Paul Na Sɛ Macedonia Na Athens Na Troas Na
20
Ŋga kanyaa kre nyu na to kre, a Paul na twanfɛɛnlɛ pre yeeri mna fni, mna paara mna pe le gbun, mna pe kla, mna sɛ Macedonia na.
2 Ŋga wra le wa kre, wra sɛ twanfɛɛnlɛ pre praa wa chiɛ yire na wa kro shaari, mna pe le gbeŋmbaa, mna tro mu sɛ Greece na.
3 Wra li wa nyiɛpɔ taarɛ, mna krɔ bali mbe sɛ Syria na. A ŋga wra nya na Judae pre kolo chaa mbe u gbo kre, wraa chaa mbe ndruu sɛ tro Macedonia na.
4 Ŋga wraa shie kre, leele plɛ na taa u na. Pre na lɛ Berea ndro Sopater, Pyrrhus pɔ, na Timothy, na Derbe ndro Gaius, na Thessalonica leele plɛ, na Aristarchus, na Secundus, na Asia leele Tychicus, na Trophimus.
5 Ŋga o na le wa kre, na pre leele mblɛ krɛrɛ yiɛklu mu sɛ tni Troas na na o sri.
6 Ŋga o na klɛntro ble kpɔɛ yire li mu kɔ kre, a o na yili Philippi na, mna krɔ bali mna tro lɔɔ yiɛ na ble nununu kunɔ, mna pan mu pe da Troas na, mna tni wa ble kɔɔnashin.
Wra Eutychus Nyi
7 Ŋga Aliɛri ble na to, kranu kre ble yɛklo kre, o na sɛ fni mbe o Tafun sro li, a Paul na yiri mu paara mu leele pre nyina. Ŋga wraa chaa mbe yili wa ki nyisee na kre, kra tia wra paara chiin, a ndram na sɛ yɔ.
8 Kaniɛ tataara naa wa nyjeeri nyuŋgo ŋga nu o na fni kre nu.
9 Na nyanyjɛble wa, u mɛɛ naa Eutychus, na uu wa mu tni tokro ka na, na ndru, jaa na ŋunumu u shio, a Paul na kro na paara suwi. A ŋunumu kre na kɔ mu wɛ u na, a wra kun nyuŋgo taarɛwo kre nu nyjeeri wa, mna pan mu to tra. Ŋga pra pan mbe u yire kre, na u fii.
10 A Paul na tii mna sɛ juule u na, mna u fa mu yii, mna kna mu yo leele pre pan mbo, “Yaa ti ki e tɔɔra ma, u nyi”
11 A Paul na ndru mu nduu nyjeeri wa, mna sɛ o Tafun paanu kre pile, a pra ka, a wra ndru mna paara mna u kee kre taa, a ndram na pan mu saan, a wra chin mu yili wa.
12 A pra sɛ nyanyjɛble wre wru mna sɛ katoo, na yaka n u ta, a gbun na chin mu nyjii pe na.
Paul Wa Ephesus Krɔɛ Yirehaa
13 A o na yiɛ klu mna krɔ wru mna tro lɔɔ yiɛ na, mna sɛ to chia ka pe ki yeeri Assos, mbe Paul fni wa, mbe u wru krɔ ni. Na u yo we nyaari tra mbe sɛ wa.
14 Ŋga wre na wre na fni Assos na kre, a o na u bali, a o kro na sɛ Mitylene na.
15 Ŋga o na kɔ bawa kre, ki nyisee na, a o na Kios tra tro. Ŋga nyiŋge na ndru mu se kre, a o na le Samos na, ki nyisee na, a o na le Miletus na.
16 Kre nyjila kre na Paul chaa mbe o Ephesus kuun wa. Na kre ma, we kɔɔ mu Asia tra kre nu wa. Na u fiɛlɛ mbe le Jerusalem na nyaanyaa, mbe yila na Pentecost ble kre ni.
