21
Ŋga o na oyɛ kla kre, a o na krɔ bali mna sɛ le Cos na. Ŋga nyiŋge na se, a o na sɛ Rhodes na, mna yiri wa mu sɛ Patara na.
2 Patara na wa, o na krɔ ka nya na ki shie Phoenicia tra nu, a o na le ki nu, a o kro na sɛ.
3 Pan o naa Cyprus tra le imi, mna ki wa kamɛŋɛ, mna tro mu sɛ Syria tra nu, mna sɛ tii Tyre na. Na bawa krɔ kre shie mbe sɛ tuuro wɔ mbe tɛɛ.
4 Ŋga o na le wa mna bawa sumifɛɛnlɛ pre nya kre, a o na tni wa ble kɔɔnashin. Bawa pra yire Kpra Ŋumu wre na mna yo Paul pan na waa shia sɛ Jerusalem na.
5 Ŋga o ble yire nyu na to kre, a o na pe tali kolo, a pre na pe chiɛlɛ, na pe biile kro na o tro, mna pan mu da epo nyu na. Bawa o kro na kosie kan mna nyiɛtali.
6 A wre na pre na oyɛ kla, a o na le krɔ nu, a pre na ndru mna sɛ katoo.
Wre Na Philip Na Tni Caesarea Na
7 Ŋga o na yiri Tyre na kre, epo yiɛ na o na tro mna sɛ yili chia ŋga pe yeeri Ptolemais kre na. A o na tii mna o wolo mblɛ praa wa wa pre shaari, mna tni pe jaara ble nunu.
8 Ki nyisee na, a o na yili wa mna pan Caesarea na. Bawa o na sɛ tni Nyiɛkpɔɔ keeyofun ŋmba praa yeeri Philip wre katoo, Philip na chaa leele kɔɔnashin pre pra wɔ Jerusalem na pre nu.
9 Na uu wa na bichiɛlɛ jijirɛ mblɛ pe nsra bilɛ chin ni, a praa Nyiɛkpɔɔ kee nyaa na yuu.
Agabus Paul Nyuŋgo Lee Kee Nya Mu Yo
10 Ŋga o na ble chiɛri yɛ li wa kre, bawa Nyiɛkpɔɔ keenyanyofun wa na yiri Judea na mna le, u mɛɛ naa Agabus.
11 Ŋga wra pan o lawee kre, a wra sɛ Paul greree bali mna wre titi jeelee, na u kɛnyi pɔ na ki ni, mna kna mbo, “Imi na Kpra Ŋumu wre yo yi kre mbo, ‘Blɔ ŋmba wo yi greree ŋga kre, pan Judae mblɛ pee wa Jerusalem na pre we u pɔ imi, mbe u yii mbe sɛ le leele mblɛ pe n pe Judae kɛɛ.’”
12 Ŋga o na kee ŋga loo kre, a wre na leele mblɛ praa wa wa kre na Paul tali na waa sɛ Jerusalem na wa.
13 A Paul na kna mbo, “Nyji e pini, na nyɛni na ni gbun sroi ŋga hin? Ni n na fiɛ ni nyuŋgo lee na, hali na kumu yi Jerusalem na wa o Tafun Yesu wre mɛɛ na kuraa kre, ni n na fiɛ.”
14 Ŋga u nsra o kee kre loo kre, a o na pieri mna yo na, “Ŋga o Tafun wre chaa ki pe.”
Paul Le Jerusalem Na
15 Yire ble yire kɔkro kre, o na oyɛ kna mna sɛ Jerusalem na.
16 Ŋga o naa shie kre, twanfɛɛnlɛ plɛ na yiri Caesarea na wa mna ya o na, a o na sɛ. A pra sɛ na o ni twanfun lɔɔ wa katoo, u mɛɛ naa Mnason, a wra yiri Cyprus na.
17 Ŋga o na le Jerusalem na kre, o wolo mblɛ praa wa wa pre na o yii kama.
Wre Na James Paara
18 Ŋga nyiŋge na se kre, a wre na Paul na sɛ James katoo, na pre loplombo pre kroo wa wa.
19 Ŋga o na oyɛ shaari mu kɔ kre, a Paul na pe nyina nununu, tnumu ŋga Nyiɛkpɔɔ na yire u na mu tun leele mblɛ pe n pe Judae pre nu.
Paul Na Paala Pe
20 Ŋga pra o mandiɛ kre loo ma kre, pe kro na Nyiɛkpɔɔ ŋga mɛɛ, bawa pra yo Paul pan mbo, “Awe le, ŋu titi nya imi Judae kagbenyi kagbenyi na shɔnli mu ndru mu taa fa mbra yire kro.
21 A pe mu kee yo pe pan na, ŋu mu Judae mblɛ pee wa mu tni mu chaa leele mblɛ pe n pe Judae nu pre nyina na pia taa Moses mbra yire na. A pia na pe biile blɛm knumu, ndee mbe taa paala ka na.
