Wɔɔ Na Paul Nu
28
Ŋga o na yili krɔ kre nu mna to fimi na kre, bawa o na loo na kre kuyɔɔsu tra kre mɛɛ Malta.
2 Bawa leele pre na koroo ŋga ŋmbrɔ o n da mu nya tun tɛɛ mna o ŋga mmaŋge, mna kanhun gbɛɛri o pan, na nyiɛ paan, a weere naa kuu ma.
3 Bawa Paul na sɛ kejenyi koli mbe le kanhun, jaa na wɔɔ wa yi nu, a kanhun kre gbɛŋgɛ na le u nu, a wra yili mu Paul kɛ nu, hali na pɛli ki na.
4 Ŋga bawa leele pre na nya na wɔɔ wre pɛli Paul kɛ na ma kre, a pra kna na yuu peyɛ pan mbo, “Kafinɛ ma, linkufun wi blɔ ŋmba, hali ŋga u n kun epo kre nu ŋga kuraa kre, yaka wa jaa ti u shɔ ŋga nu.”
5 A Paul na wɔɔ wre nyaara mu wa kanhun kre nu, hali yaka nsra u ta.
6 Leele pre naa u le na we tintin, ndee we na foli mbra to titɛɛ kre nu wa mbra ku. A pra u le chiin na yaka n na u taa, a kra tia pra ndru mna pe jawala chinɛ, mna kna na yuu mbo, “Sɛɛn ka nyini wi kre.”
Publius Lɛ Saanla Haa
7 Mna o na nyi kre mbɛɛ na, tra yɛ naa wa wa mu pe ŋunu Publius wee, wre na wi tra kre ŋunu. A wra o yii imi ki fna ble taarɛ.
8 Kre nyjila kre, na kabro Publius lɛ gbun mu sniŋge nyuŋgo, a wraa shie kaan na. A Paul na le u kro, mna sɛ nyiɛtali mu u ŋga, mna kɛnyi taa u na, a yira kre na laa u na titɛɛ kre nu.
9 Bawa tra kre leele mblɛ praa yaa kro na Paul kee loo, mna fɛ mu pan u lawee, a wra pe tra kro.
10 Ŋga kra pan ma kre, pra o kɛ yirɛ tataara. Ŋga o na yo oo sɛ kre, a pra o ŋga yirɛ nyjɛ yira o shian kro.
11 O na li nyiɛpɔ taarɛ wa, a o na Alexandria krɔ ka nya, a kra pan mu weere nyjila li wa, a o na ki bali, na pe sɛɛn attae foto kan ki yiɛ.
12 A o na sɛ yire Syracuse na mna li wa ble taarɛ.
13 Bawa o na yiri mna kna mna to Rhegium na. Ki nyisee na, a fuflɛ ŋga ki yirii tapan haa kre na gbun. Ŋga nyiŋge na se, a o na sɛ le Puteoli na, mna tii krɔ kre nu.
14 Bawa o na o wolo plɛ nya, a pra o tali na o tni pe jaara ble kɔɔnashin. A o na yiri wa mna sɛ le Rome na.
15 Kre nyjila kre, na o wolo mblɛ praa wa Rome na pre o kee loo, mna pan mu o kun mu shie Appius jafa lawee. A pe plɛ na o fni lawee ŋga praa yeeri “Wuuhɛɛ Taarɛ” kre nu. Ŋga Paul na pe nya ma kre, a wra Nyiɛkpɔɔ ŋga mboo, a lɛɛ na nyjii u na.
16 Ŋga o na le Rome na kre, sojae pre na Paul ŋga kolo, a wre na soja ŋmba u u le wre na sɛ lawee cha mu tni peyɛ.
Paul Na Judae Paara
17 Ble taarɛ kɔkro, a Paul na Judae loplombo pre yeeri. Ŋga pra pan mu fni kre, a wra yo pe pan mbo, “Ni wolo, kii wa na ni n yaka pe mu o leele pre wa, ndee mu o tolɛɛlɛ paala yire ka taan, nde pra je mna ni yii Jerusalem na, mna le Roman leele kɛɛ.
18 Ŋga Roman kalalifɛɛnlɛ pre na kee kre le le kre, praa chaa mbe ni wa. Ŋgi na hin? Na yaka n nyina na ki fna ni kumu pimi li.
19 A imi Judae leele pre naa paara na ni taanla kre ndra na, a ndaa ni jawala pe na mbe da waŋgra kro tafun yiɛ na mbe ni nyu wɔ. La, mi jawala nu kre, mi n kee ka ni mbe ni leele taan.
20 Kena kre kee ŋga na ni e yeeri, na ni chaa mbe e nya, mbe paara na e ni. Ŋgi na hin? Ŋmba na Israel leele kaan kre ndra na pe yila mu jlɔnyi nyjɛ le ni kɛnyi na kre.”
21 A pra kna mbo, “Judae mblɛ pee wa Judea na pre, pe n o nyunɔ mu kee ka tun, a o wolo Judae mblɛ pe yiri wa na paan mna pre, wa n da mu mu kefɔɔn ka yo o pan tun.
22 Kena o chaa mbe mu jawala chin. Ŋgi na hin? Kre kuo ŋga rɛ, o chin na pe paara na ki taanla lawee kro nu.”
Paul Paara Rome Na
23 Pra ble tɛɛ, mbe pre na Paul fni, pra ble kre tɛɛ imi kie pe mbe pe jaa fni nɛɛrɛ mbe pan mna u nyi kre. Ŋga pra fni kre, a wra pe nyina kee ŋga ki pan kre kro mu yire bnimi, mu pan mu yila kɔ. Wra paara mna pe nyina Nyiɛkpɔɔ ŋunumu kee kre, hali mna pe nyina mbe pe Yesu kee nyjɛ yii wa Moses mbra yire, na Nyiɛkpɔɔ kee nyanyofɛɛnlɛ kee yire nu shɔ mbe li.
24 Plɛ na kee nyjɛ wra yo yire shɔnli, a pe plɛ nsra yi shɔnli.
25 Ŋga pe kro nsra jawala nunu ta kre ndra na, pra nyina. Kre nyjila kre, na Paul kee nunu ka yo pe pan mbo, “Kpra kee Kpra Ŋumu wre na yire Isaiah na mna yo e tolɛɛlɛ pan kre mbo,
26 ‘Ni yo mu pan na,
sɛ yo leele pre pan na,
ee na kee kre ndru,
la, yaa ki nɔɔloo fio,
ee na kee kre nyaa,
a yaa ki chin.
27 Ŋgi na hin?
Pre leele mblɛ ndie kan,
a pe kala nɔɔ loohaa sheli.
Pe nyiɛlɛ tɔ tɔ mu tni,
mbe pia kee kre nya,
mbe ki loo na pe ndiile ni,
mbe pe lolonyi tɛɛ mbe kee kre nɔɔloo,
mbaa chinɛ mbe ni waa pe tra.’a
28 Kena ni chaa mbe e chin na Nyiɛkpɔɔ ŋmaashɔmu kee kre, pe sɛ leele mblɛ pe n pe Judae pre ŋga ki yi, pre we ki loo.”
29 Ŋga Paul na kre kee ŋga yo kre, Judah leele pre na zaanri mna sɛ na peyɛ lii kakra tataara.