Yaa Na E Ŋmbilɛ Gbuun Pimi Ni
14
Ŋmba shɔnlie kii fiɛn kre, e u yii chiriri, yaa u gbun pimi ni u shɔnlie ŋga ki yili kiyɛ na.
2 Wa shɔnlie tii mbe wraa yirɛ kro lii, la, ŋmba shɔnlie kii fiɛn kre, we yo wre wa kaara ka.
3 Ŋmba u yirɛ kro lii wre n fna mbe ŋmba wra yi li wre le fiɛn. A ŋmba u kaara fun wre, waa shia ŋmba u yirɛ kro lii wre le fiɛn. Ŋgi na hin? Nyiɛkpɔɔ u shɔ.
4 Ŋu wi ŋmbi mbe mu jaa wa sumifun gbun pimi ni hin? U Tafun chiin yiɛ we jaa yire, ndee mbe to. A we jaa yire. Ŋgi na hin? O Tafun wre we ti u yire.
5 Wa jawa na ble ka kpɔɔ mu wɛ ka na, a wa na jawa na yi kro yila. Ndro kro fna mbe u jawala yire gbiŋmbi.
6 Ŋmba u ble ka wru mu wɛ ka na kre, u ki pini na o Tafun wre kaan mɛɛ. A ŋmba u yirɛ kro lii kre, u yi lii na o Tafun wre kaan mɛɛ. Ŋgi na hin? U Nyiɛkpɔɔ kaan mboo ki na. A ŋmba u sro ka fun kre, u ki fun na o Tafun wre kaan mɛɛ, na Nyiɛkpɔɔ kaan mboo ki na.
O Tafun Wre Wolo Lɛ O Kro
7 Wa n wa o nu mu tni mu uyɛ ŋga, a wa n wa o nu mbe ku mbe uyɛ ŋga.
8 Na o tni o, oo wa mu tni mu o Tafun wre ŋga, a na o ku o, oo wa o Tafun wre kɛɛ. Kena na o le o, na o ku o, o Tafun wre wolo lɛ wre.
9 Ŋgi na hin? Kristo na ku mu nyi, imi kie pe mbe u pe kuulo na ŋmaafɛɛnlɛ kro Tafun.
Nyiɛkpɔɔ Chiin We O Kro Kpra Kun
10 Kena yire, mni a e na e ŋmbilɛ gbuun pimi ni hin? Ndee mni a e na e ŋmbilɛ le fiɛn fiɛn hin? O kro we yire Nyiɛkpɔɔ yiɛ, mbe u o kpra kun.
11 Pe ki nyunɔ Nyiɛkpɔɔ hlɛ kre nu mu tɛɛ mbo,
“O Tafun Nyiɛkpɔɔ wre yo na,
ŋga nii wa ŋga,
mi yiɛ ndro kro we kosie kan,
mbe mi Nyiɛkpɔɔ ŋga mɛɛ.”a
12 Ki tia, o kro we o kaalɛɛ nyu wɔ Nyiɛkpɔɔ wre yiɛ nununu.
O Gbrontohaa
13 Kena yaa ti mbe o na oyɛ gbuun pimi ni, la, ki fna o le na waa pe gbronto dnɛ mbe o ŋmbilɛ ŋga, ndee mbe kee ka pe mbe ki ti pe sisaa ka pe.
14 Ŋga mi na o Tafun Yesu pe nunu kre ndra na, ki tia ni chin na yaka n wa mu pe nɛɛrɛ yira, la, na wa shɔ mu li na yira ka pe u pan nɛɛrɛ yira kre, wre pan ki pe nɛɛrɛ yira.
15 Na yira ŋga mu li ndra na, kee ka we mu ŋmbrɔ ta kre, kena mu n na nyaari koroo nu. Kena maa ti sro ŋga mu li ndra na, mbe mu ŋmbrɔ ŋmba na Kristo yila mu ku wre kla.
16 Kena maa ti mbe kee ŋga mu kra na ki nyu kre mɛɛ sisaa ta.
17 Ŋgi na hin? Nyiɛkpɔɔ ŋunumu kre n pe aliire na gbɔɔrɔ kee, la, ki pe frakaa, na wejinyiŋge, na yɛshɔɔrɔ kee ŋga Kpra Ŋumu wre kaan.
18 Kena ŋmba u Kristo sumi yire kolo nyjɛ na kre, Nyiɛkpɔɔ yiɛshɔ u na, a leele na u le na nyjɛ u pini kre nyu.
19 Kena kee nyjɛ yi paan na wejinyiŋge ni, na o ŋmbilɛ leni gbeŋmbaa yire na ki fna o yiɛ taa.
20 Yaashia yila sro na mbe Nyiɛkpɔɔ tnumu kla. Sro kro pe cheche, la, ki pe sisaa na mu sro ka li, mbe ki ti mu ŋmbrɔ to sisam nu.
21 Kena ki nyu na mu kaara kaa ti, ndee mbe simi gbɔɔ ti, ndee mbe ma kee ka nyini pe mbe ki ti mu ŋmbrɔ to.
22 Kena shɔnlie ŋga mu ta yire kee nyjɛ nu kre, ti ki kro ŋu na Nyiɛkpɔɔ lalaa. Kee ŋga lewo le na ki nyu, a wra ki pini kre, na u n uyɛ gbun pini ni ki na kre, u yiɛshio.
23 La, na mu mu jawala pe shiin sro ŋga mu li na kre, na mu ki li, Nyiɛkpɔɔ we mu gbun pimi ni. Ŋgi na hin? Mu n ki li shɔnlie ni. A kee ŋga pee nu shɔnlie n wa kre pe sisaa.