22 Kena fuŋgaami ŋga, kolo ŋgi na oo tro hin? Yaka ma, ŋga mu le ŋga, pie mu kee loo.
23 Kena li kolo ŋga oo mu nyina ŋga na. Bilɛ jijirɛ plɛɛ wa o pan mna, mna nyu yo paala kolo na.
24 Kena pre leele mblɛ yii mu ya muyɛ na, mbe e sɛ paala kre pe, mbe mu pe ndra fɔlɔ tɔ kro, mbe pe pe ndrɛ klu. Kena chiafɛɛnlɛ chin na mu kee nyjɛ pe loo kre kafinɛ yi. Yaka ma. Pie chin na ŋu titi kuraa li mbra kre na.
25 La, waŋgra leele mblɛ pe shɔnli pre, o na nyu nunu ta, mna nyunɔ mu sɛ pe ŋga na, pe peyɛ laa sɛɛnlɛ yire kro, na nyimi, na yurɔ ŋmba nyimi yi n wo tra, na tiɛrɛɛ kee nu.”
26 Ŋga nyiŋge na se kre, a Paul na bilɛ pre na paala kre pe mna peyɛ weli mna sɛ Judae Suminyuŋgo wa mbe sɛ pe nyina ŋga ble pe paala nyu we to, mbe pe paan pe sra yirɛ wɔ.
Pra Paul Yii
27 Ŋga ble kɔɔnashin yire naa dani kre, Judae plɛ na yiri Asia waŋgra kre nu mna pan mu Paul nya pe Suminyuŋgo kre nu, a pra kanyaa le mna Paul yii.
28 Mna na kulo, na leele yeeri mbo, “Israel bilɛ e ya o na. Blɔ ŋmba u paara na ndro kro nyina lawee kro nu, mu na o tra ŋga, na o mbra yire, na o suminyuŋgo ŋga taanla kre, u ndru mu pan na waŋgra leele ni o Suminyuŋgo kre nu, mu nɛɛrɛ tɛɛ mu ki tɔ.”
29 Ŋgi na hin? Na pe klu mu Paul na Ephesus ndro ŋmba praa yeeri Trophimus wre nya a praa kila, kra tia praa jawa na Paul le na u ni Suminyuŋgo wa.
30 Ŋga kra pan ma kre, a chia kre na yiri mu paari, a leele na kan mu pan mu fni wa, mna Paul tini mu yili Suminyuŋgo wa, mna krɔɛ yire tini mu tɔ tɔ.
Sojae Lopom Na Paul Shɔ
31 Ŋga praa kolo chaa mbe u gbo kre, sojae lopom wre na ki loo na Jerusalem kro yiri mu paari.
32 Titɛɛ kre nu, a sojae lopom wre na sojae wru, na pe loplombo plɛ ni mna sɛ leele pre nu. Ŋga pra sojae pre, na pe tafun wre nya kre, a pra Paul gbɔɔn ti.
33 A sojae lopom wre na sɛ Paul yii, mna tia pra jlɔnyi tɛɛ mna u pɔ. Mna pe wie ndro ŋmba nyini wi, na ŋga u pe.
34 Ŋga wra pe wie Paul gbɔɔn kre, lenɛɛrɛ pre nu, na ŋmba ŋga yo, mbe ŋmba ŋga yo. Imi na praa gblee kre, u nsra ja mbe kee kre kpra chin. A wra tia pra u wru mna sɛ sojae pre tnihaa wa, hali imi na leele pre naa pini mu taa u na kre,
35 ŋga pra da jlonwee nyu na mbe le pe tnihaa wa kre, tio pra Paul tio ndra na.
36 Na lenɛɛrɛ pre kro yuu mbo, “E ti u kɛ yili wa.”
Paul Kolo Tali Mbe Paara
37 Ŋga praa lee na Paul ni pe tnihaa wa kre, a wra kna mna yo sojae lopom wre pan mbo, “Jande, ni tafun, nii wa na kolo ni na mbe paara mu pan ra?”
38 A sojae lopom wre na kna mu u wie mbo, “Mu Greek yolo ndru ra? Ŋu wi Egypt ndro ŋmba wra kanyaa ka le aŋge kro mna tia pra bilɛ linkufɛɛnlɛ kagbenyi jijirɛ plɛ yii mna sɛ tablɔ tra nu kree?”
39 A Paul na kna mbo, “Judae ndro wi mi, a ni yiri Tarsus na. Ki pe Cilicia waŋgra kre chia ŋga mɛɛ ki yili kpɔɔ. La, ni mu tali, mbe mu ni ŋga kolo chiɛri, mbe ni paara mbe leele mblɛ nyina.”
40 A sojae lopom wre na u ŋga kolo, a Paul na yire pe nduuhaa kre na, mna kɛ wa leele pre pan, na pe loo. Ba wra paara Judae yolo nu.