Israel Leele Mblɛ Nyiɛkpɔɔ Wɔ Kre
9
Kpra kee mbe yo e pan kre. Kristo wo wi mi, kala ma ni fnɛ. Kpra Ŋumu wre saara na, ni jawala titi chin na kala ma ni fnɛ.
2 Fooro ni yii kpɔɔ, a ni gbun na ni fiiri, ni leele ndra na.
3 Na kie na nyu, mbe Nyiɛkpɔɔ na ni sun ni leele pre titɛɛ, mbe ndaa kun Yesu na.
4 Nyiɛkpɔɔ leele lɛ, a u pe wɔ na u biile lɛ, mu pe ŋga u yɛnyiŋge kre, wra nyu nunu pe na pe ni, mna pe ŋga mbra yire. A pre pra kpra sumiɛ kre ta, pre pra Nyiɛkpɔɔ nyu ŋga wra yo na we pe kre ta.
5 Pe tolɛɛlɛ pra pe leele mblɛ kee ki shian, a ŋga Yesu na pan na wejikaara ni kre na, pe sele kre nu wra yili. Nyiɛkpɔɔ ŋmba jaŋga ki wɛ yirɛ kro na kre, wre wo yi dwamu nyjila kro nu. Ami.
Nyiɛkpɔɔ Kee Kre N Pe Waara
6 La, ki n pe na Nyiɛkpɔɔ nyu ŋga u yo mu tɛɛ kre n ja mu pe. Ŋgi na hin? Ki n pe Israel leele kro Nyiɛkpɔɔ wɔ na u wolo lɛ.
7 A ki n pe Abraham sele leele kro lɛ Nyiɛkpɔɔ biile. Nyiɛkpɔɔ na yo Abraham pan mbo, “Isaac nɔɔ leele lɛ mu nanae.”a
8 Ki nyina na Abraham biile mblɛ wra se imi na lewo sii kre, Nyiɛkpɔɔ biile ma, la, Nyiɛkpɔɔ nyu ŋga wra yo kre biile pre lɛ Abraham nanae.
9 Nyiɛkpɔɔ nyu ŋga wra yo kre nyina na, “Nyjila ŋga ki fna nu, mbe ndruu pan, na Sarah biblɔ se.”b
10 A kre chiin ma, la, ŋga Rebekah na o tolɛɛ Isaac na siire ta kre,
11 Nyiɛkpɔɔ na yo Rebekah pan mbo, “Lopom wre we ble wre sumi.”c Nyjila ŋga ni wra yo u pan ma kre, na u n ta mu se tun, a na biile pre wa n ta mu chichie, ndee sisaa ka pe tun. La, Nyiɛkpɔɔ na yire wre titi chaara na mna biile pre wa wɔ,
12 kee ŋga pra pe ma kra tia. La ki nyina na Nyiɛkpɔɔ titi, u chaara na u yire na ŋmba u chaa woni.
13 Imi na pe ki nyunɔ Nyiɛkpɔɔ hlɛ kre nu mu tɛɛ mbo, “Ni Jacob chaa, mu Esau je.”d
Ndro Chaara Ma Nyiɛkpɔɔ Pini
14 Kena mni oo yo na hin? Kena o yo na Nyiɛkpɔɔ n fraka ree? Pan ma ki nyi.
15 Ŋgi na hin? Wra yo Moses pan mbo,
“Ŋmba fooro ni chaa mbe chin,
wre fooro mbe chin,
a ŋmba ni chaa,
wre kanyana kii wa ni na.”e
16 Kena ki n pe ŋga lewo chaa, ndee ŋga u pini na yi, la, Nyiɛkpɔɔ fooro chiɛn na yi.
17 Pra ki nyunɔ Nyiɛkpɔɔ hlɛ kre nu na, Nyiɛkpɔɔ na yo Pharaoh pan mbo, “Ni mu pe ŋunu, mbe mu tɛɛ mbe ni kee pe, mbe yire mu na mbe ni jaŋga nyina, mbe ki yire ki na mbe ni mɛɛ kpali waŋgra nu.”f
18 Kena ŋmba fooro Nyiɛkpɔɔ chaa mbe chin kre, wre fooro u chini, a ŋmba u chaa kpan, wre we ti mbe u ndie kan.
Faanrifun Na Choo
19 E wa we yo ni pan na, “A na pan ki nyi kre, mni ki pe a Nyiɛkpɔɔ na yuu na lewo ndie kan hin? Ŋmbi we jaa ŋga Nyiɛkpɔɔ chaa kna hin?”
