Nyiɛkpɔɔ We Nyu Israel Leele Na
11
Ndaa wie na, kena Nyiɛkpɔɔ u leele pre je ree? Pan ma ki nyi. Mi titi, Israel ndro wi mi, a Abraham nana wi mi, a ni yiri Benjamin sele nu.
2 Nyiɛkpɔɔ n u leele mblɛ wra klu mu wɔ pre je. Elijah kee kre pra nyunɔ Nyiɛkpɔɔ hlɛ kre nu mu tɛɛ kre, e n ki chin ra? Wra Israel leele kefuɛn yo Nyiɛkpɔɔ pan mbo,
3 “Ni Tafun, pe mu kee nyanyofɛɛnlɛ pre gbo peii, mu mu sragbuɛnlɛɛ yire juari. Mi nunu ni kro, a pra ni chaa mbe gbo na.”a
4 Kee ŋgi Nyiɛkpɔɔ na yo u pan hin? Mbo, “Ni leele kagbenyi kɔɔnashin ti niyɛ pan tɛ, pre pe n kosie kan mu sɛɛn Baal sumi.”b
5 Pan ki nyi chɔɔ nyjila ŋga nu o nyi ŋga nu, leele mblɛ Nyiɛkpɔɔ wɔ pre, chiɛri plɛɛ wa, u dumiɛ kre saara na.
6 Kena u dumiɛ kre na ki yire, ŋga lewo pe na ma. Na ŋga lewo pe na Nyiɛkpɔɔ na yila mu u dumi kre, kena kaa u dumiɛ kre n pe dumiɛ chiriri.
7 Kena mni oo yo hin? Yira ŋga Israel leele naa chaa kre, pe nsra ki nya. Chiɛri mblɛ wra wɔ kre, pre pra ki nya, la, hamblɛ pre na ndikana pe.
8 Imi na pe ki nyunɔ Nyiɛkpɔɔ hlɛ kre nu mu tɛɛ kre mbo,
“Nyiɛkpɔɔ pe ŋga ndikana ŋumu.
Hali mu pan mu su aŋga,
pe n na nyaa na pe nyiɛlɛ ni,
a pe n na ndru na pe ndiile ni.”c
9 A ŋunu David na yo fa mbo,
“Ti mbe pe yɛliire kaari pɛlɛ pe pan,
mbe pe gbro mbe to,
mbe mu pe ndie tini.
10 Ti mbe pe nyiɛlɛ tɔ,
mbe pia na nyaa,
mu pe kru mu le kanyana nu nyjila kro nu.”d
Dankna
11 A ndaa wie na, kena ŋga Judae pre na gbro kre, pra to mbe pia jaa yiri na ra? Pan ma ki nyi. Ŋga pra hakɛ le kre ndra na, ki tia mblɛ pe n pe Judae pre na ŋmaashɔmu ta, mbe ki ti mbe Judae pre yiɛnyina.
12 Kena Judae hakɛ ki tia waŋgra ŋga leele dwamu kpɔɔ ta. Kena na pe kolo laarɔ ki mblɛ pe n pe Judae pre ŋga dwamu waa, kena na Judae pre kro waa pan, a pe kro chaa, pe dwamu we kpɔɔ titi.
Mblɛ Pe N Pe Judae Pre Ŋmaashɔmu
13 Fuŋga rɛ, yire mblɛ e n pe Judae kre, yire pan ni paara kre. Pe ni wɔ bituŋu yire mblɛ e n pe Judae pre pan, a mbe niyɛ kpɔɔ ni tnumu nu.
14 Aada kre kie ti mbe ni wolo Judae pre yiɛnyina, mbe ki ti mbe pe plɛ ŋmaashɔmu ta.
15 Ŋgi na hin? Na pe jeere kre na Nyiɛkpɔɔ leele mblɛ pe n pe Judae pre wru nɔɔlɔ waa, kena na waa ndru mu pe shɔ, mni nyini kie taa hin? Pan kie pe na gboolo nyi mu ŋmaa ta.
Pie Judae Shɔ Tɛ
16 Na sra paanu mimi kre kokoo pe cheche Nyiɛkpɔɔ pan kre, mu chin na pan ki kro poŋgo pe cheche. A na tiŋge didinyi pe cheche Nyiɛkpɔɔ pan kre, mu chin na pan chɔɔ ki klɛ nyi na.
17 Olive tiŋge ŋga pe luu kre, pe ki klɛ yɛ kuari mu wo, mu olive tiŋge ŋga kii wa nyaa kre klɛ yɛ knumu mu pan mu kan yi titɛɛ. Yire mblɛ e n pe Judae kre, pan e nyi na kre olive tiŋge nyaa wo kre yi. Fuŋgaami ŋga e pan mu dwamu kpɔɔ ŋga Judae ta kre ka ta.
18 Kena yaa mblɛ pe kuari mu wo na tinyi klɛ yi pre le fiɛn. Mni ee pe mbe eyɛ kpɔɔ na hin? Tiŋge kre klɛ lɛ yire, yire ma e tiŋge kre didinyi yii, la, didinyi yire yi yire yii.
