3 Ŋga nyiŋge na se kre, o na sɛ yire Sidon na. A sojae lopom Julius, na Paul fooro chin mna u ŋga kolo na u sɛ le u nɔɔlɔ pan, mbe praa u le.

4 Ŋga o na kɔ bawa kre, a o na le krɔ nu, na fuflɛ gbuun na o fnii, a o sɛhaa yiɛ na sheli. Kra tia o na Cyprus tra kre kun mu wa.

5 Mna tro Cilicia na Pamphylia tra mbɛɛ na, mna pan mu tii Lycia tra kre chia ŋga pe yeeri Myra kre na.

6 Bawa sojae lopom wre na Alexandria chia krɔ ka nya, na ki shie Italy tra nu, a wra o le ki nu.

7 O na ble yɛ li epo yiɛ na, na waa jaa sɛ kpɔɔ, hali kra sheli mu o ŋga, a o na chin na o mbra Cnidus chia kre na, a imi na fuflɛ kre naa gbuun na o fni ma kre na, o na kna mna tro Crete tra lawee ŋga pe yeeri Salmone kre mbɛɛ na.

8 Pan o naa bublɔ na tro epo nyu kre na chɛchiɛri, mna chin mu pan mu da lawee ka nu, praa ki yeeri, “Krɔɛ yirehaa.” A kra mbra chia ŋga praa yeeri Lasea kre na.

9 Ŋga pe nyjila tataara na kla, a pe yɛlɛ nyu ble kpɔɔ kre na tro, a kra sheli mu pe ŋga epo kre yiɛ na, kra tia Paul na paara mna pe nyina mbo,

10 “Bilɛ, ni nya na kanyana, na yirɛ klaa wa o kolo kɔɔn ŋga nu yiɛ. O tuuro, na krɔ ŋga chiin mna yie jaa yili o kɛɛ. La, oo wi wre titi ŋmaa na.”

11 La, sojae lopom wre nsra ndie tɛɛ Paul pan, fɔna ŋga krɔ kre ŋmaafun, na ki tafun wre na yo kre bɔkɔ.

12 Ŋga pra chin na krɔɛ yirehaa ŋga kraa wa wa kre n nyu chiriri, mbe pe jaa tni wa weere nyjila kre ndra na, pe nɛɛrɛ naa yuu na pe gbeŋmba mbe da Phoenix na, Crete tra ŋga nu krɔɛ naa yire kre nu, kena pe weere nyjila kre li wa. Krɔɛ yirehaa kre nyu naa shiin, a yi kro naa wa yila finhaa.

13 Ŋga tapan haa fuflɛ kre naa gbuun fiɛnfiɛn kre, pra jawa na pe ŋga pe chaa ta. A pra krɔ kre saan mna tro Crete tra kre mbɛɛ na.

14 Titɛɛ kre nu to a fuflɛ kre na ndru mu saŋga mu yiri nyjeeri Crete haa na gbuun badaaŋga.

15 Imi na fuflɛ kre na gbun mu krɔ kre yii kre, ki nsra ja mbe sɛ yiɛ na, a o na oyɛ wa, a fuflɛ kre naa shie na o ni.

16 A kra sɛ tro na o ni kuyɔɔsu fiɛn ka mbɛɛ na, praa ki yeeri Cauda, bawa o na chin mu gbeŋmba, mu krɔ fiɛn ŋga kraa wa mu pɔ kpɔɔ kre nɔɔ na kre pɔ chiriri.

17 Ŋga o na ki yire nyjeeri kre, a o na krɔ kpɔɔ kre pɔ tapan. O naa fiɛ na oo sɛ to tanyiɛ na, ki tia o na ki yoŋgo kre saan, a fuflɛ kre na ndru na shie na o ni.

18 Imi na fuflɛ kre, na nyumu kre naa o mɔŋɔi kpɔɔ ma kre, ŋga nyiŋge na se kre, a leele pre naa pe yirɛ woni na waa nyumu nu.

19 Ki ble taarɛ ble kre, na yira ŋga na pe kɛ we to krɔ kre lam kpan, na waa pe ki waa.

20 Ŋga o na li ble tataara, na waa yila, na wɔɛlɛɛ nya kre, a fuflɛ ŋga kraa gbuun kre nsra pe yira fiɛn kre, o jawala kro na kla, a o n na chin na ŋmaafɛɛnlɛ lɛ wre na.

21 Ŋga kra da ble tataara na pe n yaka le nyuu kre, Paul na yiri mna yire pe lalaa mna paara pe pan mbo, “Bilɛ, ki fna mbe e na klu mbra ni kee kre ndaa yo kre loo, mbe waa na yili Crete na mbra paan kala ŋga nyini nya, mbe o yirɛ wa mbe fun imi.

