3 A wra ndru mu pe wie mbo, “Shɔnlie ŋgi nu pra e ndrɛ je mu le hin?”

4 A Paul na kna mbo, “John ndrɛ jee kre rɛ, wraa nyina na leele pe pe jawala chinɛ, mbe laa pe sisam kro, mbe Yesu ŋmba uu wa u kro na paan wre shɔ mbe li.”

5 Ŋga twanfɛɛnlɛ pre na loo ma kre, a pra tia pra pe ndrɛ je mu le o Tafun Yesu wre mɛɛ nu.

6 Ŋga Paul na kɛnyi taa taa pe na kre, titɛɛ kre nu, a Kpra Ŋumu wre na pan mu le pe nu nununu. A praa yolo fɔnyi yuu, mnaa Nyiɛkpɔɔ kee nyaa na yuu.

7 Na leele pre kro we pe kɛmbɔshiin.

8 Paul na li nyiɛpɔ taarɛ Ephesus na wa, na shie Judae fninyuŋgo wa, mna gbun ta na pe nyina Nyiɛkpɔɔ ŋunumu kre kee.

9 La, pe plɛ ndie na kan, a pe nsra kee kre shɔnli, mna ndru na kefuɛn yuu na Yesu sumiɛ kre taanla lenɛɛrɛ pre yiɛ na. A Paul na yili pe nu, mna u twanfɛɛnlɛ pre yoori mna sɛ na pe ni blɔ wa praa u yeeri Tyrannus nyuŋgo, mna na pe nyina kee kre wa blenyini.

10 Yɛlɛ shiin, na Paul wa na nyina wa, mna sɛ su na leele mblɛ pee wa Asia tra nu wa kro, Judae, na Greek leele kro na o Tafun kee kre loo.

11 A Nyiɛkpɔɔ na yire Paul na mna tia kekpɔɛ na pe wa.

12 Hali leele naa Paul wejiyirɛ laala u na, mbe sɛ taa yambla na mbe pe saanla, a mblɛ nu ŋumufuɛn na nyi na yili yili pe nu.

13 Bawa Judae kɔmfoɔe plɛ naa kila na tro, mna peyɛ faŋga wru mbe Yesu mɛɛ tɛɛ mbe ŋumufuɛnfɛɛnlɛ plɛ tra. Imi praa yuu yi kre mbo, “O yo e pan, Yesu ŋmba kee Paul yuu kre mɛɛ nu, e yili.”

14 Judae srawɔfun lopom ŋmba praa yeeri Sceva wre biile na lɛ, praa leele kɔɔnashin, mnaa kre deŋge kre lii.

15 A ŋumufɔɔn kre na yo pe pan mbo, “Ni Yesu chin, mu Paul chin, a yire, sena e yiri hin?”

16 A blɔ ŋmba nu ŋumufɔɔn wre na nyi wre na yiri mna le pe nu, mna pe gbun kuraa mna laala, mna pe ni. A pra fɛ mu yili katoo wa na wejiwrɛ ni mu sɛ.

17 A kre kee ŋga na kpali kro Ephesus chia kre na, hali pe Judae, na Greek leele pre kro na ki loo. A kra tia fiɛrɛ na wo pe na, a praa o Tafun wre mɛɛ chichie yeeri.

18 Ŋga kra pan ma kre, leele mblɛ pra shɔnli pre na pan na pe sisam, na pe wɔmu kee nyjɛ pe pini yuu.

19 Pe mblɛ praa dobodobo tnumu tuni pre tataara na sɛ pe hlɛ koli mu pan, a pra yi sro lenɛɛrɛ pre yiɛ na. Ŋga pra yire hlɛ yire fɔlɔ nyu gbun kre, na yi da swa finyi kagbenyi fuloe shiin na kɛ.

20 Kra tia Nyiɛkpɔɔ kee kre na kpɔɔ bawa tra kre nu.

21 Ŋga pra yire kee nyjɛ pe mu kɔ kre, Paul na jawa na ki fna u sɛ tro Macedonia, na Achaia trɛ nu, mbe sɛ Jerusalem na. “A na ni da wa, ki fna mbe ni tro mbe sɛ Rome na.”

22 Bawa wra tia u kotɔmblɔ pre shiin, Timothy na Erastus, na sɛ Macedonia tra nu. A wre na tni Asia tra nu mna mu wa chiɛri.