19 La, mu jaa yo na, “Klɛ pe kuari mu wo, a ki tia mi lawee ta mu le.”
20 Ki pe kpra na ŋga pe nsra shɔ mu li kre ndra na, pra pe kuari mu wo na tiŋge klɛ yi, a ŋga ŋu shɔ mu li kre ki tia ŋu lawee ta. La, maa ki tɛɛ mbe muyɛ kpɔɔ, ta dɔɔtaa.
21 Tiŋge kre titi klɛ yire kuraa, Nyiɛkpɔɔ nsra tia yira yi yɛ wru mu li, kena mu jawa na, na ŋu waa sisaa pe, we ŋu ti ra?
22 Kee ŋga tia o chin imi Nyiɛkpɔɔ lɛɛ tna, na imi u leele ndie tinii mu da. Mblɛ pe to kre, u pe ndie tinii, la, na e u shɔ mu li nyjila kro nu, we nyu e na. A na e n pe ma, we e kuari mbe wo na tiŋge klɛ yi.
23 A na Judae pre waa ndru mu pan mu shɔ mu li kre, we ndruu pe wru mbe kan tiŋge kre na na, ŋgi na hin? Nyiɛkpɔɔ wa jaŋga ni na we ndruu pe pe ma.
24 Yire mblɛ e n pe Judae kre, pan e nyi na olive tiŋge ŋga kii wa nyaa, a pe ki klɛ kuari mu wo kre yi. Pe pan mu e le katoo olive tiŋge ŋga pe luu kre klɛ titɛɛ, la, ka pan ma ki nyi fa. Judae pre, pan pe nyi na olive tiŋge ŋga pe luu katoo kre yi, kia sheli Nyiɛkpɔɔ pan na we ndruu klɛ nyjɛ u kuari mu wo yire wru mbe le yi titɛɛ.
Nyiɛkpɔɔ Lewo Kro Fooro Chini
25 Ni wolo, kekpra ka ndra e na. Ni chaa mbe e ki chin, mbe ki e jawala laa e kachindɛ kee na. Kre yi na, Judae pre ndikana kre, kia kro ma nyjila kro nu. Na mblɛ pe n pe Judae, a Nyiɛkpɔɔ pe wɔ pre nyu waa fni kre, Judae pre ndikana kre nyu we to.
26 Kolo ŋga na Nyiɛkpɔɔ we Judae shɔ yi kre. Pe ki nyunɔ Nyiɛkpɔɔ hlɛ kre nu mu tɛɛ mbo,
“Ŋmaashɔfun wre we yiri Zion na mbe pan,
we pan mbe sisam kee kro wɔ mbe yili Jacob nanae nu.
27 Nyu nunu ŋga mi na pre we pe yi na,
mbe pe sisam laa pe na.”e
28 Ŋga Judae Nyiɛkpɔɔ ketaan kre je kre ndra na, ki tia pe Nyiɛkpɔɔ yii loŋgo, a ki tia yire mblɛ e n pe Judae pre lawee ta. La, Nyiɛkpɔɔ wre titi chaara na, u yila pe tolɛɛlɛ pre na mu Judae pre wru mu pe u nɔɔlɔ.
29 Ŋgi na hin? Na Nyiɛkpɔɔ ndro wɔ mu u dwan mu kɔ, wre Nyiɛkpɔɔ na ndru mbe u jawala chinɛ.
30 Yire mblɛ e n pe Judae kre, e na ndikana pe Nyiɛkpɔɔ na fa. La, fuŋgaami Nyiɛkpɔɔ e fooro chin, ŋgi na hin? Judae ndikana pe.
31 Pan ki nyi chɔɔ, foorochiɛn ŋga e ta kre na Judae yila mu Nyiɛkpɔɔ kee kre je, kre kie ti mbe u pre fooro chin na chɔɔ.
32 Ŋgi na hin? Nyiɛkpɔɔ ndro kro le na u ndie kan, ki tia ki pe na nyuŋgo pe ndro kro yii mu le, mbe Nyiɛkpɔɔ yire u foorochiɛn na mbe ndro kro fooro chin.
Nyiɛkpɔɔ Kachindɛ Kpɔɔ
33 Nyiɛkpɔɔ yɛtaara, na u kachindɛ, na u jawala kpɔɔ titi. Ndro wa ja mbe u ndra kee chin, ndee, mbe jaa kooloe nyjɛ na u tro chin fio.
34 Imi na pe ki nyunɔ Nyiɛkpɔɔ hlɛ kre nu mu tɛɛ kre mbo,
“Ŋmbi u o Tafun jawala chin hin?
A ŋmbi we jaa u ŋga jawala hin?f
35 Ŋmbi u da mu u ŋga yaka,
a ki fna mbe u ki fɔlɔ tɔ mbe ufun ŋga hin?”g
36 Ŋgi na hin? Wre u yirɛ kro wa, a wre na yirɛ kro yire mu pan, a wre u yi ta kro. Nyiɛkpɔɔ wo yi yɛnyiŋge nyjila kro nu. Ami.