Kepelee Nyjɛ Yi Fna Kristo Leele Ni
15
Wre mblɛ shɔnlie ki kpɔɔ kre, o fna mbra mblɛ shɔnlie kii fiɛn pre leni gbeŋmbaa, mbe waa oyɛ yiɛ nyi.
2 Ki fna mbe mu kee mu ŋmbrɔ yiɛ nyi, u chichie na, imi kie pe mbe ka ya u shɔnlie na.
3 Ŋgi na hin? Kristo nsra uyɛ yiɛ nyi, imi na pe ki nyunɔ Nyiɛkpɔɔ hlɛ kre nu mu tɛɛ kre mbo, “Tɛɛlɛɛ nyjɛ pra mu tɛɛlɛ kre, ndaa yi shɔ mu niyɛ ŋga.”a
4 Kee nyjɛ pe nyunɔ Nyiɛkpɔɔ hlɛ kre nu mu tɛɛ fa kre, pe yi nyunɔ mu tɛɛ mbe yi o nyina, mbe o na kaan, mbe frɔ, mbe gbeŋmbaa ŋga kee kre o leni kre ta.
5 Kena Nyiɛkpɔɔ ŋmba u frɔ kaan, na gbeŋmbaa leni wre, u ti mbe e jaa jawala nunu ta, nyjila ŋga e taa Kristo kee yire na ŋga,
6 mbe ki ti e kro chaa mbe mana nunu tɛɛ mbe Nyiɛkpɔɔ, o Tafun Yesu Kristo lɛ wre ŋga yɛnyiŋge.
Yesu Judae, Na Mblɛ Pe N Pe Judae Kro Shɔ
7 Kena e eyɛ yii, imi na Kristo wree e yii, mu tia e na Nyiɛkpɔɔ kaan yɛnyiŋge kre.
8 Ŋgi na hin? Ni yuu e pan na, Kristo wre na pan mu Judae sumi, mna pe nyina na Nyiɛkpɔɔ pe kprafun. Imi kie pe mbe Nyiɛkpɔɔ kee ŋga wra yo o tolɛɛlɛ pan kre pe yɛŋgɛ,
9 mbe ki ti mblɛ pe n pe Judae pre yire Nyiɛkpɔɔ foorochiɛn na mbe u ŋga mɛɛ. Imi na pe ki nyunɔ Nyiɛkpɔɔ hlɛ kre nu mu tɛɛ kre mbo,
“Kena mbe mu ŋga mboo mblɛ pe n pe Judae pre nu,
mbe mɛɛ kɔ mbe mu mɛɛ yile.”b
10 A kee kre chɔɔ yo mbo,
“Yire mblɛ e n pe Judae pre,
e ti mbe yire na Nyiɛkpɔɔ leele mblɛ u wɔ pre yiɛshɔ.”c
11 Kee kre yo na mbo,
“Yire mblɛ e n pe Judae pre,
e Nyiɛkpɔɔ ŋga mɛɛ.
E ti mbe ndro kro u ŋga mɛɛ.”d
12 A Isaiah na ndru mu yo mbo,
“Jesse nɔɔ ndro we yiri,
wre we paan ŋunumu li
mblɛ pe n pe Judae pre na,
a wre na pie na kaan.”e
Yɛshɔɔrɔ Na Wejinyiŋge Na Dankna Nyiɛtalaa
13 Kena Nyiɛkpɔɔ ŋmba na o kaan wre, u e shɔnlie ŋga e ta le, mbe e ŋga yɛshɔɔrɔ, na wejinyiŋge, mbe kpra Ŋumu wre jaŋga ti mbe e dankna kpɔɔ ta nyjila kro nu.
Paul Tnumu
14 Ni wolo, mi titi shɔ mu li na kee chiririi wa e nu, a e kee yire kro chin, mu ja na eyɛ nyina.
15 La, ni hlɛ ŋga nu rɛ, ni gbun ta, mu kaalɛɛ yɛ wɔ mu yi nyunɔ na e sɔɔnri yi yi, ŋgi na hin? Nyiɛkpɔɔ ni dumi,
16 mu ni pe Yesu Kristo sumifun, leele mblɛ pe n pe Judae pre pan. Ni pe na Judae srawɔfun wi, na ketaan ŋga ki yiri Nyiɛkpɔɔ pan kre kpali, mbe ki ti mblɛ pe n pe Judae pre pe na sra wɔ yira ŋga Kpra Ŋumu pe cheche, a Nyiɛkpɔɔ yiɛshɔ ki na yi.
