Ŋmaashɔmu Ŋga Israel Leele Je
10
Ni wolo, ŋga ni loloŋgo chaa, na ŋga ni tali Nyiɛkpɔɔ pan na ni leele kaan yi na, pie ti Nyiɛkpɔɔ pe ŋmaa shɔ.
2 Mbe jaa pe dansiɛrɛ li na pe gbeŋmba Nyiɛkpɔɔ sumiɛ nu, la, ki n pe kpra titi kre kolo na yi.
3 Ŋgi na hin? Kolo ŋga na Nyiɛkpɔɔ lewo fraka kre, pe ki je, mu pre titi kolo wru. Ki tia pe n taa kolo ŋga na Nyiɛkpɔɔ lewo fraka kre na.
4 Kristo na pan, mbe ŋmba we u shɔ mbe li kpan fraka, la, mbra ma yie ti mbe lewo fraka na.
Kristo Ŋmaashɔmu Kre
5 Moses na ki nyunɔ na,
“Lewo ŋmba u chaa mbe fraka,
mu taa nyjɛ mbra yire yo na kre,
we ŋmaa ta mbra yire nu.”a
6 La, kolo ŋga na lewo fraka mu yire shɔnlie na kre yi kre mbo, “Maa shia yo mu loloŋgo nu na, ‘ŋmbi we sɛ nyjeeri, mbe sɛ Kristo wre wru mbe pan hin?’
7 Ndee, ‘ŋmbi we sɛ tra tapan mbe sɛ Kristo wɔ kuulo nu mbe pan hin?’”b
8 La, kee kre kro yi na, “Nyiɛkpɔɔ kee kre, ki mbra e na, kii wa e nyuu, na e lolonyi nu,” Kre yi shɔnlie kee ŋga o kpali kre.
9 Na mu ki yo nyu lam na Yesu wi mu Tafun wre, a mu ki shɔnli mu loloŋgo nu na Nyiɛkpɔɔ na u nyi mna yili kuulo nu kre, mu ŋmaashɔmu ta.
10 Ŋgi na hin? O shɔnlie ŋga o ta kre, kre ki tia o fraka, a ŋga o ki yuu nyu lam kre ki tia o ŋmaashɔmu ta.
11 Nyiɛkpɔɔ kee ŋga pe nyunɔ mu tɛɛ kre yo mbo, “Ŋmba we u shɔ mbe li kre, wa ti mbe nyifɛɛrɛ ufun gbo.”c
12 Ndro kro pan u ki yo, ŋgi na hin? Judae na mblɛ pe n pe Judae o, o kroo nunu, wa n uyɛ. Nyiɛkpɔɔ nunu wre wi o kro Tafun, a mblɛ pe u mɛɛ yeeri kre, u pe kro dwan.
13 Imi na Nyiɛkpɔɔ kee kre pe nyunɔ mu tɛɛ kre yo kre mbo, “Ŋmba we o Tafun wre mɛɛ yeeri, na u u ŋmaa shɔ kre, we u ŋmaa shɔ.”d
Ŋmaashɔfun Wre Ketaan Kre Kpalaa
14 A mni pie pe, mbe ŋmba pe n shɔ mu li wre yeeri mbe u paan ya pe na hin? A mni pie pe mbe ŋmba kee pe n loo wre shɔ mbe li hin? A mni pie pe mbe kee kre loo hin? Na ndro n kee kre kpali pe pan.
15 A mni leele we pe mbe kee kre kpali hin? Na ndro n pe tun. Imi na pe ki nyunɔ Nyiɛkpɔɔ hlɛ kre nu mu tɛɛ kre mbo, “E le imi na ketaan kpalifɛɛnlɛ pre jewrɛ nyu mu da.”e
16 La, leele kro ma pe taa ketaan kre na. Ŋgi na hin? Isaiah na ki yo mbo,
“O Tafun, ŋmbi u kee ŋga u loo o pan kre shɔ mu li hin?”f
17 Kena Kristo kee kre loo ki paan na shɔnlie ni, a kee kre kpalaa, ki paan na ki loo ni.
18 A ndaa kna mu wie na, kena pe n kee kre loo ree? Pra ki loo mu tro, imi kee kre pe nyunɔ Nyiɛkpɔɔ hlɛ kre nu mu tɛɛ kre yo kre mbo,
“Pe mana sɛ waŋgra kro nu,
a pe pe kee yire loo tra kro nu.”g
19 A ndaa ndru mu wie na, kena Israel leele pre nsra kee kre nɔɔloo ree? Moses na klu mu yo na Nyiɛkpɔɔ yo mbo,
“Mbe ti mbe e yiɛnyina leele mblɛ e naa jawa na leele ma pre na,
pre leele mblɛ pe n kala chin pre ni mbe ti e krɔ wru.”h
20 A Isaiah na gbun ta mna yo mbo, Nyiɛkpɔɔ yo na,
“Mblɛ pe nsraa ni haa chaa kre,
pre pra ni nya,
mblɛ pe nsraa ni haa wie kre,
pre ndaa niyɛ wɔ mu nyina.”i
21 La, mu wru yire Israel leele haa rɛ, wra yo na,
“Ble kro nu, ni kɛnyi nyaa mu tɛɛ na ndikanafɛɛnlɛ,
na nyu kaanrifɛɛnlɛ pre sri.”j