2 Ŋga leele pre na loo na u Aramaic yolo yuu kre, a pra taa mu pieri komm na ndru u pan.

3 A Paul na kna mbo, “Judah ndro wi mi, a Tarsus na pe ni se, Cilicia tra nu. A Jerusalem na mna Gamaliel ni pɔɔri, mu ja mu ni nyina, a ni o tolɛɛlɛ paala yire kro tuan imi na ki fna. A ni yiɛ na nyina Nyiɛkpɔɔ tnumu na, imi e pini ŋga chɔɔ.

4 Ndaa Yesu sumiɛ ŋga nu ni nyi ŋga fun kuraa. Mnaa ki leele kuu, mnaa bilɛ, na chiɛlɛ kro yiri, a praa shie na pe leni nyuŋgo.

5 Judae srawɔfun lopom titi wre, na chia loplombo kro we ni dansiɛrɛ li. Hali ndaa sɛ hlɛ shɔ pe pan, mbe sɛ pe wolo mblɛ pee wa Damascus na pre ŋga, mbe sumifɛɛnlɛ pre yii mbe pan Jerusalem na, mbe pe pe ndie tini.

6 Ŋga ndaa shie mna chaa le Damascus na, titɛɛ kre nu, na lawee nyi mu yiri nyjeeri mu ni kun mu le.

7 A ndaa foli mu to tra, mna loo na mana ka ni yeeri mbo, ‘Saul, Saul, mni a mu ni pra ma hin?’

8 A ndaa kna mu wie na, ‘Ŋu wi ŋmbi hin? Ni Tafun?’

9 Leele mblɛ mi na pre naa nyaari pre na yira ŋga kra ni kun mu le kre nya, a nde pe nsraa paaraa kre ndru.

10 A ndaa kna mu wie na, ‘Yira ŋgi mu chaa mbe ni pe hin? Ni Tafun?’

11 Kra ni fun nyiɛlɛ na, a leele mblɛ mi na pre naa nyaari pre na ni yii kɛ na, mna le na ni ni Damascus lam.

12 Chia kre na blɔ wa na nyi, a praa u yeeri Ananias, a wraa lii Nyiɛkpɔɔ mbra yire na titi, a Judae mblɛ praa wa wa pre kro naa u kaan buuro.

13 Wre wra pan mna yire ni jaara, mna yo ni pan mbo, ‘Ni chunu Saul, mu nyiɛlɛ yire nyaa.’ Titɛɛ kre nu, ŋga ndaa ndra yire mna u nya ni yiɛ.

14 A wra kna mna yo ni pan mbo, ‘O tolɛɛlɛ Nyiɛkpɔɔ wre u mu wɔ na mu ŋga u chaa chin, mbe Yesu kprafun wre chin, mbe u nyu kee loo.

15 A u kee nyjɛ mu loo, na nyjɛ mu nya yire kro, mu yi kee yo leele kro pan mbe tro.

16 Kena ŋgi mu sri na hin? Yiri mbe pe mu ndra je, mbe mu sisam laa mu na, mbe mna u tali.’

17 Ŋga ndaa ndru mna pan Jerusalem na, mna sɛ le Judae Suminyuŋgo wa na nyiɛtali kre, bawa ndaa yira nya nyiɛlɛ na.

18 A ndaa o Tafun wre nya, a wra yo ni pan mbo, ‘Pe nyaanyaa mu yili Jerusalem na. Ni dansiɛrɛ kre mu li kre, pia ki loo.’

19 A ndaa kna mna yo na, ‘Ni Tafun, leele pre titi chin na, mi ndaa mu sumifɛɛnlɛ pre yiri fninyinyi yire nu, na shie na pe leni nyuŋgo, na pe gbuun kre.

20 A ŋga praa mu dansiɛlifun Stephen kuu kre, na nii wa mu yire wa, mna li ki na na pe u gbo. Hali mblɛ praa u kuu pre, mi ndaa pe dodonyi shɔ mu tɛɛ.’

21 A o Tafun wre na kna mbo, ‘Yili Jerusalem na mna, mbe ni mu tun mbe mu sɛ haalee leele mblɛ pe n pe Judae pre nu.’”

22 Leele pre na ndie tɛɛ Paul pan chiin, mna pan mu da kre kee ŋga na, a pra ndru na gble leni na yuu mbo, “E u wɔ e yili tra ŋga nu, u n fna mbe ŋmaa li.”

23 Ŋga praa gblee kre leni ma kre, a praa pe dodonyi viŋge, na bloŋgo yire nyjeeri.

24 A sojae lopom wre na tia pra sɛ na u ni sojae tnihaa wa. A wra yo na pe u frɔ fotro ni, mbe u wie chiriri, mbe chin ŋga ki tia leele pre na u gble ma.

25 Ŋga pra Paul pɔ, mbe u frɔ fotro ni, a Paul na kna mna sojae lopom wre wie mbo, “Kena kii kolo ni na ee Roman lepɔɔ gbun, nyjila ŋga ni pe n u kala li mu u gbun pimi nii?”

26 Ŋga soja lopom titi wre na u kee kre loo ma kre, a wra sɛ yo sojae lopom wre pan mbo, “Mni oo kee ŋga pe hin? Mu chin na blɔ wre, Roman ndro wii?”

27 A sojae lopom wre na sɛ Paul wie mbo, “Mu yo Roman ndro wi ŋuu? Kpra yo ni pan.”

28 A sojae lopom wre na kna mbo, “Rome lepɔɔ wi mi, la, swa nɛɛrɛ ni mi na ki lɔ.”

29 Ŋga pra loo na Roman ndro wi Paul kre, titɛɛ kre nu, a sojae mblɛ pra wɔ mbe pe u frɔ pre na nyina. A fiɛrɛ na sojae lopom wre yii, ŋga wra tia pra Roman ndro pɔ jlɔnyi ni kre ndra na.

30 Ŋga nyiŋge na se kre, sojae lopom wre naa chaa mbe kee kre Judae pre pe kre kpra chin. A wra tia pra Paul saan jlɔnyi yire na, mna tia pra srawɔfɛɛnlɛ loplombo pre, na kalalifɛɛnlɛ pre yeeri a pra pan mu fni. A wra tia pra sɛ pan na Paul ni mu yire pe lalaa, mbe pe u wie, mbe kee kre kpra chin.