6 Kie pe ble kɔɔnatarɛ, ndee ble kɛ yɛ kɔkro kre, waŋgra lopom Festus na ndru mna sɛ Caesarea na. Ŋga wra le a nyiŋge na se kre, a wra tni u kala li jɔɔn na, mna tia pra sɛ pan na Paul ni.

7 Ŋga Paul na pan kre, a Judae mblɛ pra yiri Jerusalem na mna pan wa pre na pan mu u fɛ mu kun, na kekpɔɛ nyjɛ nɔɔ pia jaa nyina kuraa yuu na u taanla.

8 A Paul na u nyu wɔ mbo, “Ni n kee ka pe mu Judae mbra yire, ndee mu Suminyuŋgo kre, ndee mu ŋunu Caesar taan.”

9 Ŋga Festus naa chaa mbe yɛnyiŋge ta Judae pre pan kre ndra na, a wra kna mu Paul wie mbo, “Mu chaa mbe ni sɛ mu kee kre taa mbe li Jerusalem na ra?”

10 A Paul na kna mbo, “Waŋgra kro tafun Caesar kalalihaa ni nyi kre, a mna ki fna mbe pe ni kala li. Ni n kee sisaa ka pe Judae na, imi na ŋu titi kuraa ki chin kre.

11 Hali na ni pimi li kefɔɔn ka pee na, a ni fna kumu ni kuraa kre, ni n ni kumu je. A na kee nyjɛ Judae mblɛ taa ni na nyjɛ krɛrɛ n pe kpra kee kre, ndro n wa kolo ni na we ni wru mbe le pe kɛɛ. Kena ni tali na mu sɛ na ni kee kre ni waŋgra kro tafun Caesar pan.”

12 A waŋgra lopom Festus na u loplombo pre na ki jawa na, na u yo na waŋgra kro tafun pan u chaa mbe pe u kee kre li waa, kena ki fna u sɛ wa.

13 Ble yɛ na tro, ki ble ka, ŋunu Agrippa na u jaa Bernice na pan Caesarea na, mbe paan Festus ŋga mmaŋge.

14 Pra mu wa, a kra tia wra Paul kee kro yo pe pan mbo, “Blɔ waa wa ni pan mna, a Felix na u ti nyuŋgo mu sɛ.

15 Ŋga ble ndaa sɛ Jerusalem na kre, srawɔfɛɛnlɛ loplombo pre, na chia loplombo pre, na Judae pre na u kee yo ni pan, mna ni tali na ni u kee li mbe u gbun pimi ni.

16 A ndaa yo pe pan na Roman paala n nyina ma, na mu ndro gbun pimi ni, nyjila ŋga ni wre na mblɛ pe kala ta pre n fni mu paara.

17 Ki tia ŋga pra pan mna le mna kre, ni nsra tia kee kre na mu. Ki nyisee na ndaa tni ni kala li jɔɔn na, mna tia pra sɛ pan na Paul wre ni.

18 Ŋga wre na mblɛ pra kala ta pre na pan mu fni kre, pe nsra kee chiriri ka ta mna u taan, imi na ndaa ki jawa kre.

19 La, pre na Paul na pre titi sumiɛ kre kakra li, a pra ndru na yuu na blɔ wa mɛɛ naa Yesu, a wra ku, a Paul na yuu na wra ndru mu nyi.

20 Hali ni nsra chin imi na mbe kre kee ŋga yo, kra tia ndaa u wie na we ti pe sɛ u kee kre taa mbe li Jerusalem na, ndee mni hin?

21 Ŋga wra yo na u chaa mbe yili waŋgra kro tafun yiɛ na kre, a ndaa yo na pe u ti nyuŋgo wa, mbe sɛ su nyjila ŋga nu mbe ti pe sɛ na u ni Caesar pan.”

22 A Agrippa na kna mu yo Festus pan mbo, “Mi titi we na chaa mbe u nyu kee loo.”

23 Ŋga nyiŋge na se kre, Agrippa na Bernice na peyɛ kna, imi ki fna, mna pan kala li lawee wa, pre na sojae tafɛɛnlɛ pre, na chia loplombo titie pre ni. A waŋgra lopom Festus na tia pra sɛ pan na Paul ni.

24 Bawa waŋgra lopom Festus na kna mbo, “Ŋunu Agrippa, na yire mblɛ e fni mna kro, blɔ ŋmba kee ni Judae kro na pan ni pan Jerusalem na, mu ndru mu pan Caesarea na mna, na gble leni na ni ti mbe pe u gbo kre, wre wi kre.

25 A mi titi ki nya na u n kee ka pe, a ki fna mbe pe u gbo. A na wre titi kee kre wɔ na shie waŋgra kro tafun yiɛ na, ki tia ni yo na mbe ti pe sɛ na u ni wa.

26 La, ni n u kee kpiki ka ta mbe nyunɔ mbe sɛ ni tafun ŋga. Kre ndra na ni pan na u ni e yiɛ, na ŋu titi tolɛɛ Agrippa yiɛ na, imi kie pe na o u wie wie na, aada mbe kee ka ta mbe nyunɔ.

27 Mi pan kre, ki n kolo ni na mu yo pe sɛ na nyuŋgo lefun ni haka, a ma u kee kpiki ka ta mbe nyina.”