisam wejikaara kre wa kro mbe pe sisam tnu na.
7 Ŋgi na hin? Na lewo ku, kena u shɔ sisam kɛɛ.
8 Kena na wre na Kristo wre chaa mu ku, o shɔ mu li na u saara na oo nyi mbe ŋmaa li.
9 Ŋgi na hin? O chin na ŋga Kristo wre ta mu nyi mu yili kuulo nu ŋga, wa jaa ku na, na kumu n jaŋga ni u na na.
10 Kumu ŋga wra ku kre ndra na, wra ku mu sisam jaŋga gbo, a wa ku na fio. A ŋmaa ŋga u ta kre, u ki ta mu tni mu Nyiɛkpɔɔ ŋga.
11 Pan chɔɔ ki fna mbe yire titi eyɛ jawa na e ku mu yili sisam nu, mu yire Yesu Kristo na mu ŋmaa ta mu tni mu Nyiɛkpɔɔ ŋga.
12 Kena yaa ti mbe sisam ŋunumu li e wejinyi nyjɛ yie jaa ku yire na, mbe ti e taa e sisam niŋge yirɛ kro.
13 A yaa e kokoo ka tɛɛ mbra sisaa pini, mbe ki kaari kefɔɔn pe yira. La, e eyɛ wru e Nyiɛkpɔɔ ŋga, na leele mblɛ e ku, a u e nyi lɛ. E eyɛ wru e Nyiɛkpɔɔ ŋga poŋgo, mbe u e tɛɛ mbe kee nyjɛ yi fraka pe.
14 Sisam n fna mbe ŋunumu li e na. Ŋgi na hin? E n wa mbra jaara, Nyiɛkpɔɔ dumiɛ jaara e nyi.
Kristo Wolo Fna Mbe Fraka
15 Kena ŋgi oo pe hin? Ŋga oo wa Nyiɛkpɔɔ dumiɛ nu, a o n wa mbra jaara kre ndra na, o kro mbra sisaa pini ra? Pan ma ki nyi.
16 E n chin na na e eyɛ wru mu ndro wa ŋga na tinlɛ lɛ yire, mbe li ufun kee na kre, kena ŋmba kee na e lii wre tinlɛ lɛ yire ra? Kena na e eyɛ pe tinlɛ mu sisam ŋga ki shie na lewo ni kumu nu ŋga kre, kena ki tinlɛ lɛ yire. A na e eyɛ nyjii mu kolo ŋga ki lewo fraka Nyiɛkpɔɔ yiɛ ŋga kre, kena ki tinlɛ lɛ yire. Kolo ŋga ee eyɛ nyjii mbe ŋga kro, ki tinlɛ lɛ yire.
17 La, Nyiɛkpɔɔ mboo. Ŋgi na hin? Sisam tinlɛ na lɛ yire fa, a fuŋga e e lolonyi kro tɛɛ mu li kpra kee ŋga Nyiɛkpɔɔ e ŋga kre na,
18 a ki tia e eyɛ ta, mu shɔ sisam kɛɛ, mu eyɛ pe tinlɛ mu kee ŋga ki fraka ŋga.
19 E kala nɔɔ loohaa sheli, kre ki tia ndaa paara e pan kre kolo ŋga na, imi mbe pe mbe e kee kre nɔɔloo. Fa kre, e na eyɛ wru poŋgo na nɛɛrɛ, na sisam kee ŋga mu chin ŋga kro pini. Pan chɔɔ ki fna mbe e eyɛ pe tinlɛ mbe kee nyjɛ yi fraka ŋga poŋgo, mbe pe cheche.
20 Nyjila ŋga e na pe sisam tinlɛ kre, na e kee ka ma na kee nyjɛ yi fraka pee ni.
21 Kee nyjɛ yi e pini nyifɛɛrɛ aŋga ŋga, ŋga e naa yi pini fa kre, tnu ŋgi e na ta yi nu hin? Yire kee yire taahaa yi kumu.
22 La, fuŋga Nyiɛkpɔɔ e shɔ mu yili sisam kɛɛ, a e pe u tinlɛ. Tnu ŋga ee ta yi na ee fraka, a ki taahaa yi na ee blenyini ŋmaa ta.
23 Ŋgi na hin? Sisam fɔtɔɔrɔ yi kumu, la, Nyiɛkpɔɔ yira ŋga u o kaan finfin yi blenyini ŋmaa, o Tafun Yesu Kristo wre saara na.