Paul Yo U Tam Li
23
A Paul na yiɛ kan kalalifɛɛnlɛ pre na mna kna mbo, “Ni wolo, lam nunu ni, ni tni ni Nyiɛkpɔɔ katoo mu pan mu su aŋga na.”
2 Ŋga wra yo ma kre, a Ananias, pe srawɔfun lopom titi wre na kna mna yo leele mblɛ praa wa mu yire Paul mbɛɛ na pre pan, na pe u nyu fɔɔri, mbe u kee kre yoo ti.
3 A Paul na kna mu yo Ananias pan mbo, “Ŋu yiɛnyumufun, ŋu Nyiɛkpɔɔ we gbun. Ŋu mu tni na kee lii mbra kolo na. A ŋu titi mbra yire taan, na mu yo na pe ni gbun.”
4 A mblɛ praa wa wa pre na kna mu u wie mbo, “Pan ki fna mbe mu paara Nyiɛkpɔɔ srawɔfun lopom titi pan ra?”
5 A Paul na kna mbo, “Ni wolo, ni n chin na srawɔfun wi. Ŋgi na hin? Pe ki nyunɔ mu yo na ki n fna mbe mu kefɔɔn yo ŋunu na.”
Pharisee Na Sadducee Peyɛ Yɔɔlɛ
6 Ŋga Paul na chin na leele pre plɛ pe Sadducee leele, a pe plɛ na pe Pharisee leele kre, a wra kna mna paara kpɔɔ leele pre nu mbo, “Ni wolo, Pharisee ndro wi mi, pre pe ni se, a ni kunnyiɛ kee kre shɔnli, kre kala ni ta kre.”
7 Ŋga Paul na yo ma kre, kra pan na kala ni Pharisee leele pre, na Sadducee leele pre lalaa, a lenɛɛrɛ mblɛ pra fni wa pre na yɔ shiin.
8 Ŋga kra tia kre, Sadducee leele pre naa yuu na kunnyiɛ, ndee Nyiɛkpɔɔ bituŋu, ndee Ŋumu ka n wa haka, a Pharisee leele pre na yire kee yire krɛrɛ shɔnli.
9 Gblee kre na wɛ kuraa, a Pharisee leele mblɛ na lɛ mbra nyinafɛɛnlɛ pre plɛ na yiri mna paara pɔɔrɔ ni mbo, “O n sisaa ŋga blɔ ŋmba pe nya, o n chin, aada Ŋumu, ndee Nyiɛkpɔɔ bituŋu wa u paara ma u pan.”
10 Pe paaraa kre na kɔ mu le kakrɔ nu, a fiɛrɛ na sojae lopom wre yii, na aada pie kɔɔ Paul tinii knumu, a wra tia sojae na tii tra, mna sɛ u shɔ pe pan jaŋga na, mna sɛ sojae pre tnihaa wa.
Yesu Paul Gbunnyiŋge
11 Ŋga ble na wɔ kre, o Tafun wre na pan mu yire Paul jaara mna yo u pan mbo, “Paul, muyɛ gbun yii, imi na mu ni dansiɛrɛ lii Jerusalem na mna a ni nya ŋga, pan ni chaa mbe mu sɛ ki li Rome na.”
Pe Da Mu Peyɛ Ŋga
12 Ŋga nyiŋge na se na kre, Judae pre plɛ na sɛ peyɛ nya, mna da mu peyɛ ŋga, na pia yaka le nyuu, mbe sɛ su na pie Paul gbo.
13 Leele mblɛ pra kre nyu nunu kre pe pre na wɛ leele fuloe shiin na.
14 A pra sɛ pe loplombo pre, na srawɔfɛɛnlɛ loplombo pre pan, mna sɛ yo pe pan mbo, “O da mu oyɛ tɔ, na waa yaka le nyuu, fɔna o Paul gbo.
15 Kena yire na kalalifɛɛnlɛ pre, e sɛ sojae lopom wre tali, mbe u ti pe u tre tra, mbe paan e ŋga, mbe e pe na e paan mbe u kala kre lam le chiriri. Wa da e na, na o u gbo fuŋga ma.”
U Naa Na Sɛ Ki Yo Sojae Lopom Wre Pan
16 Kee kre nyu pra le kre, Paul jaa pɔ wa na ki loo, mna sɛ ki yo u pan sojae tni haa wa.
17 A Paul na sojae loplombo pre wa yeeri mna yo u pan mbo, “Sɛ na nyanyjɛble ŋmba ni e lopom wre pan, uu wa kala ka ni mbe yo u pan.”