23 Kre nyjila kre nu, kanyaa ŋga nyini kra le sumiɛ kre nu kre nsra prɔ.

24 Kra yire swa fiŋge tutuŋu wa na, praa u yeeri Demetrius, ŋmba wra ja na swa fiŋge teeri na pe sɛɛn Artemis nyuŋgo kre nyinyi gbeele, mna tia tutumblɔ naa ki tnu lii kro.

25 Ki ble ka, wra mblɛ praa ki tnumu kre ka tuni pre kro fni, mna yo pe pan mbo, “Wolo, e chin na tnumu ŋga kre nu o lii, na o yirɛ taa.

26 A yire titi e nya mu loo na Ephesus na mna chiin ma, Asia waŋgra ŋga kro nu, imi na blɔ ŋmba pe yeeri Paul wre, ja mu leele tataara nyina na, sɛɛnlɛ nyjɛ pe faanri kɛ ni yire pe yirɛ wɛɛ, mu tia pe pe jawala chinɛ.

27 Ki n pe na o tnumu ŋga chiin kie kla, la, kie ti mbe o sɛɛn kpɔɔ Artemis kre, mbe ndro wa ki shɔ mbe li na. A kie ti yɛnyiŋge, na kpɔɔmu ŋga Asia, na waŋgra ŋga kro ki kaan kre, mbe kia ki ta na.”

28 Ŋga pra kee kre loo ma kre, a pe krɔ na kun kpɔɔ, a praa gble na yuu mbo, “Ephesus Artemis wre wi jaŋgafun titi.”

29 Ŋga kra pan ma kre, na chia kre kro yiri mu paari. A pra tin na shie pe kapoŋgo fnihaa wa. Pra Macedonia leele mblɛ pre na Paul naa nyaari pre yii, mna le na pe ni pe fnihaa wa. Leele pre na lɛ Gaius, na Aristarchus.

30 Ŋga kra pan ma kre, Paul naa chaa mbe jiji lenɛɛrɛ pre nu mbe sɛ wa ka, a u twanfɛɛnlɛ pre nsra u ŋga kolo.

31 Paul nɔɔlɔ plɛ na chaa Asia loplombo pre nu, a pra ndro tun, na u sɛ yo u pan na, waa yili mbe pan lenɛɛrɛ pre lawee kuraa.

32 A leele pre naa gble chaachaa, a kanyaa kre na wɛ kuraa, hali pe nɛɛrɛ nsra kala ŋga na pra pan wa nɔɔloo.

33 A Judae pre na Alexander tini mu sɛ yire yiɛ na u paara. Ŋga lenɛɛrɛ pre na u nya kre, a pra yo u pan mbo, “Paara mbe o loo.” A Alexander na kɛ yire leele pre pan, na u chaa mbe paara.

34 Ŋga leele pre na u nya mna u chin na Judae ndro wi kre, a pra ndru mu gble mu lawee kre tɔ. Kie pe nyjila nununu shiin, na pee wa na gble na yuu mbo, “Ephesus Artemis wre wi jaŋgafun titi.”

35 A chia kre nyunɔfun, na pan mna paara mu pe nyina mbo, “Ephesus bilɛ, kena ŋmbi uu wa tra ŋga nu, a u n chin na wre Ephesus leele o Artemis nyuŋgo kre le hin? A ŋmbi u n chin na ki dnɛ kpɔɔ kre, na nyjeeri kra yiri mu pan mu to tra hin?

36 Kena ŋga ndro kro ki chin, a kakra n wa ki na ŋga, ki fna mbe e pieri komm, mbe yaa krɔ kpɔɔ tɛɛ mbaa sisaa ka pe.

37 Yaka ma, leele mblɛ e yii mu pan mna ŋga, pe n nɛɛrɛ wo sumi ndoo kre na, a pe n jiɛnlɛ kee ka yo mu Artemis taan.

38 Kena na Demetrius, na u tutumblɔ wa na leele mblɛ kala ni rɛ, kala li ndoo kree wa, a ki kalalifɛɛnlɛ pree wa, kena ee jaa sɛ na e kala ni wa.

39 A na kee fɔnyi yɛɛ wa na rɛ, oo jaa fni mbe yire gbeele.

40 Kena na o n dɔɔta aŋga kee ŋga na kre, oo kala ta ki kro. Na kre ma, na ki pan na pe ni wie, mba kee ka chin mbe yo.”

41 Ŋga wra paara ma kre, a wra leele pre nyina.