22 Fuŋgaami, ni e tali, e eyɛ gbun yii, wa ŋmaa wa fun, fɔna krɔ ŋga.

23 Aŋge blee, Nyiɛkpɔɔ ŋmba u ni ta, a ndaa u sumi wre bituŋu na pan mna yire ni mbɛɛ na mna yo ni pan mbo,

24 ‘Paul, maa shia fiɛ, fna ki fna mbe mu yire waŋgra kro tafun wre yiɛ. Le, Nyiɛkpɔɔ mu ŋga leele mblɛ ŋu na pree wa krɔ ŋga nu ŋga kro.’

25 Kena bilɛ, e eyɛ gbun yii, ni Nyiɛkpɔɔ shɔnli na ŋga ni loo kre we pe ma.

26 La, ni chin na oo sɛ to kuyɔɔsu ka na.”

27 Kra da kranu shiin, na oo wa na lami Adriatic epo kre yiɛ na. Kie pe ndroo ka, a krɔ kre brifɛɛnlɛ naa jawa na o dani tra lawee ka nu.

28 A pra maŋa wa lɔɔ kre nu, mbe ki jijuom chin, ŋga pra ki wa kre, na kie pe yaadi fuloe shiin, a pra sɛ yiɛ chiɛri na, mna ndru mu maŋa fɔŋgɔ wa na, na kii yaadi fulo na kɛ.

29 Ŋga kra pan ma kre, praa jawa na aada pie kɔɔ sɛ krɔ kre sin dnɛ na kre ndra na, a pra srugue kpɔɛ jijirɛ wa lɔɔ, mna tɛɛ mu krɔ kre yii ki nɔɔhaa, na nyiɛtali mbe nyiŋge se.

30 Ŋga krɔ kre brifɛɛnlɛ pre naa chaa mbe fɛ kre ndra na, a pra krɔ fiɛn kre saan mna wa lɔɔ, mna peyɛ pe na pe shie mbe sɛ srugue wa krɔ kpɔɔ kre yiɛ mbe ki yii.

31 A Paul na yo sojae lopom wre, na sojae mblɛ praa wa wa pre pan mbo, “Na leele mblɛ n tni krɔ ŋga nu, yaa shia jawa na ee ŋmaa ta.”

32 Titɛɛ kre nu to, a sojae pre na krɔ fiɛn kre mɛnyi yire knumu, a krɔ fiɛn kre naa shie ki yɛ.

33 Ŋga nyisee nyu naa dani kre, a Paul na yo pe pan na pe sro chaa le nyuu. Ŋgi na hin? “Ble nununu kɛmbɔjijirɛ yi kre, na e n yaka le nyuu, na pan e jiin.

34 Kena ni e tali na e yɛyɛ cha e ka, kie ti mbe e faŋga ta. Ni yuu e pan na hali e wa nyjuro nunu chom kuraa wa kɔ mbe to.”

35 Ŋga Paul na yo ma kre, a wra paanu bali mna Nyiɛkpɔɔ ŋga mboo leele pre yiɛ na, mna ki peeri na kaa.

36 A pe lam na chin mu nyjii pe na, a pra yɛyɛ cha mu ka.

37 Na leele mblɛ oo wa krɔ kre nu kree lafɛɛ shiin na fuloe taarɛ na kɛmbɔkɔɔnanu.

38 Ŋga pra li mna kɔ kre, a pra sro yire kuɛn wɔ mna wa epo kre nu, a krɔ kre na pe foofoo.

39 Ŋga ndram na saan kre, na pe n tra ŋga na pe da kre, na pe n ki chin. A pra tanyiɛ lawee ka nya epo kre nyu na, mna jawa na ki fna mbe pe lawee cha mbe sɛ yire tanyiɛ kre na.

40 A pra srugue yire saanla mna wa epo kre nu, mna ki yira ŋga ni praa ki yiɛ kna kre mɛnyi yire saanla, mna krɔ kre yoŋgo kre yire mu fuflɛ kre ŋga, a kraa pe ŋunɔ na shie tanyiɛ kre na.

41 A krɔ kre na hɛ sin tanyiɛ yɛ na lɔɔ lam, a ki yiɛ na tii, mna nyjira, hali ki nsra ja mbe jɔŋgɔ. A imi na epo kre naa kani na woni ki nɔɔ na kre, kra tia kra knumu kro.

42 Ki tia sojae pre na jawa na ki fna mbe pe leele mblɛ pe yii na shie pre gbo, na kre ma, plɛ we kɔɔ to lɔɔ mbe blu mbe fɛ.

43 A ŋga sojae lopom wre naa chaa mbe Paul shɔ kre ndra na, wra tia pra pe ti. A wra yo pe pan na mblɛ pie jaa blu kre, pe blu mbe yili fimi na.

44 A pe plɛ na sni taaboe na, a plɛ na tni tni krɔ kre knumɛɛ yɛ na mna kun. Kena imi kra nyi a o na ŋmaa ta mna kun fimi na yi kre.