Wre Na Waŋgra Ŋga Jaŋgafɛɛnlɛ
13
Ndro kro fna mbe uyɛ nyjii mbe waŋgra ŋga jaŋgafɛɛnlɛ ŋga. Ŋgi na hin? Jaŋga ka n wa a Nyiɛkpɔɔ n chin ki kee nu. Wre u jaŋgafɛɛnlɛ pre ŋga pe tnihaa.
2 Kena ŋmba we yiri mbe jaŋgafun kee taan kre, kena u yiri mu Nyiɛkpɔɔ kee ŋga u pe taan, a we pimi li.
3 Na mu kee chichie pini, maa waŋgra lopom fiɛ, fɔna keesɛɛ pefun. Mu chaa mbe ma jaŋgafun fiɛ ra? Kena ta ŋga ki fna pini, kre mu mɛɛ chichie ta u pan.
4 Ŋgi na hin? Nyiɛkpɔɔ sumifun wi, e chichie u chaa. La, na maa sisaa pe to, ta u fiɛ. Ŋgi na hin? Uu wa jaŋga ni mbe jaa sisaapefun ndie tini. Nyiɛkpɔɔ sumifun wi, a u yire Nyiɛkpɔɔ jeelee na na sisampefɛɛnlɛ ndie tinii.
5 Kre ndra na, ki fna e eyɛ nyjii mbe jaŋgafɛɛnlɛ ŋga. Ki n pe ŋga pie mu ndie tini kre chiin na, la, e chin na pan ki fna e pe.
Ki Fna Mbe E Na Tɔɔ Woni
6 Kre ki tia ki fna e na e tɔɔ toni, ŋgi na hin? Na jaŋgafɛɛnlɛ pre pe tnumu tuni, kena Nyiɛkpɔɔ pe ki tuni na kaan.
7 Kena fɔlɔ ŋga wa li kpan, ki fna u ki tɔ mbe pe ŋga. Tɔɔ ŋga nyini ki fna mu tɔ kpan, ki tɔ mu ki fun ŋga. Ŋmba ki fna mu ŋga buuro kre, u ŋga ki yi, a ŋmba ki fna mu ŋga mɛɛ kre, u ŋga ki yi.
Koroo Ŋga Ki Nyu
8 Yaashia ndro fɔlɔ li, la, fɔlɔ ŋga kii wa e na yi na, ki fna e eyɛ kori nyjila kro nu. Ŋmba u u ŋmbrɔ kori wre li mbra yire kro na.
9 Mbra yire yi na, “Maashia leŋgeere kla, maashia linkuuro kee pe, maashia ju, maa shia ti mu yiɛnyina yirɛ na.”a Yire na mbra hɛnyi yire kro ndra yi, “Mu ŋmbrɔ kori imi na mu muyɛ kori kre.”b
10 Na mu mu ŋmbrɔ kori, ma u pe sisaa. Kena ki tia na koroo wa mu nu, kena mu li mbra yire kro na.
O Tafun Pan Nyjila Kre Da
11 Ki fna e na piin ma, ŋgi na hin? E chin nyjila ŋga nu e nyi. Nyjila da, na e sni na ŋunu kuraa kre, mbe e nyi. Ŋgi na hin? O Tafun pan nyjila kre mbra, mu wɛ nyjila ŋga ni o na shɔ mu li jle kre na.
12 Blee wɔmu chaa tro, a nyisee na mbrai o na. Kena e ti mbe o wɔmu kepele yire ti, mbe nyjɛ yi nyu Nyiɛkpɔɔ pan yire wru mbe pe nyisee ŋunɔ wiyirɛ.
13 E ti mbe o na nyaari chiriri na lafo na o nyaari, mbe waa na pnaa fuɛn pna, mbra simi gboo, mbra tiɛri, mbe ti mbe o niŋge wɛ o na, mbra kakrɔɛ, na yenyjam kee pini.
14 La, e o Tafun Yesu Kristo ŋunɔ wiyirɛ yire le, mbe o krɔ kna mbe wa o sisam niŋge yirɛ yire na, mbe waa yi ŋga yiɛ na.