2 “Ni chin na ni nyiɛnyɔɔrɔ yi na, kee nyjɛ Judae taa ni na krɛrɛ, mbe yi nyu wɔ ŋu tolɛɛ Agrippa yiɛ.

3 Yaka ma, ŋu titi kuraa mu Judae paala kolo kro, na nyjɛ yi mbra taanri kro chin. Kena ni mu tali, mbe mu frɔ tɛɛ mbe ki loo.

4 Imi na ni nyi mu yire ni bimi, mu yire nyjila ŋga nu ndaa wa ni waŋgra nu, na imi ndaa nyi Jerusalem na kro, Judae kro ki chin.

5 Ŋga pe ni chin ki mu titi, na pre titi we kpra yo rɛ, ni tnimu nu kre, ndaa chaa leele mblɛ praa lii o mbra kolo titi na pre nu. A ni kepele kro na nyina na, Pharisee ndro wi mi.

6 Kena fuŋgaami ŋga, kala ŋga ni ta yi na, nii wa na nyu ŋga Nyiɛkpɔɔ na yo mu tɛɛ o tolɛɛlɛ pan kre sri.

7 Kre nyu yoo kre Israel sele kɛmbɔshiin yire sri, mu yiɛnyina na Nyiɛkpɔɔ sumi lafo na blee kre. Tolɛɛ, kre dankna ŋga ndra na Judae yila mu kala ŋga taa ni na kre.

8 Kena ŋgi ki tia e n ki shɔnli na Nyiɛkpɔɔ gboolo nyini ŋga hin?

9 Mi titi chɔɔ na tro kolo fɔɔn ŋga mu chin ŋga kro na, mna yiri mu Yesu Nazareth ndro wre taan.

10 Kre kee ŋga ndaa pini Jerusalem na. Srawɔfɛɛnlɛ pre na ni ŋga jaŋga, a ndaa yire ki na mna sumifɛɛnlɛ pre tataara yii mna le nyuŋgo. A na pe yo pie pe gbo, ni nyu naa wa ki nu.

11 Ndaa shie na sumifɛɛnlɛ pre fiŋge Judae fninyinyi yire nu, a ndaa yire pe na jaŋga na, mbe praa jiɛnlɛ kee yuu mbra Nyiɛkpɔɔ taanla. Imi na ni krɔ na kun na pe ni mu da kre ndra na, ndaa pe kɔŋgɔ nini na shie na pe fiŋge plɛ waŋgrɛ nu.

12 Kre kee ŋga nunu chɔɔ kraa shie na ni ni Damascus na. Srawɔfɛɛnlɛ loplombo pre na ni ŋga kolo, na jaŋga, a ndaa shie wa.

13 Na kie pe lafo chrichri ka na, a lawee na nyi mu yiri nyjeeri, mu pan mu mi na ni wolo pre fɛ mu kun. Kraa chiɛnri mu wɛ yila na.

14 A o kro na foli mu to to tra. Bawa ndaa loo na mana ka paara ni pan Hebrew yolo nu mbo, ‘Saul, Saul, Mni a mu ni pra ma hin? Mu n chin na kanyana mu chaa na muyɛ kaan ra?’

15 A ndaa kna mu wie na, ‘Ni Tafun, ŋu wi ŋmbi hin?’

16 Yiri mu yire sholo. Ni chaa mbe mu ni sumi, mbe ni dansiɛrɛ li, imi na mu ni nya, na imi na mbe niyɛ wɔɔ mu nyina ŋga. Kre na ni yila mu yili mu yiɛ na kre.

17 A mbe mu shɔ mbe yili Judae, na leele mblɛ pe n pe Judae mblɛ nu mbe mu tun pre kɛɛ.

18 Mbe mu sɛ pe nyiɛlɛ nyaa, mbe pe wɔ mbe yili wɔmu nu, mbe pan nyisee nu, mbe pe yili Sutna jaŋga nu, mbe pan mi Nyiɛkpɔɔ nu. Mbe sisam tinkɛɛ ta, mbe lawee ta leele mblɛ pe yire shɔnlie na mu pe chasi pre nu.’

19 Kena Ŋunu Agrippa, ni nsra ndikana pe kee ŋga ndaa nya nyiɛlɛ na kre na.

20 Ki tia ndaa klu mu u kee kre yo Damascus na, mna chin mu sɛ Jerusalem na, mna tro Judea na, mna chin mu sɛ ki yo leele mblɛ pe n pe Judae pre pan, na pe pe jawala chinɛ mbe taa Nyiɛkpɔɔ kro, mbe jawala chinɛɛ kee pe.

21 Kre kee ŋga na Judae pre na yila mna sɛ ni yii pe suminyuŋgo wa, mnaa ni chaa mbe gbo kre.

22 A ŋga Nyiɛkpɔɔ wa ni kro kre ndra na, kre ki tia ni ŋmaa ta mu yire mna, na u dansiɛrɛ lii biile, na loplombo yiɛ. Kee fɔŋgɔ ka ma ni yuu, kee nyjɛ Nyiɛkpɔɔ kee nyanyofɛɛnlɛ, na Moses na yo mu tɛɛ na yie pe kee chɔɔ ni yuu.

23 Imi na Kristo ŋmba Nyiɛkpɔɔ wɔ, wre fna mbe kala nya tataara, na ŋga we ku mbe nyi mbe yili kuulo nu, mbe ŋmaashɔmu kee kre yo mbe Judae, na mblɛ pe n pe Judae pre nyina.”

24 Ŋga Paul na paara a u nyu na to ma kre, a waŋgra lopom Festus na yiri mna fuu Paul na mbo, “Paul tɔɔlɔ mu tɔɔlɔ ra? Mu hlɛ tuan tataara kre tia mu yiɛ n to.”

25 A Paul na kna mbo, “Lopom Festus, ni n na tɔɔlɔ, la, ni kpra, na ni yɛtom kee titi ni yuu kre.

26 Ŋunu Agrippa ŋmba pan ni gbun ta na paara ŋga kuraa kee nyjɛ krɛrɛ chin. Ni shɔnli na kee nyjɛ krɛrɛ ka n ndra u na. Yaka ma, ki ka n wa mna pe wɔmu nu.

27 Ŋunu Agrippa, kena mu Nyiɛkpɔɔ kee nyanyofɛɛnlɛ pre kee yire shɔnli ŋgaa? Ni chin na mu pe kee yire shɔnli.”

28 A Ŋunu Agrippa na kna mu yo Paul pan mbo, “Mu chaa mbe ti ni kaari Kristo ndro fuŋgaami ra?”

29 A Paul na kna mbo, “Na fuŋgaami yi o, na mbakɔ yi o, ni Nyiɛkpɔɔ tali, ni n yo ŋu chiin na, la, mbe mblɛ pe fni na kee ŋga ndru aŋga ŋga kro, na pe na mi wi, fɔna jlɔnyi nyjɛ yii wa ni kɛnyi na ŋga chiin bɔkɔ.”

30 Bawa waŋgra lopom Festus, na ŋunu Agrippa, na Bernice na leele mblɛ praa wa mu ya pe na pre na yiri,

31 mna yili fimi na, mna sɛ bɔɔnri mbo, “Wre blɔ ŋmba, u n kee ka pe a ki pe kumu, ndee nyuŋgo lee kee.”

32 A Agrippa na kna mu yo lopom Festus pan mbo, “Na yoo ma u yo na u chaa mbe yili waŋgra kro lopom Caesar yiɛ na kre, oo na jaa u wa mna.”