17 Kena ŋga mi na Yesu Kristo ta mu pe nunu ŋga, mbe jaa niyɛ kpɔɔ Nyiɛkpɔɔ tnumu kre ni.
18 La, mba nyu nyaa mbe kee ka yo, fɔna ŋga Kristo yire ni na mu pe, mbe ki ti leele mblɛ pe n pe Judae pre yire ni nyu kee, na ni kepele,
19 na kawako kee nyjɛ yi Nyiɛkpɔɔ jaŋga nyina na, mbe paan ndie tɛɛ Nyiɛkpɔɔ kee kre na. A ŋga ndaa yire Jerusalem na na shie Illyricum na kre, na pan ni Kristo ketaan kre kpali na shie.
20 Ŋga ni chaa yi na, mbe ketaan kre kpali mbe tro mna pe n da mu Kristo kee loo tun, mbe kia kɔɔ pan na ni sɛ nyuŋgo sin mu taa wa nyuŋgo nɔɔ na.
21 Imi na pe ki nyunɔ Nyiɛkpɔɔ hlɛ kre nu mu tɛɛ kre mbo,
“Leele mblɛ pan pe n da mu u kee yo tun kre,
pie u kee loo.
Mblɛ pe n da mu u kee loo kre,
pie nɔɔloo ta.”f
Paul Rome Sɛɛ
22 Kre kee ŋga ndra na, ni n kolo ta mbe paan e shaari.
23 La, fuŋga, ŋga ni tnumu kɔ kre tra ŋga nu ŋga, a kie pe yɛlɛ tataara yi ŋga, ndaa chaa mbe paan e shaari kre ndra na,
24 ni shɔ mu li na mbe pan fuŋga. Ni chaa na mbaa tro na shie Spain na kre, mbe ni e nyaa shaari. Na mi na yire waa tni nyjila chiɛri kre, mbe e ya ni na, mbe ni jaa sɛ.
Pe Tɔɔ Waari Mbe Sɛ Jerusalem Shianfɛɛnlɛ Ŋga
25 La, fuŋgaami ŋga rɛ, ni shie Jerusalem na mbe sɛ Nyiɛkpɔɔ leele pre ŋga yirɛ.
26 Ŋgi na hin? Macedonia, na Achaia leele tɔɔ waari yɛshɔɔrɔ ni na shie mbe sɛ pɔlɛfɛɛnlɛ mblɛ pee wa mu chaa Jerusalem sumifɛɛnlɛ nu pre ŋga.
27 Ki tna pre titi pan na pe ma pe, a pan ki fna pe pe. Ŋgi na hin? Na pe Judae pre dwamu ŋga Nyiɛkpɔɔ pe ŋga kre ka ta, kena pre fna mbe jaa ya pe na dwamu yirɛ nyjɛ pe ta yire yɛ ni.
28 Kena na mbaa kre tnumu ŋga kɔ, mu sɛ swa ŋga pe waari kre kro ni mu pe ŋga kre, mbe paan tro mbe sɛ Spain na.
29 A ni chin na na ni pan e jaara kre, mbe pan na Kristo dwamu kpɔɔ ni mbe e ŋga.
Paul Nyiɛtalaa
30 Ni wolo, ni e tali o Tafun Yesu Kristo wre, na Kpra Ŋumu wre koroo nu na, e ti mbe o Nyiɛkpɔɔ tali mbe u ya ni na.
31 E Nyiɛkpɔɔ tali, mbe u ni shɔ mbe yili Judea leele mblɛ pe n shɔnli pre kɛɛ. A e Nyiɛkpɔɔ tali mbe kee ŋga mbe sɛ pe Jerusalem na kre Nyiɛkpɔɔ leele mblɛ pee wa wa kre yiɛ nyi.
32 Kena na ki tna Nyiɛkpɔɔ pan, mbe ni ndruu pan e nu yɛshɔɔrɔ ni mbe wuu chiɛri.
33 Kena yire na Nyiɛkpɔɔ ŋmba u o kaan wejinyiŋge kre e tni. Ami.