Paul Paara Thessalonica Na
17
Ŋga Paul na Silas na yiri wa kre, a pra sɛ tro Amphipolis, na Apollonia chiɛ yire na, mna sɛ Thessalonica na. Na Judae fninyuŋgo kaa wa wa.
2 A imi Paul naa pini nyjila tataara nu kre, wra sɛ pe pan fninyuŋgo wa, Wuuble nununu taarɛ nu, mnaa pe nyina Nyiɛkpɔɔ kee ŋga pe nyunɔ mu tɛɛ kre.
3 A wraa pe nyina kee yire nɔɔ, na dansiɛrɛ lii na ki fna na Kristo wre we kala nya, mbe pe u gbo mbe u ndruu nyi. Wre Yesu ŋmba kee ni yuu ŋga, wre wi Kristo, ŋmba Nyiɛkpɔɔ wɔ wre.
4 Ŋga Paul naa pe nyina kre, Judae pre plɛ na ki shɔnli, hali Greek leele mblɛ praa Nyiɛkpɔɔ fiɛ pre tataara, na chiɛlɛ loplombo tataara, na kna mu taa Paul na Silas kro.
Kanyaa Lehaa
5 Ŋga kra pan ma kre, Judae mblɛ pe nsra shɔnli pre yiɛ na nyina pe na, a pra sɛ lewaala mblɛ ndra kra sheli wru, mna ya peyɛ na. A pra sɛ kanyaa le chia kre leele nu, mna sɛ blɔ ŋmba praa yeeri Jason kre tɔ u katoo, mbe Paul na Silas yii mbe paan pe ŋga.
6 Ŋga pra Paul na Silas cha mu la kre, a pra Jason, na shɔnlifɛɛnlɛ pre plɛ tini mna sɛ na pe ni chia kre loplombo yiɛ mbo, “Leele mblɛ pe tia waŋgra ŋga yire mu paari kre, pe pan mna na.
7 A Jason pe shɔ mu tɛɛ u katoo, a pe kro na kee nyjɛ waŋgra lopom Caesar yo na waa pe yire pini, na yuu na ŋunu waa wa na, a pra u yeeri Yesu.”
8 Ŋga lenɛɛrɛ pre na chia loplombo pre na loo ma kre, kra pe tɔɔra kpɔɔ.
9 A pra swa shɔ Jason na shɔnlifɛɛnlɛ pre pan mna pe wa, a pra sɛ.
Berea
10 Ŋga kra pan ma kre to, a sumifɛɛnlɛ pre na Paul na Silas wa kolo blee kre, a pra yire wa mna sɛ Berea na. Ŋga pra le wa kre, a pra sɛ Judae pre fninyuŋgo.
11 Judae mblɛ praa wa wa pre na pe leele chichiele, mu wɛ Thessalonica wolo pre na. Ŋgi na hin? Pre na lɛɛ wɔ chiriri, mna ndie tɛɛ pe kee kro na. Nyjila kro nu, pan praa kee kre pe nyunɔ mu tɛɛ kre tɔɔnri na le, na nyjɛ Paul na Silas naa yuu yire pe kpra, ndee mni hin?
12 Kra tia pe nɛɛrɛ na shɔnli, pre na Greek chiɛlɛ loplombo tataara mblɛ praa wa wa pre, na pe bilɛ tataara ni.
Athens
13 Ŋga Judae mblɛ praa wa Thessalonica na pre na loo na Paul sɛ Nyiɛkpɔɔ kee kre yo Berea na kre, a pra u kɔŋgɔ ni wa na, mna sɛ kanyaa le bawa leele pre nu na.
14 Titɛɛ kre nu, a shɔnlifɛɛnlɛ pre praa wa wa pre na Paul wa kolo, na u sɛ epo nyu na, a wra sɛ mu Silas na Timothy ti wa.
15 Leele mblɛ pra sɛ Paul wa kolo pre na sɛ le na u ni Athens na. A wra yire wa mna pe kla Silas, na Timothy pan, na pe u kɔŋgɔ ni nyaanyaa, a pra ndru mna sɛ.
Paul Na Judae Na Greek Leele Paaraa
16 Ŋga Paul naa wa Athens na wa na pe sri kre, wra nya na chia kre sɛɛnlɛ bribri yi, a kra u tɔɔra kpɔɔ mu tro.
17 Kra tia wraa Judae, na mblɛ pe n pe Judae, mnaa Nyiɛkpɔɔ fiɛ pre fni blenyini, na paara na pe nyina. A pan wraa paara na mblɛ wraa fni jafa lawee pre nyina.