Klaa
17 A Paul na yire Miletus na mna ndro tun na u sɛ yo Ephesus sumifɛɛnlɛ pre loplombo pre pan na pe u fni, mbe pe paara.
18 Ŋga pra pan mu u fni kre, a wra yo pe pan mbo, “Yire titi e chin na, mu yire ble ŋga na ndaa le Asia na, imi na mi na yire na tni nyjila tataara nu.
19 Kee nyjɛ Judae pre na taa ni na krɛrɛ yire kɔkro, ndaa niyɛ nyjii, mna nyɛnɛɛ tɛɛ na ni Nyiɛkpɔɔ sumi.
20 Yire titi chin na ketaan kre kee ŋga ki nyu mu e ŋga kro, ni n tɔ ki na. Ndaa ki yuu na e nyina lete na, na e kalonyi nu.
21 Ndaa Greek leele, na Judae kro jaari na pe laa pe sisam kro, mbe taa Nyiɛkpɔɔ na, mbe o Tafun Yesu Kristo wre shɔ mbe li.
22 Hali fuŋgaami ŋga kuraa, Jerusalem na ni shie kre. Kpra Ŋumu wre jaŋga ni, ni shie, a ni n chin ŋga kie ni nya wa.
23 Chia ŋga na mbe le kro, kee ŋga Kpra Ŋumu wre yuu ni pan yi na, nyuŋgo lee, na kanyanaa wa ni yiɛ na ni sri.
24 La, ni kee ka ma na ki ni. Ni n ni ŋmaa wru mu pe yira kpɔɔ ka mu niyɛ ŋga. La, ŋga ni chaa yi na, mbe nyaari mbe tnumu ŋga o Tafun Yesu Kristo ni ŋga, na ni Nyiɛkpɔɔ koroo, na u ketaan kre dansiɛrɛ lie kre tnumu tun.
25 E le, fuŋgaami ŋga ni chin na yire mblɛ na ni nyaari mu Nyiɛkpɔɔ ŋunumu kee kre yo mu tro kre, wa wa ni yiɛ ŋga nya na.
26 Ki tia, ni yuu e pan na, na e wa waa ku mu fun kre, u hankɛ n wa ni na.
27 Ŋgi na hin? Nyiɛkpɔɔ kee ka n wa a ni ki ndra e na.
28 Kena e eyɛ le chichie, e Nyiɛkpɔɔ sumifɛɛnlɛ mblɛ Kpra Ŋumu wre le e kɛɛ, a Nyiɛkpɔɔ u pɔ wre nyimi tɛɛ mu pe lɔ pre le chichie.
29 Yaka ma, mi titi chin na ŋga ni shie ŋga, komboolo sisaala we paan le mbaala pre nu, a pia ti mbe pe peyɛ ta.
30 A e nu chɔɔ plɛ we yiri, mbe denyjuu tɛɛ, mbe twanfɛɛnlɛ mblɛ tataara laa, mbe taa peyɛ kro.
31 Kena e eyɛ shie, e sɔɔnri na yɛlɛ nununu taarɛ yi ŋga, ni n wuu, lafo na blee, nyɛnɛɛ ni ni paara na e kro nyina.
32 Kena fuŋgaami ŋga, Nyiɛkpɔɔ kee, na u koroo kee kre nu ni e wru mu le, kee kre kie jaa e pɔɔri, mbe e ŋga krɔ yira ŋga u tɛɛ u leele chechee pre pan kre.
33 Ni yiɛ nsra nyina wa swa fiŋge, ndee wa swanyiɛ, ndee wa yoŋgo na.
34 Yire titi e chin na ni kɛnyu tnumu ni ni yirɛ nyjɛ yi mi na ni kotɔmblɔ shian kro cha.
35 Yire kee nyjɛ krɛrɛ ni e nyina, e na tnumu tuni ma, e na yaa mblɛ pe n peyɛ ja pre na, mbe e o Tafun Yesu Kristo kee ŋga wra yo kre sɔɔnri, na dwamu wa wɔŋgaa nu, mu wɛ ŋga mu kɛ tini mbe shɔ na.”