Sisam Tinkɛɛ Na Ŋumu Jaŋga
8
Kena fuŋga mblɛ pe pe Kristo wolo pre wa pimi li na.
2 Ŋgi na hin? Jaŋga ŋga ki yiri Kpra Ŋumu wre nu, na ŋmaa kaan Kristo Yesu nu kre, ki ni shɔ mu yili sisam jaŋga na kumu kɛɛ.
3 Nyiɛkpɔɔ na kee ŋga mbra yire nsra ja mu pe kre pe, ŋgi na hin? O naa pɔlɛ, o nsra ja mu li mbra yire na. Bawa wra wre titi Biblɔ tun, a wra pan na wejikaara ni na lewo wi, mna pan mu sisam jaŋga gbo o wejikaara nu.
4 A imi kie pe mbe wre mblɛ o taa Kpra Ŋumu wre na, a o n taa wejikaara sisam na kre jaa li kee chichie nyjɛ mbra yire chaa na.
5 Mblɛ pee wa mu tni wejikaara sisam nu kre, pe jawalaa wa mu taa wejikaara sisam yirɛ na, a mblɛ pee wa mu tni Kpra Ŋumu wre nu kre, pe jawalaa wa mu taa Ŋumu wre yirɛ na.
6 Na mu mu jawala taa sisam kepele na, mu kɔlɔ yi kumu, la, na mu jawalaa wa Ŋumu wre kepele na kre, mu wo yi ŋmaa, na wejinyiŋge.
7 Ŋgi na hin? Ŋmba u u jawala taa sisam kepele na kre, u loŋgo wi Nyiɛkpɔɔ. Ŋgi na hin? Ufun n taa Nyiɛkpɔɔ mbra na, a wa jaa taa yi na fio.
8 A mblɛ pe taa sisam kepele na kre, Nyiɛkpɔɔ yiɛ wa jaa shɔ pe na fio.
Kpra Ŋumu Wre O Kaan Ŋmaa
9 La, yire rɛ, e n taa sisam kepele na. Na Nyiɛkpɔɔ Ŋumu wree wa e nu wala, ŋga Ŋumu wre we yo na ee taa. Kpra na, lewo ŋmba nu Kristo Ŋumu wre n wa kre, ufun n pe Kristo wo.
10 La, na Kristo wree wa e nu, ee ŋmaa ta. Ŋgi na hin? Nyiɛkpɔɔ e fraka u yɛ pan. La, sisam ndra na, e wejikaara we ku.
11 Na Nyiɛkpɔɔ ŋmba wra Yesu nyi mna yili kuulo nu wre Ŋumuu wa e nu wala, kena wre Nyiɛkpɔɔ ŋmba wra Yesu Kristo nyi mu yili kuulo nu wre, we e wejikaara nyjɛ yie ku yire ŋga ŋmaa, mbe yire u Ŋumu ŋmba uu wa e nu wre na.
Kpra Ŋumu Wre O Pe Nyiɛkpɔɔ Biile
12 Kena ni wolo, fɔlɔ ŋga kii wa o na yi na, waa taa o sisam kepele na na.
13 Ŋgi na hin? Na mu taa sisam kepele na, mu ku. La, na mu yire Kpra Ŋumu wre na mu tia mu sisam kepele nyjɛ yii wa mu nu yire ku kre, mu ŋmaa ta.
14 Mblɛ pe taa Nyiɛkpɔɔ Ŋumu wre na kre, Nyiɛkpɔɔ wre biile lɛ.
15 Kpra Ŋumu ŋmba Nyiɛkpɔɔ e ŋga wre wa e pe tinlɛ, mbe ti e na fiɛ, la, we e pe Nyiɛkpɔɔ biile, mbe e yire Ŋumu wre na mbra Nyiɛkpɔɔ yeeri “Abba, Ndoo.”
16 Nyiɛkpɔɔ Ŋumu, na o ŋumu o dansiɛrɛ li na Nyiɛkpɔɔ biile lɛ wre.
17 Ŋga o pe Nyiɛkpɔɔ biile ŋga, dwamu ŋga u tɛɛ na u leele sri kre, oo ki ta, mbe wre na Kristo chaa mbe dwamu ŋga Nyiɛkpɔɔ tɛɛ u pan kre ta. Na o kala nya u ndra na wala, wre na wre we chaa mbe u yɛnyiŋge kre ta.
Mbakɔ Nyjeeri Yɛnyiŋge
18 Ni shɔ mu li na fuŋgaami kanyana nyjɛ o nyaa ŋga wa jaa da yɛnyiŋge ŋga Nyiɛkpɔɔ we wɔ mbe o nyina yire ni.
19 Ŋgi na hin? Yirɛ nyjɛ Nyiɛkpɔɔ gbeele yire kroo wa na ble ŋga nu Nyiɛkpɔɔ we u biile wɔ mbe nyina kre sri.
