Leŋgeere Mbra
7
Ni wolo, ni chin na kee ŋga ni paan mbe yo ŋga, ee ki nɔɔloo, ŋgi na hin? E kro mbra kee chin. Na lewoo ŋmaa ni, kena mbra u pɔ.
2 Pan chɔɔ na chlɔ leŋgefun ŋmaa ni, mbra u pɔ mu mbra u plɔ na. La, na blɔ wre waa ku, kena chlɔ wre shɔ mbra ŋga ki u pɔ mu mbra u plɔ na kre kɛɛ.
3 Kena na u plɔ wree ŋmaa ni, a chlɔ wre waa sɛ blɔ fuŋu wru kre, pie u yeeri leŋgeere klafun. A na u plɔ wre waa ku, kena u shɔ mbra kre kɛɛ. Kena na waa sɛ blɔ fuŋu leŋge, pia u yeeri leŋgeere klafun na.
4 Kena ni wolo, pan ki nyi chɔɔ mu e ŋga, e yire Kristo na mu ku mu yili mbra yire kɛɛ, a ki tia e pe lefuŋu wolo, wre ndro wre Nyiɛkpɔɔ na nyi mu yili kuulo nu, mbe ki ti o kee pe tnu ni mbe Nyiɛkpɔɔ ŋga.
5 Nyjila ŋga nu o naa wa sisam nu kre, sisam kooloe nyjɛ mbra yire fun yire na o na taa, a kee nyjɛ o naa pini yire naa shie na o ni kumu nu.
6 La, fuŋgaami ŋga, Nyiɛkpɔɔ o shɔ, a o ku mu yili mbra ŋga kra o pɔ fa kre nu. Ki tia o n na Nyiɛkpɔɔ sumi mbra lɛɛ yire pe nyunɔ mu tɛɛ yire kolo na na, la, Kpra Ŋumu wre kofɔŋgɔ na o sumi.
Mbra Na O Yire Mu Sisam Chin
7 Kena mni oo yo hin? O yo na mbra yire pe sisam kolo ree? Pan ma ki nyi. La, na mbra yire ma, kaa mba na yira ŋga pe yeeri sisam chin. Na mbra yire nsra yo na, “Maa ti mu yiɛ nyina ndro yira na.”a Mba na chin na ki pe sisaa.
8 Sisam yire mbra na mu tia jajaara kee ŋga mu chin ŋga kro kolo ta mu tni ni nu. Na mbra ma, kaa sisam n jaŋga ni.
9 Ŋga ni nsra mbra yire chin kre, na ni le, la, ŋga ni mbra yire chin kre, ki tia sisam kolo ta mu tni ni nu, a ni ku.
10 Mbra nyjɛ Nyiɛkpɔɔ le mbe yi pan ŋmaa ni kre, kumu ni yi pan mi pan.
11 Sisam yire mbra na mu kolo ta mu ni fana, mu ni gbo.
12 Kena mbra yire, yaka n wa yi na, yi pe cheche, mu fraka, mu nyu.
13 A kena yira ŋga ki nyu kre ki ndru mu pan kumu ni mu ni ŋga ŋgaa? Kre ma, la, sisam ki yire chichie na mu pan na ki ni. Sisam ki pan kumu ni ni pan, mu yire ki na mu kiyɛ wɔ mu nyina. Kena mbra yire na ki yire a ni chin na sisam pe yira sisaa titi.
Ŋumu Na Wejikaara Kepele
14 O chin na Nyiɛkpɔɔ mbra yire pe cheche, la, mi pe lewo na nyjuro, ki tia ni pe sisam tnu.
15 Ni n na kee ŋga ni pini nɔɔ ndru. Ŋgi na hin? Ŋga ni chaa ma ni pini, la, kee ŋga ni n na chaa ni pini.
16 Kena na kee ŋga ni n na chaa mbe pe, na kre ni pini kre, kena ni shɔ mu li na mbra yire nyu.
17 Kena mi titi jaŋga ni ma ni yire kee yire pini, la, sisam ŋga kii wa mu tni ni nu kre yi.
18 Fuŋga ni chin na chichie ka n wa mu tni ni wejikaara nu, ŋgi na hin? Ni chaa mbe chichie pe, la, ni n ja na ki pini.
19 Chichie ŋga ni chaa mbe pe kre, ni n ja na kre pini, la, sisam ŋga ni n na chaa mbe pe kre, kre ni pini.
20 Kena na ŋga ni n na chaa mbe pe kre ni pini waa, kena mi titi pan ma ki yiri na, la, sisam ŋga kii wa mu tni ni nu kre yi.
21 Kena ni nya na na ni yo mbe chichie pe kpan, sisaa ki kaari nyjila kro nu.
22 Ni Nyiɛkpɔɔ mbra kori ni loloŋgo nu.
23 La, ni mbra fɔŋgɔ ka nya ni nu, a kra wii na mbra ŋga kii wa ni loloŋgo nu kre ni, mu ni pɔ mu sisam mbra ŋga kii wa mu tni ni nu kre ŋga, a ni pe sisaa pefun.
Kristo Nu Ŋmaashɔmu Nyi