Shaaraa
16
Ni o jaa Phoebe ŋmba u tnumu tuni Cenchrea sumifɛɛnlɛ nu wre kee yuu e pan, kia mu, we pan wa.
2 E u yii chichie o Tafun wre mɛɛ nu, imi na ki fna Nyiɛkpɔɔ ndro ni. Yira ŋga kie u shian kro e ya u na. Ŋgi na hin? Imi na u yaa lenɛɛrɛ na kre chɔɔ, pan u ya ni na.
Roman Shaaraa
3 Ni Priscilla, na Aquila, mblɛ pe pe ni ŋmbilɛ tnumutunfɛɛnlɛ Yesu Kristo nu pre shaari.
4 Pra pe ŋmaa tɛɛ mu ni ndra lɔ. Mi chiin ma ni pe kaan mboo, sumifɛɛnlɛ mblɛ pe n pe Judae pre kro pe kaan mboo na.
5 Ni sumifɛɛnlɛ mblɛ pe fnii pe katoo wa kre kro shaari na.
E ni nunu chichuo Epenetus, ŋmba wra klu mu Kristo shɔ mu li Asia tra nu wa wre shaari ni pan.
6 A e Mary ŋmba u tnumu kpɔɔ tun e nu wa wre shaari ni pan na.
7 Ni Andronicus, na Junias, ni wolo Judae mblɛ pra yii mu ya ni na mu le nyuŋgo pre shaari. Pe pe chin Nyiɛkpɔɔ bitumblɔ pre nu, a pe klu mu Kristo chin ni na.
8 Ni Ampliatus, ni nunu ŋmba ni kori o Tafun ndra na wre shaari.
9 Ni Urbanus, o ŋmbrɔ Kristo Tnumutunfun wre shaari, wre na ni ŋmbrɔ chichuo Stachys ni.
10 Ni Apelles ŋmba u Kristo sumi kpra ni wre shaari.
Ni Aristobulus sele wolo pre shaari.
11 Ni Herodion, ni ŋmbrɔ Judae wo wre, na ni wolo Kristo leele mblɛ pee wa Narcissus sele nu pre kro shaari.
12 Ni Tryphena, na Tryphosa chiɛlɛ mblɛ pra tnumu tun kpɔɔ mu o Tafun wre ŋga pre shaari,
na ni nunu chichuo Persis, chiɛlɛ mblɛ pra tnumu kpɔɔ tun pre wa wi.
13 Ni Rufus, Kristo tnumutunfun ŋmba tnumu ki yiɛ nyi wre, na u lo ŋmba wra ni wru mu pe u pɔ wre shaari.
14 Ni Asyncritus, na Phlegon, na Hermes, na Patrobas, na Hermas, na u wolo hamblɛ pre kro shaari.
15 Ni Philologus, na Julia, na Nereus, na u jaa, na Olympas, na Nyiɛkpɔɔ leele mblɛ pee wa pe pan wa pre kro shaari.
16 E eyɛ shaari chichie ni pan.
Kristo sumifɛɛnlɛ pre kro e shaari.
Kee Hɛnyi
17 Ni wolo, ni e tali, e mblɛ pe leele lalaa yɔɔlɛ, na leele shɔnlie kna na juule pre dɔɔta. Pre pe paara na Nyiɛkpɔɔ kee nyjɛ e twan yire taanla. E eyɛ kun pe na.
18 Ŋgi na hin? Leele mblɛ pe yire kee yire pini kre, o Tafun Kristo wre ma pe sumi, la, pre titi niŋge yirɛ na pe taa. Pre pe paaraa nyutnam ni na leele mblɛ pe n sisam chin pre fana.
19 A yire rɛ, ndro kro e nyjiimu kre loo, ki tia ni yiɛshɔ e na. Ni chaa mbe e kala chin, mbra ŋga ki nyu pini, mbe yaa kɔɔ sisaa ka pimi li.
20 A Nyiɛkpɔɔ ŋmba u o kaan wejinyiŋge kre, kia mu kuraa mbe u ti e Sutna taanla mbe brɛri. Yire na o Tafun Yesu dumiɛ e tni.
21 Ni ŋmbrɔ tnumu tunfun Timothy wre e shaari. Pan Lucius, na Jason, na Sosipater, ni wolo Judae pre e shaari.
22 Mi Tertius ŋmba ni hlɛ ŋga nyunɔ ŋga e shaari o Tafun wre mɛɛ ni.
23 Ni nyuŋgofun Gaius ŋmba katoo sumifɛɛnlɛ pre fni kre, u e shaari.
Erastus, chia ŋga swa tɛɛfun wre, na o ŋmbrɔ Quartus e shaari.
24 Yire na o Tafun Yesu Kristo dumiɛ e tni. Ami.
25 E ti mbe o Nyiɛkpɔɔ ŋga yɛnyiŋge. Wre we jaa ti e yire gbiŋmbi e shɔnlie nu, mbe yire Yesu Kristo ketaan kre ni kpali e pan kre, na kekpra ŋga kra ndra e na fa kre na.
26 La, fuŋga rɛ, pe yire Nyiɛkpɔɔ kee nyanyofɛɛnlɛ pre kee yire pe nyunɔ yire na, mu kpra kre wɔ fimi na a e nya. A ki yire blenyini Nyiɛkpɔɔ wre nyu kee na, a waŋgra kro leele kee kre loo, mbe shɔ mbe li, mbe ndie tɛɛ Nyiɛkpɔɔ pan.
27 Nyiɛkpɔɔ ŋmba u pe kachiŋu nunu chom wre, u yɛnyiŋge ki yire Yesu Kristo na mbe pe u wo nyjila kro nu. Ami.