18 A soja wre na u bali mna sɛ na u ni sojae lopom wre pan, mna yo u pan mbo, “Paul ŋmba uu wa nyuŋgo wre u ni yeeri, mu ni tali na ni pan na nyanyjɛble ŋmba ni mu pan mbe u kee ka yo mu pan.”
19 A sojae lopom wre na sɛ na bituŋu wre ni mbɛɛ na, mna u wie mbo, “Yira ŋgi kee mu chaa mbe yo ni pan hin?”
20 A wra kna mbo, “Judae pre peyɛ nya na pie paan mu tali baŋga, mbe mu ndru mbe sɛ na Paul ni kalalihaa wa, mbe pe peyɛ pe na u kee kre pie u wie chiriri.
21 Maa shia pe kee kre loo, pe plɛ peyɛ nya, pie pe leele fuloe shiin, na Paul chaa mbe gbo. A pe sɛ da mu srawɔfɛɛnlɛ loplombo pre ŋga, na pia yaka le nyuu, mbe sɛ su na pie Paul gbo. Ki tia pee wa na mu sri, na mu pe ŋga ki kolo.”
22 A sojae lopom wre na nyanyjɛble wre wa kolo, mna yo u pan mbo, “Maa shia ti mbe ndro loo na mu kee ŋga yo ni pan.”
Sojae Tafun Wre Tia Pe Sɛ Na U Ni Caesarea Na
23 A wra sojae loplombo pre shiin yeeri mna yo pe pan mbo, “E sɛ sojae lafɛɛ shiin wɔ, na soolo nduufɛɛnlɛ fuloe taarɛ na kɛ, na snimi wafɛɛnlɛ lafɛɛ shiin ni, mbe pe peyɛ kna, na ki gbun nyjila kɔɔnanyjirɛ blee ŋga, mbe pe sɛ Caesarea na.
24 Mbe e soolo plɛ san, mbe pe sɛ Paul ni waŋgra lopom Felix pan, mbe le na yaka wa u ta.”
25 A wra hlɛ nyunɔ mu pe ŋga, na pe sɛ waŋgra lopom wre ŋga, kee ŋga kraa wa hlɛ kre nu na yi kre mbo,
26 “Mi Claudius Lysias pan hlɛ ŋga yiri, na shie waŋgra lopom Felix pan. Ni mu shaaraa chichie.
27 Blɔ ŋmba Judae na yii, mnaa chaa mbe u gbo, a ndaa loo na Roman ndro wi. A ndaa sojae wru mna sɛ u shɔ pe pan.
28 Ndaa chaa mbe kee ŋga nunu ndra na pra yila, na u chaa mbe gbo kre chin, kra tia ndaa sɛ na u ni pe kalalihaa wa.
29 Bawa ndaa nya na pe mbra yire kee na pra u yii. Pe nsra kee ka ta mu taa u na, a ki fna u ku, ndee mbe sni nyuŋgo.
30 Fuŋgaami ŋga ni loo na leele plɛ nyu le, na u chaa mbe gbo, ki tia ni yo pe da na u ni mu pan wa, a ni yo mblɛ wre na pre kala ta pre pan na pe pan mu yiɛ na, mbe ŋga ki pe ta kre nyina.”
Paul Yire Felix Yiɛ
31 A sojae pre na Paul bali mna sɛ, imi na pra yo pe pan na pe pe kre. A pra sɛ su na u ni Antipatris na blee kre.
32 Ŋga nyiŋge na se kre, a mblɛ praa nyaari tra pre na ndru pe kro, mna soolo tnifɛɛnlɛ pre chiin ti na pe sɛ na u ni.
33 Ŋga pra le na Paul ni Caesarea na kre, a pra sɛ hlɛ kre wɔ mna le waŋgra lopom wre kɛɛ, mna Paul wru mu u nyina.
34 Ŋga waŋgra lopom wre na hlɛ kre tɔɔnri mu kɔ kre, a wra Paul wie tra ŋga na u yiri, a wra yo na Cilicia na u yiri.
35 Ŋga wra loo ma kre, a wra kna mbo, “Na ŋu na mblɛ e kala ta pre waa pan, mbe na chaa mbe mu kee kre loo chiriri.” A wra tia pra sɛ Paul tɛɛ Ŋunu Herod katoo, a praa u sri.