Tertullus Na Paara Mu Paul Taan
24
Ki ble kunɔ na, a srawɔfun lopom Ananias, na loplombo pre, na kala lifun wa praa u yeeri Tertullus, na le, mna pan mu kala ŋga ki pre na Paul ta krɛrɛ wa waŋgra lopom wre yiɛ.
2 Ŋga pra Paul yeeri mu pan kre, a Tertullus na yiri mna paara mu Paul taan mbo, “Ni Tafun, ŋu saara na o wejinyiŋge ta tataara, a kee kro na shie chichie o waŋgra ŋga nu.
3 Tolɛɛ Felix jaŋgafun, lawee kro nu, na kolo kro na kre, nyjɛ mu pini na o kaan krɛrɛ, o yi chin na mu kaan mboo yi na.
4 La, ni n na chaa mbe ni kee tnu, ni kee fiɛn ŋga na ni chaa mbe mu ndie tɛɛ.
5 O blɔ ŋmba nya na u pe kala chafun, na paan na kakrɔ ni Judae mblɛ pee wa waŋgra ŋga nu kro lalaa, a wre wi Nazareth kuo kre lopom.
6 Mnaa chaa mbe o Suminyuŋgo kre tɔ na nɛɛrɛ ni, a o na sɛ u yii, na chaa mbra u kala li o mbra kolo na.
7 A sojae lopom Lysias na pan mna u shɔ o kɛɛ jaŋga na.
8 Mna yo o pan na o pan mu yiɛ na, mbe paan kee kro yo. Na ŋu titi u wie kuraa mu chin ŋga ki o ta.”
9 A Judae mblɛ pra fni wa pre krɛrɛ na yo na kee nyjɛ Tertullus yo yire kro pe kpra.
Paul Yo U Tam Li
10 Ŋga waŋgra lopom wre na kɛ wa Paul pan na u paara kre, a wra kna mbo, “Tolɛɛ, ni chin na ŋga mu yiri mu pe waŋgra ŋga lopom, na ki kpra kunfun, ki mu. Ki tia ki tna ni pan na mbe yire mu yiɛ mbe paara.
11 Na mu wie mu chin na, ŋga ni sɛ Jerusalem na sumi haa kie pe ble kɛmbɔshiin yi kre.
12 Leele mblɛ pe paara na ni taanla ŋga, wa nsra ni nya na mi na ndro oyɛ nyu kaanri Suminyuŋgo wa, ndee mna kefɔɔn ka yo pe fninyinyi yire nu, ndee chia kre lawee ka nu.
13 A pia jaa mu nyina kpiki, kala ŋga ki o ta.
14 La, kee nunu ŋga ni nya yi na, sumiɛ kolo ŋga pe ŋga mɛɛ kuo kre, kre na ni taa, na o tolɛɛlɛ Nyiɛkpɔɔ wre sumi, mu na lii mbra nyjɛ Nyiɛkpɔɔ keenyanyofɛɛnlɛ na nyunɔ mu tɛɛ yire na.
15 A ni Nyiɛkpɔɔ shɔnli, imi na pe shɔnli na kunnyiɛ wa na mblɛ pe fraka, na mblɛ pe n fraka kro sri kre.
16 Kre kee ŋga na, ni niyɛ dɔɔtaa, na mba kee ka na ki nyini pe Nyiɛkpɔɔ, ndee lewo na, mbe ki waa pe sisaa ni pan.
17 Ŋga ndaa yili Jerusalem na, ndaa yɛlɛ yɛ li, na ni ndru mu pan wa. Ŋga ble ndaa paan Jerusalem na kre, pra ni kɛ swa mbe ni paan ni wolo shianfɛɛnlɛ pre ŋga, mbe ni sra wɔ mbe Nyiɛkpɔɔ ŋga.
18 Kena kre nu pra ni nya Suminyuŋgo wa na ni cheche paala kre pini. Ni n na le na lenɛɛrɛ plɛ ni wa, a ni nsra pan na kakrɔ ni wa.
19 La, Judae plɛ yiri Asia tra nu, a pe fna mbe pan mu yiɛ mna, na kala kaa wa mbe pe ta mbe yo mbe ni taan kre, mbe pe ki yo mbe mu loo.
20 Ndee na leele mblɛ pee wa mu yire mna fuŋgaami ŋga, na loo a ndaa kefɔɔn ka yo, nyjila ni ndaa wa mu yire kalalifɛɛnlɛ pre yire kre, pe ki yo mbe mu loo.
21 Fɔna nyjila ŋga ni ndaa wa mu yire pe lalaa, mna fuu mu yo na, ‘Kunnyiɛ kee kre, ni shɔnli, kre kala ni ta e lalaa kre bɔkɔ.’”
Felix Na Paul Le Chichie
22 Imi na waŋgra lopom Felix na kolo fɔŋgɔ ŋga kee Paul naa yuu kre kee chin kre ndra na, a wra tia pra zaanri. A wra kna mbo, “Na sojae lopom Lysias wre waa pan, mbe mu kee kre kpra kun.”
23 A wra Paul wru mu le sojae lopom wre kɛɛ, na u sɛ u tɛɛ chichie. La, pe u nɔɔlɔ ŋga kolo mbe pe paan u le, mbe u ŋga nyjɛ yi u shian.
24 Kie pe ble yɛ kɔkro kre, Felix na u chɔ Drusilla ŋmba wra pe Judae ndro wre na pan, mna tia pra sɛ Paul wɔ nyuŋgo mu pan, a wra shɔnlie ŋga kii wa Yesu Kristo nu kre, kee yo a pra loo.
25 Ŋga Paul lewo frakaa, na imi lewo fna mbe uyɛ yii mbe da, na kpra kuɔn ŋga kii wa kro na paan kre kee yo kre, fiɛrɛ na Felix yii, a wra yo Paul pan mbo, “Ki yila ma, sɛ tun, na ndaa kɔ mu kolo ta, mbe mu yeeri.”
26 Nde yire kee nyjɛ krɛrɛ kɔkro ni, Felix naa jawa na Paul we u dɔli na swa ka ni, kra tia wra tia praa paan na u ni, a praa paara.
27 Kie pe yɛlɛ shiin kɔkro, Porcius Festus na pan mu waŋgra lopom Felix krɔ li mna tni u titɛɛ, a ŋga Felix naa chaa mbe nyu Judae pre na kre, wra Paul ti nyuŋgo wa.