20 A lewo wi ŋmbi, mbe u jaa Nyiɛkpɔɔ nyu kaanri hin? Yira ŋga pe faanri we jaa ki faanrifun wie mbo, “Mni a mu ni faanri imi ree?”g
21 Chɔɛ faanrifun n wa jaŋga ni choo na, mbe jaa choo nunu kre tɛɛ mbe chɔɛ shiin faanri, mbe ka tɛɛ mbra keshian yirɛ pini, mbe ka tɛɛ mbra yirɛ wɛɛ pini ree?
22 Pan chɔɔ Nyiɛkpɔɔ chaa mbe u krɔkuɔn nyina, mbe leele u jaŋga nya. Ki tia u frɔ ta tataara mblɛ pe tia u krɔkun, a ki fna u pe kla pre na.
23 A chaa u chaa mbe u yɛnyiŋge kpɔɔ kre nyina mblɛ fooro u chin pan, wre mblɛ u gbeele mbe o u yɛnyiŋge kre ta kre.
24 Wre mblɛ u yeeri kre, ki n pe Judae chiin u yeeri, mblɛ pe n pe Judae pre chaa.
Kee Ŋga Nyiɛkpɔɔ Kee Nyanyofɛɛnlɛ Pre Na Nyunɔ
25 Kee ŋga Nyiɛkpɔɔ yo Hosea hlɛ kre nu yi kre mbo,
“Mblɛ pe nsra pe ni leele kre,
mbe pe yeeri ni leele.
A waŋgra ŋga ni nsra kori kre,
mbe ki yeeri, ‘Ni waŋgra ŋga ni kori.’”h
26 “A lawee ŋga nu chɔɔ pra yo pe pan mbo,
‘Ni leele ma yire kre,
bawa chɔɔ pie pe yeeri Nyiɛkpɔɔ ŋmba uu wa ŋmaa ni wre biile.’i
27 Isaiah na yo Israel leele pan mbo,
‘Hali na Israel leele nɛɛ na epo nyu tanyiɛ yi,
chiɛri plɛ ŋmaa pie shɔ.’
28 Ŋgi na hin? O Tafun wre we leele kee li tra na mna nyaanyaa.”j
29 Imi na Isaiah na ki yo mu tɛɛ kre mbo,
“Na o Tafun
Jaŋgafun Nyiɛkpɔɔ wre nsra tolɛɛlɛ ti o pan,
kaa pan oo na kla na Sodom na Gomorrah leele lɛ.”k
Israel Leele Nsra Shɔ Mu Li
30 Kena mni oo yo na hin? Mblɛ pe n pe Judae, a pe n naa chaa mbe fraka Nyiɛkpɔɔ yiɛ kre, Nyiɛkpɔɔ yire shɔnlie na mu pe fraka.
31 La, Israel leele mblɛ praa mbra chaa mbe yire yi na mbe fraka pre nsra yi ta.
32 Ŋgi na hin? Pe nsra yire shɔnlie na, la, mbra na pra yire. Pe gbro dnɛ kre na,
33 imi na pra ki nyunɔ Nyiɛkpɔɔ hlɛ kre nu kre mbo,
“Le, ni dnɛ teeri Zion na,
ŋga kie ti leele na gbroi,
kre dnɛ ŋga kie ti mbe pra tuuri,
a ŋmba we u shɔ mbe li kre,
wa ti mbe nyifɛɛrɛ u gbo.”l