Paul Na Sɛ Aquila Na Priscilla Shaari
18
Kee nyjɛ kɔkro kre, Paul na yili Athens na mna sɛ Corinth na.
2 Bawa wra Judae ndro wa nya, praa u yeeri Aquila, Pontus na pra u se. Na fuŋga wre na u chɔ Priscilla yiri Italy na mu pan wa. Ŋgi na hin? Na waŋgra lopom Claudius mbra le na, Judae kro pe yili Rome na. A Paul na sɛ pe shaari wa.
3 Ŋga pe kro naa tnumu nunu tuni kre na, kra tia Paul na sɛ chaa mu tni na pe ni wa, a praa tnumu tuni, na yonyi nyinyi tini.
4 Ŋga wraa wa wa kre, wraa shie Judae pre fninyuŋgo wa Wuuble kro nu, na paara pe pan, imi kie pe mbe Greek leele na Judae pre pe jawala chinɛ.
Silas Na Timothy
5 Nyjila ŋga nu Silas na Timothy na yiri Macedonia na mna pan mu le wa kre, na Paul yiɛ nyina wra paara na dansiɛrɛ lii na Judae pre nyina, na Yesu wi Kristo wre.
6 A ŋga Judae pre na u kee kre je, mna na kefuɛn yuu kre, a wra u dodonyi nyaara mna yo pe pan mbo, “Na e waa ku, kena yire pan ki yire, e sisam n wa ni na. Mu yire aŋga na shie kre, leele mblɛ pe n pe Judae pre pan mbe na kee kre yuu.”
Corinth Tnɛɛ
7 Ŋga wra yiri wa kre, a wra sɛ blɔ wa katoo, praa u yeeri Titius Justus, a wra pe Nyiɛkpɔɔ sumifun, a u katoo naa wa Judae fninyuŋgo kre mbɛɛ na.
8 Pe fninyuŋgo kre lopom wa, praa yeeri Crispus, wre na u katoo leele kro na o Tafun wre shɔnli. A Corinth leele mblɛ pra kee kre loo pre tataara na shɔnli, a pra pe ndrɛ je.
9 Ki ble ka blee, Paul na yirɛ nya nyiɛlɛ na, a o Tafun na yo u pan mbo, “Maa fiɛ, maa shia pieri. Ta ni kee kre yuu.
10 Nii wa mu kro, ndro wa kɛ taa mu na mbe mu tɔɔra. Nii wa na leele ni tataara chia ŋga na.”
11 Ŋga kra pan ma kre, Paul na tni Corinth na wa yɛlɛ nyu, na nyiɛpɔ kɔɔnanu, na pe nyina Nyiɛkpɔɔ kee kre.
Paul Wa Gallio Yiɛ
12 Nyjila ŋga nu Gallio na pan mu ŋunumu li Achaia tra nu kre, Judae pre kro na nyu ta nunu mna sɛ Paul yii mna sɛ na u ni kalalifɛɛnlɛ pre yiɛ.
13 Mbo, “Blɔ ŋmba u leele jawala klai, a pra Nyiɛkpɔɔ sumi, kolo ŋga ki o mbra yire taan na.”
14 Ŋga Paul na yiri mbe kee kre nyu wɔ to, a lopom Gallio wre na yiri mbo, “Judae, na kra pe na kee sisaa ka yi, ndee jiɛnlɛ kee ka na yi kre, mbe na ndie taa ki loo.
15 La, ŋga ki pe mɛɛ, na kee nyjɛ yi pe yire titi mbra kee ŋga ndra na, yire titi e ki le e yo. Mi yire kee nyjɛ kprakuɔn je.”
16 A wra pe ni, mna yili kala lihaa wa.
17 A leele pre kro na fninyuŋgo kre lopom ŋmba praa yeeri Sosthenes wre yii, mna u frɔ kalalihaa kre yɛsimi wa.
Ephesus, Caesarea, Jerusalem Na Antioch
18 Kee nyjɛ kɔkro kre, Paul na kro wa ble tataara, mna chin mu shɔnlifɛɛnlɛ pre ti wa, a wre na Priscilla na Aquila naa shie Syria tra nu. Ŋga wra le Cenchrea na kre, a wra u ndra klu. Ŋgi na hin? Na u ki nyu yo mu tɛɛ.
19 A pra yiri wa mna tro epo yiɛ na, mna sɛ Ephesus na, bawa wra Priscilla na Aquila ti.
Wre titi wraa shie Judae pre fninyuŋgo, na pe nyina kee kre.
20 A pra u tali na u tni pe jaara ble chiɛri yɛ, a wra je.
21 Ŋga wra yo we sɛ kre, a wra yo pe pan mbo, “Na Nyiɛkpɔɔ waa li ki na, mbe ndru mbe pan na.”
A wra yili Ephesus na, mna sɛ krɔ bali,
22 mna sɛ Caesarea na, mna yiri wa mna sɛ shɔnlifɛɛnlɛ pre shaari Jerusalem na, mna tro mu sɛ Antioch na.
23 Ŋga Paul na ble yɛ li wa kre, a wra sɛ kila Galatia, na Phrygia tra yire nu, na gbeŋmbaa leni twanfɛɛnlɛ pre praa wa wa pre nu.
Apollos Na Sɛ Ephesus Na Corinth Na
24 Kre nyjila kre nu kre, Judae ndro wa na pan Ephesus na, u mɛɛ naa Apollos. A wra yiri Alexandria na, a wra pe lewo ŋmba nyu kra kun, mna Nyiɛkpɔɔ kee kre chin titi.
25 Wre Apollos ŋmba, na pe klu mu u nyina chiɛri imi na o Tafun wre kolo nyi, a kra tia u yiɛ na shɔ. A wra ja na paara na Yesu kee yuu kama imi na ki fna. A nde nyjɛ krɛrɛ ni kre, na John ndra jee kee kre chiin u chin.
26 Ŋga wra le Ephesus na kre, titɛɛ kre nu, a wra gbuntitirem tɛɛ na Nyiɛkpɔɔ kee kre yuu Judae fninyinyi nu na tro. Kena ŋga Priscilla na Aquila na u nya na Yesu kee kre chiɛri u chin kre, a pra u wru mna sɛ pe katoo, mna sɛ u nyina imi na Nyiɛkpɔɔ kolo kre nyi kpɔɔ mu ya.
27 Ŋga wra kɔ na chaa mbe sɛ Achaia na kre, a shɔnlifɛɛnlɛ pre na u gbeŋmba, mna hlɛ nyunɔ mna Achaia twanfɛɛnlɛ pre tro na pe u le chichie. Ŋga wra le wa kre, kra mblɛ pra yire Nyiɛkpɔɔ dumiɛ kre na, mu shɔnli pre le gbeŋmbaa tataara.
28 Ŋga wre na Judae pre na nyu kna na peyɛ ni lete na kre, a wra pe nyina Nyiɛkpɔɔ kee kre pe nyunɔ mu tɛɛ kre, na Yesu wi ŋmba Nyiɛkpɔɔ tun wre, mna tɛɛ mu pe nyu gbo.