20 Yirɛ nyjɛ Nyiɛkpɔɔ gbeele kre, u yi sun mu tia yi pe yirɛ wɛɛ, a imi na yi chaa ma, la, pan Nyiɛkpɔɔ chaa mbe yi pe. La, dankna wa,
21 na yirɛ nyjɛ Nyiɛkpɔɔ gbeele kre, we yi shɔ mbe yia fɔɔn, mbe pan na yi ni wre Nyiɛkpɔɔ yɛnyiŋge yɛtaara kpɔɔ ŋga we u biile ŋga kre nu.
22 O chin na waŋgra yirɛ kroo wa na jiin, na nyɛni na chlɔ se nyjila da, hali mu pan mu su aŋga na.
23 Yirɛ nyjɛ Nyiɛkpɔɔ gbeele yire kro, hali wre mblɛ o klu mu Ŋumu wre ta finfin kre, wre chɔɔ jiin lɛɛ, na u sri mbe u pan mbe o wɔ mbe nyina na u biile lɛ wre yɛŋgɛ, mbe o oyɛ ta.
24 Ŋgi na hin? Ŋga Nyiɛkpɔɔ o ŋmaa shɔ kre, kre dankna ŋga o ta. La, na mu yira ŋga na mu dankna nyaa nyini ni kre, kena dankna yira ma na. Ŋmbi u kaan yira ŋga u ta na tɛ hin?
25 Yira ŋga na o kaan kre, na o n na ki nyaa kre, kena frɔ oo tɛɛ mbra ki sri.
Nyiɛkpɔɔ Koroo
26 Pan chɔɔ Kpra Ŋumu wre yaa o na, o pɔlɛm nu. Ŋgi na hin? O n chin imi ki fna o na nyiɛtali, la, Ŋumu wre titi u Nyiɛkpɔɔ tali na o kaan, imi waa jaa tali mbe da.
27 A Nyiɛkpɔɔ ŋmba u leele lolonyi nyaa kre, u chin ŋga Ŋumu wre jawa. Ŋgi na hin? Ŋumu wre u Nyiɛkpɔɔ tali u leele pan imi wre Nyiɛkpɔɔ chaa.
28 O chin na yirɛ nyjɛ yi pini ŋga kro, Nyiɛkpɔɔ yi pini mbe yi nyu mbe mblɛ pe u kori ŋga, mblɛ u yeeri u chaara na kre.
29 Mblɛ Nyiɛkpɔɔ na klu mu chin fa na pie pe u wolo kre, wra pe wɔ mbe pe pe na u Biblɔ wre wi, imi kie pe mbe u Biblɔ wre pe yɛklo shɔnlifɛɛnlɛ tataara pre pan.
30 A mblɛ Nyiɛkpɔɔ wɔ mu tɛɛ pre, u pe yeeri, a mblɛ u yeeri pre, u pe fraka, a mblɛ u fraka pre, u pe ŋga u yɛnyiŋge.
Imi Nyiɛkpɔɔ O Kori Mu Da
31 Kena kee ŋgi oo yo na hin? Na Nyiɛkpɔɔ wa o kro, ŋmbi we jaa o pe yaka hin?
32 Wre ŋmba u nsra je u Biblɔ wre ŋgaa na, la, mna u tɛɛ mu sra wɔ mu o kro ŋga kre, kena wa o ŋga yirɛ kro mbe ya ree?
33 Kena ŋmbi we ja mbe kala taa Nyiɛkpɔɔ leele mblɛ u wɔ pre na hin? Nyiɛkpɔɔ wre u pe ŋga tam.
34 Kena ŋmbi we jaa o gbun pimi ni na hin? Yesu Kristo ree? Ɔɔhɔn! Wre wra ku mu o ŋga, a pra u nyi mu yili kuulo nu mu o ŋga, a uu wa mu tni Nyiɛkpɔɔ kalie. Bawa u nyi na tali na o kaan.
35 Ŋgi kie ja mbe o kun mbe laa Kristo koroo ŋga u o kori kre na hin? Kanyana ree, ndee wejiwrɛ hin? Ndee prara, ndee klo, ndee yirɛ laarɔ, ndee yɛnyiɛ, ndee kumu hin?
36 Imi na pe ki nyunɔ Nyiɛkpɔɔ hlɛ kre nu mu tɛɛ mbo,
“Mu ndra na, kumu kanyana nu o nyi nyjila kro nu.
Pe o pe na mbaala mblɛ ni pe shie, mbe sɛ gbo lɛ.”a
37 A nde nyjɛ krɛrɛ nu kre, o yire ŋmba u o kori wre na mu wi mu yili.
38 Ŋgi na hin? Ni shɔ mu li na kumu, ndee ŋmaa, ndee nyjeeri bitumblɔ, ndee jaŋga, ndee yirɛ nyjɛ yii wa fuŋgaami, ndee mbakɔ yirɛ, ndee jaŋga,
39 ndee nyjeeri, ndee tra, ndee yirɛ nyjɛ u gbeele kro, ka n wa mbe ja mbe koroo ŋga Nyiɛkpɔɔ yire o Tafun Yesu Kristo na mu o kori kre kun.