Imi Ki Fna O Pe Nyiɛkpɔɔ Sumiɛ Nu
12
Kena ni wolo, ŋga Nyiɛkpɔɔ o fooro chin kpɔɔ kre na, ni e tali, ŋga ee wa na le ŋga, e eyɛ wru e sra ŋga ki pe cheche wɔ e Nyiɛkpɔɔ ŋga mbe ki u yiɛ nyi. Kre ki pe kpra sumiɛ ŋga na ki fna e tro mbe u sumi.
2 Yaa eyɛ wru mbe taa waŋgra ŋga na, la, e ti mbe Nyiɛkpɔɔ e kna, mbe e jawala fɔŋgɔ ta, kre ee ŋga Nyiɛkpɔɔ chaa, na ŋga ki nyu, mu tna u pan titi chin.
Kristo Shɔnlifun Na Uyɛ Kpɔɔ
3 Ŋga Nyiɛkpɔɔ ni dumi kre ndra na, ni yuu e pan kro, wa waa shia uyɛ jawa mbe wɛ imi na u n da na. La, e ti mbe e yiɛ to, mbe yire imi e shɔnlie ŋga Nyiɛkpɔɔ e ŋga kre da na.
4 Wejiŋge kokoe nɛɛ, a yi kroo wa na yi tnumu ni nununu.
5 Pan ki nyi chɔɔ, o nɛɛ, ande ŋga wre na Kristo pe nunu ŋga, o pe wejiŋge nunu, a o kro keshiɛn wa oyɛ na.
6 Kpra Ŋumu wre yire dumiɛ ŋga Nyiɛkpɔɔ o dumi kre na mu o ŋga yirɛ oyɛ yɛ. Kena ki fna o yi tnumu tun. Na Nyiɛkpɔɔ kee ki fna o na kpali kre, ki fna o ki kpali na shɔnlie ŋga o ta ni.
7 Na sumi oo sumi kre, ki fna o sumi. A na leele o nyina naa, ki fna o yiɛnyina.
8 A na gbeŋmbaa o leni kre, ki fna o yiɛnyina. A ŋmba u yira taa mbe u ŋmbrɔ ŋga ka kre, ufun u lɛɛ wɔ u ŋga. Ŋmba pe tɛɛ lopom wra leele le kre u gbeŋmba. A ŋmba u yaa leele na kre, wra ki pini yɛshɔɔrɔ ni.
Koroo
9 E ti mbe e koroo pe kpra ni. E sisam fun, e na chichie pini.
10 E eyɛ kori na lobiile lɛ yire Kristo nu, e na eyɛ kaan buuro.
11 Yaa na gbashia lii, e gbeŋmba e tnumu tun, e lɛɛ wɔ e o Tafun wre sumi.
12 E ti mbe e yiɛshɔ e dankna ŋga e ta kre na, e eyɛ yii kanyana kro nu, e na nyiɛtali nyjila kro nu.
13 E na Nyiɛkpɔɔ leele mblɛ pe shian e nu pre kee yirɛ, e na fumblɔ shio e kalonyi nu.
14 Mblɛ pe e pini sisaa kre, e na dwan e na pe kaan, yaa na pe suni.
15 Yire na mblɛ yiɛ ki shɔ pre, e yɛshɔɔrɔ li. A mblɛ pe nyɛni kre, yire na pre e nyɛni.
16 E ti mbe eyɛ kee eyɛ shian, yaa na eyɛ kpɔɔri, la, e eyɛ nyjii e eyɛ ŋga, a yaa na eyɛ pini kachimblɛ.
17 Na ndro mu pe sisaa kre, maa u fɔlɔ tɔ sisaa ni. E na kee nyjɛ leele chin na yi nyu yire pini.
18 E gbeŋmba na e kepele kro nu, yire na ndro kro we tni wejinyiŋge nu.
19 Ni wolo mblɛ ni kori, yaa na sisaa fɔlɔ toni eyɛ na, e ki ti e Nyiɛkpɔɔ krɔkuɔn ŋga. Ŋgi na hin? Pe ki nyunɔ Nyiɛkpɔɔ hlɛ kre nu na o Tafun Nyiɛkpɔɔ wre yo mbo, “Mi ni sisam fɔlɔ toni.”a
20 “La, na klo mu loŋgo ta, u ŋga sro. A na gbɔɔ u ta, u ŋga nyumu mbe u gbɔ. Na mu pe ma kre, kena mu tia nyifɛɛrɛ u gbo.”b
21 Yaa ti sisam nduu e na, la, e ti mbe e chichie wɛ e sisam na.