18 Wre na Epicurean, na Stoic kotɔmblɔ plɛ na sɛ fni, a pe plɛ naa wie mbo, “A yira ŋgi kee lewaa ŋmba ta na yuu ŋga hin?” A plɛ na kna mbo, “Ki pe na haka wolo sumiɛ ka nyini kee u yuu.” Ŋgi na hin? Yesu kee, na kunnyiɛ kee wraa yuu pe pan.
19 A pra Paul yeeri mna sɛ na u ni pe fnihaa ŋga praa yeeri Areopagus kre nu, mna sɛ u wie mbo, “O nyina mu kee fɔŋgɔ ŋga nɔɔ.
20 Ŋgi na hin? Kee nyjɛ mu yo a o loo nyjɛ krɛrɛ pe o pan kee fɔnyi. Ki tia o chaa mbe yi nɔɔ chin.”
21 Kena pre Athens leele pre na fumblɔ mblɛ praa wa chia kre na wa pre, pe nsraa kee ka ni na pini, na ŋga pie na kee fɔnyi nyjɛ yi lee chia kre na kre ndru mbra yuu bɔkɔ.
Paul Paara Areopagus Lalaa
22 Bawa Paul na yiri mu yire Areopagus kre lalaa mna kna mbo, “Athens bilɛ, ni ja mu chin na kolo kro na, ni nya na e sumiɛ chaa titi.
23 Ŋga ni tro na e yirɛ nyjɛ e sumi yire dɔɔ taa kre, ni nyunɔmu yɛ nya e sragbuɛnlɛɛ yɛ na mbo, ‘Nyiɛkpɔɔ Ŋmba O N Chin Wre Wo Yi Ŋga.’ Kena ŋmba e n chin, na u sumi kre, wre kee ni e nyina kre.
24 Nyiɛkpɔɔ ŋmba wra waŋgra ŋga gbeele na ki yira kro ni kre, wre wi nyjeeri na tra Tafun. A u n wa mu tni nyuŋgo ŋga pe kɛnyi tɛɛ mu sin nu.
25 A u n na lewo kɛ yira ka chaa. Ŋgi na hin? Wre u leele kro kaan ŋmaa, na yira kro.
26 A wre wra yire lewo nunu Adam na, mu tia leele jiri mu tra nyi. A wre wra pe nyjila nyjɛ pie li, na pe tnihɛɛ krɛrɛ kun mu tɛɛ tɛɛ.
27 Na pe wre Nyiɛkpɔɔ haa cha, pie u gbra kun, mbe u chin. La, u haa n le na lewo ni.
28 Wre nu o ŋmaa ta, mu tni na shie na paan, na yira kro pini. Imi na e mɛkɔmblɔ pre plɛ nyina kre mbo, ‘Wre lɛ Nyiɛkpɔɔ biile.’
29 Kena, na yɛŋgɛ yi na Nyiɛkpɔɔ biile lɛ wre waa, kena yaa ti mbe o jawa na Nyiɛkpɔɔ pe na swa nyiɛ, ndee swafiŋge, ndee dnɛ, ndee yira ŋga lewo kɛ tɛɛ mu gbeele yi.
30 Kre ndra na, nyjila ŋga ki tro, a e n na u chin kre, Nyiɛkpɔɔ wre yiɛ wɔ ki na, la, fuŋgaami ŋga, u yo na lawee kro nu, lewo kro u u jawala chinɛ.
31 Ŋgi na hin? U ble ka wɔ mu tɛɛ, mbe ti mbe blɔ nunu ŋmba u wɔ mu tɛɛ wre paan waŋgra leele kro ŋga pe pimi, na pe tam kpra na. Wre blɔ wre wra nyi mu yili kuulo nu kre, mbe ki yire ki na, mbe lewo shɔ mbe li.”
32 Ŋga leele pre na kunnyiɛ kee kre loo Paul nyu na kre, a pe plɛ naa u tɛɛ, a pe plɛ naa yuu mbo, “O mu kee kre chaa mbe loo na.”
33 Bawa Paul na chin mna yili wa.
34 A leele pre plɛ na shɔnli mna taa u kro. Mblɛ pra shɔnli pre wa na wi Dionysius, a wra pe Areopagus leele pre wa, na chlɔ wa, u mɛɛ naa Damaris, pe plɛ naa wa mu ya tataara.